¹ N'Omukanani, kabaka w’e Yaladi, eyatyamanga mu bukiika obulyo, n'a wulira nga Isiraeri aiza mu ngira ya Asalimu; n'a lwana n'e Isiraeri n'a wamba abamu ku ibo. ² Isiraeri ni yeeyama obweyamu eri Mukama, n'a koba nti bwewagabulira dala abantu bano mu mukono gwange, ndizikiririrya dala ebibuga byabwe. ³ Mukama n'a wulira eidoboozi lya Isiraeri, n'a gabula Abakanani; ni babazikiririrya dala ibo n'e bibuga byabwe ekifo ni kituumibwa eriina lyakyo Koluma. ⁴ Ni basitula okuva ku lusozi Koola ni baaba mu ngira ery'Enyanza Emyofu, okwetooloola ensi ya Edomu obulamu bw'a bantu ni bukeŋentererwa inu olw'o lugendo. ⁵ Abantu ni batumula kubbiibi ku Katonda n'o ku Musa, nti mwatutoleire ki mu Misiri okutuniinisya okufiira mu idungu? kubanga wabula kyokulya, so wabula maizi; n'o bulamu bwaisu butamirwe ekyokulya kino ekyangu. ⁶ Mukama n'a sindikira abantu emisota egy'o musyo, ni giruma abantu; abantu bangi ni bafa ku Isiraeri. ⁷ Abantu ni baiza eri Musa ni bakoba nti twonoonere kubanga twatumwire kubbiibi ku Mukama ne ku iwe; saba Mukama atutooleku emisota. Musa n'a sabira abantu. ⁸ Mukama n'a koba Musa nti weekolere omusota ogw'o musyo, oguteeke ku mulongooti awo olwatuuka, buli alumiibwe bweyagubona, yabba mulamu. ⁹ Musa n'a kola omusota ogw'e kikomo, n'a guteeka ku mulongooti awo olwatuukire omusota bwe gwabbanga gulumire omuntu yenayena, bwe yalingiriire omusota ogw'e kikomo, n'abba mulamu. ¹⁰ Abaana ba Isiraeri ni batambula ni basiisira mu Obosi. ¹¹ Ni basitula e Obosi ni batambula ni basiisira mu Lyeabalimu, mu idungu eryolekera Mowaabu, ku luuyi olw'e buvaisana. ¹² Ni bavaayo, ni batambula, ni basiisira mu kiwonvu kya Zeredi. ¹³ Ni bavaayo ni batambula ni basiisira emitala wa Alunoni, oguli mu idungu, ogusibuka mu nsalo y'Abamooli kubanga Alunoni niiyo nsalo ya Mowaabu, wakati we Mowaabu n'Abamooli. ¹⁴ Kyekyaviire kitumulwa mu kitabo eky'Entalo gya Mukama nti Vakebu mu Sufa n'e biwonvu bya Alunoni, ¹⁵ N'e biiko eby'e biwonvu Ebiserengetera eri enyumba gya Ali, Era ebyesigama ku nsalo y'e Mowaabu. ¹⁶ Ne bavaayo ne batambula ni baaba e Beeri eyo niiyo ensulo Mukama gye yakobeireku Musa nti Kuŋaanya abantu, nzena nabawa amaizi. ¹⁷ Isiraeri kaisi nayemba olwembo luno Weesere, iwe ensulo; mu lwembere; ¹⁸ Ensulo abakulu gye basimire, Abakungu b'a bantu gye bayelwiire, N'o mwigo ogw'o bwakabaka, n'e miigo gyabwe. Ni bava mu idungu ne batambula ni baaba e Matana ¹⁹ ni basitula e Matana ni baaba e Nakalieri ni basitula e Nakalieri ni baaba e Bamosi ²⁰ ne basitula e Bamosi ni baaba mu kiwonvu ekiri ku itale lye Mowaabu, ku ntiiko ye Pisuga, kw'o yema okulengera eidungu. ²¹ Isiraeri n'a tuma ababaka eri Sikoni kabaka w'Abamoli ng'atumula nti ²² Ke mbite mu nsi yo ti tulikyamira mu nimiro waire mu lusuku lw'e mizabbibu; tetulinywa ku maizi ge nsulo tulitambulira mu luguudo lwa kabaka, Okutuusya lwe tulibita mu nsalo yo. ²³ Sikoni n'ataganya Isiraeri kubita mu nsalo ye naye Sikoni n'a kuŋaanya abantu be bonabona, n'a tabaala Isiraeri mu idungu, n'a tuuka e Yakazi n'a lwana ne Isiraeri. ²⁴ Isiraeri n'a mukubba n'o bwogi bw'e kitala, n'alya ensi ye okuva ku Alunoni okutuuka ku Yaboki, okutuuka ku baana ba Amotu kubanga ensalo ey'a baana ba Amoni yabbaire ya maani. ²⁵ Isiraeri n'alya ebibuga ebyo byonabona Isiraeri n'atyama mu bibuga byonabona eby'Abamoli, mu Kesuboni n'o mu bibuga byakyo byonabona. ²⁶ Kubanga Kesuboni kyabbaire kibuga kya Sikoni kabaka w'Abamoli, eyalwaine n'o kabaka we Mowaabu eyasookere, n'atoola mu mukono gwe ensi yonayona, okutuuka ku Alunoni. ²⁷ Abatumulira mu ngero kyebaaviire batumula nti mwize e Kesuboni, ekibuga kya Sikoni kizimbibwe kinywezebwe ²⁸ Kubanga omusyo gufulumire mu Kesuboni, enimi gy'o musyo mu kibuga kye Sikoni Gwokyerye Ali ekya Mowaabu, Abakungu ab'e bifo ebigulumivu ebya Alunoni. ²⁹ Gikusangire, Mowaabu! Mufiire, imwe abantu be Kemosi Agabwire bataane be okubba abairukire, n'a bawala be okubba abasibe, Eri Sikoni kabaka w'Abamoli. ³⁰ Twabasimbireku; Kesuboni kyazikiriire okutuuka ku Diboni, Era twazikiriirye okutuuka ku Nofa, ekituuka ku Medeba. ³¹ Isiraeri n'atyama atyo mu nsi y'Abamoli. ³² Musa n'atuma okukeeta Yazeri, ni balya ebibuga byayo, ni babbingamu Abamoli ababbaire eyo. ³³ Ne bakyuka ni bambukira mu ngira y'e Basani Ogi kabaka w'e Basani n'a batabaala, iye n'a bantu be bonabona okulwanira nabo e Derei. ³⁴ Mukama n'a koba Musa nti tomutya kubanga mugabwire mu mukono gwo, n'a bantu be bonabona, n'e nsi ye; era olimukola nga bwe wakolere Sikoni kabaka w'Abamoli, eyatyamanga e Kesuboni. ³⁵ Awo ni bamulekula n'a bataane be, n'a bantu be bonabona, ne watamusigalirawo n'o mumu ni balya ensi ye. Ensuula