¹ Awo abaana ba Isiraeri, ekibiina kyonakyona, ne batuuka mu idungu lya Zini mu mwezi ogw'o luberyeberye abantu ni batyama mu Kadesi; Miryamu n'afiira eyo n'a ziikibwa eyo. ² Ni watabba maizi ge kibiina ni beekuŋaanyirya ku Musa n'o ku Alooni. ³ Abantu ni bawakana n'o Musa ni batumula nti Singa twafiiriire abagande baisu bwe bafiirire mu maiso ga Mukama! ⁴ Era mwaleeteire ki ekibiina kya Mukama mu idungu muno, tufiire omwo, ife n'e bisibo byaisu? ⁵ Era mwatutoleire ki mu Misiri okutuniinisya okutuyingirya mu kifo kino ekibbiibi? Ti kifo kye nsigo, so ti kye itiini, so ti kye mizabbibu, so ti kye mikomamawanga; so wabula maizi go kunywa. ⁶ Musa n'a Alooni ne bava mu maiso g'e kibiina ne baaba ku mulyango gw'e weema ey'o kusisinkanirangamu, ne bavuunama amaiso gabwe ekitiibwa kya Mukama ni kiboneka. ⁷ Mukama n'a koba Musa nti ⁸ Irira omwigo ogwo, okuŋaanye ekibiina, gwe na Alooni mugande wo, mukobere olwazi mu maiso gabwe, luleete amaizi gaalwo; Abatoolera amaizi mu lwazi otyo bwewanywisya ekibiina n'e bisibo byabwe. ⁹ Musa n'a irira omwigo ng'a gutoola mu maiso ga Mukama, nga bwe yamulagiire. ¹⁰ Musa n'a Alooni ni bakuŋaanyirya ekibiina mu maiso g'o lwazi, n'a bakoba nti Muwulire, imwe abajeemu; ife twabatoolera amaizi mu lwazi muno? ¹¹ Musa n'a yimusya omukono gwe, n’a kubba olwazi n'o mwigo gwe emirundi ibiri amaizi mangi ni gavaamu, ekibiina ni banywa n'e bisibo byabwe. ¹² Mukama n'a koba Musa n'a Alooni nti kubanga ti munjikiriirye, okuntukulya mu maiso g'a baana ba Isiraeri, kyemuliva muleka okuyingirya ekibiina kino mu nsi gye mbawaire. ¹³ Ago niigo maizi ag'e Meriba; kubanga abaana ba Isiraeri bawakaine n'o Mukama, n'a tukuzibwa mu ibo. ¹⁴ Musa n'atuma ababaka ng'a yema e Kadesi eri Kabaka w’e Edomu, nti Atyo bw'a tumula Isiraeri mugande wo, nti omaite enaku gyonagyona egyatubaireku ¹⁵ baitawaisu bwe baserengetere mu Misiri, ni tumala mu Misiri ebiseera bingi Abamisiri ni batukola kubbiibi na baitawaisu ¹⁶ awo bwe twakungiire Mukama, n'a wulira eidoboozi lyaisu, n'a tuma malayika, n'a tutoola mu Misiri era, bona, tuli mu Kadesi; ekibuga ekiri ku nsalo yo enkomerero ¹⁷ ka tubite, nkwegayiriire, mu nsi yo tetulibita mu nimiro waire mu lusuku lw'e mizabbibu, so ti tulinywa ku maizi ag'o mu nsulo twatambuliranga mu luguudo lwa kabaka, ti tulikyamira ku mukono omulyo, waire omugooda, Okutuusya lwe tulibiita ku nsalo yo. ¹⁸ Edomu n'a mukoba nti tolibita mu nze, ndeke okukutabaala n'e kitala. ¹⁹ Abaana ba Isiraeri ni bamukoba nti tuliniinirira mu luguudo bwe twanywanga ku maizi go, nze n'e bisibo byange, kale n'awanga omuwendo gwago ka mbitemu bubiti n'e bigere. ²⁰ N'a koba nti tolibitamu. Edomu n'a mutabaala n'e igye lingi, n'o mukono ogw'a maani. ²¹ Atyo Edomu n'a gaana okubitya Isiraeri mu nsalo ya Isiraeri kyeyaviire akyuka okuva gy'ali. ²² Ni basitula e Kadesi ni batambula abaana ba Isiraeri, ekibiina kyonakyona, ne batuuka ku lusozi Koola. ²³ Mukama n'akobera Musa n'a Alooni ku lusozi Koola, ku nsalo y'e nsi ye Edomu, ng'a tumula ²⁴ nti Alooni yakuŋaanyizibwa eri abantu be kubanga taliyingira mu nsi gye mpaire abaana ba Isiraeri, kubanga mwajeemeire ekigambo kyange ku maizi ag'e Meriba. ²⁵ Twala Alooni n'Eriyazaali mutaane we, obaniinisye ku lusozi Koola ²⁶ Alooni omwambuleku ebivaalo bye, obivaalisye Eriyazaali mutaane we kale Alooni yakuŋaanyizibwa eri abantu be, era yafiira eyo. ²⁷ Musa n'akola nga Mukama bwe yalagiire ni baniina ku lusozi koola mu maiso g'e kibiina kyonakyona. ²⁸ Musa n'a yambula Alooni ebivaalo bye, n'abivaalisya Eriyazaali mutaane we; Alooni n’a fiira eyo ku ntiiko y'o lusozi Musa n'Eriyazaali ni baserengeta ni bava ku lusozi. ²⁹ Awo ekibiina kyonakyona bwe baboine nga Alooni afiire, ni bamala enaku asatu nga bakungira Alooni, enyumba ya Isiraeri yonayona. Essuula