¹ Mukama n'a koba Musa nti ² Tumula n'a baana ba Isiraeri obakobe nti bwe mulimala okutuuka mu nsi gye mwatyamangamu, gye mbawa, ³ era nga mutakire okuwaayo ekiweebwayo n'o musyo eri Mukama, ekiweebwayo ekyokyebwa oba Sadaaka, okutuukirirya obweyamu, oba okubba kye muwaayo ku bwanyu, oba ku mbaga gyanyu egyalagiirwe, okunyookererya Mukama eivumbe eisa, ku nte oba ku ntama ⁴ kale oyo eyawangayo ekitone kye yawangayo eri Mukama ekiweebwayo eky'o bwita eky'e kitundu eky'e ikumi ekya efa ey'o bwita obusa obutabwirwemu ekitundu eky'o kuna ekya ini ey'a mafuta ⁵ n'e nvinyo okubba ekiweebwayo ekyokunywa, ekitundu eky'o kuna ekya ini, wategekanga wamu n'e kiweebwayo ekyokyebwa oba olwe sadaaka, olwa buli mwana gw'e ntama. ⁶ Oba olw'e ntama enume wategekanga okubba ekiweebwayo eky'o bwita ebitundu bibiri eby'e ikumi ebya efa ey'o bwita obusa obutabwirwemu ekitundu eky'okusatu ekya ini ey'a mafuta ⁷ era okubba ekiweebwayo ekyokunywa wa wangayo ekitundu eky'o kusatu ekya ini ey'e nvinyu, ey'a kawoowo eri Mukama. ⁸ Era bwe wategekanga ente okubba ekiweebwayo ekyokyebwa oba okubba saddaaka, okutuukirirya obweyamu, oba okubba ebiweebwayo olw'e mirembe eri Mukama ⁹ kale yawangayo wamu n'e nte ekiweebwayo eky'o bwita eky'e bitundu bisatu eby'e ikumi ebya efa ey'o bwita obusa obutabwirwemu ekitundu kya ini ey'a mafuta. ¹⁰ Era wawangayo okubba ekiweebwayo ekyokunywa kitundu kya ini ey'e nvinyu, okubba ekiweebwayo ekikolebwa n'o musyo, eky'a kawoowo eri Mukama. ¹¹ Kityo bwe kyakolebwanga olwa buli nte, oba olwa buli ntama enume, oba olwa buli mwana gw'e ntama omulume, oba abaana b'e mbuli. ¹² Ng'o muwendo gwe mwateekanga bwe gwabbanga, bwe mwakolanga mutyo imu ku imu ng'o muwendo gwagyo bwe gwabbanga. ¹³ Enzaalwa bonabona bakolanga ebyo batyo, bwe bawangayo ekiweebwayo ekikolebwa n'o musyo, eky'e ivumbe eisa eri Mukama ¹⁴ Era Omugeni bweyatyamanga na imwe, oba buli eyabbanga mu imwe mu mirembe gyanyu gyonagyona, era ng'atakire okuwaayo ekiweebwayo ekikolebwa n'o musyo, eky'e ivumbe eisa eri Mukama; nga imwe bwe mukola, yeena bweyakolanga atyo. ¹⁵ Mu kibiina, wabbangawo eiteeka limu gye muli n'eri Omugeni yatyamanga mu imwe, eiteeka eritaliwaawo mu mirembe gyanyu gyonagyona nga imwe bwe muli, n'o mugeni bweyabbanga atyo mu maiso ga Mukama. ¹⁶ Eiteeka limu n'o bulombolombo bumu byabbanga gye muli n'eri Omugeni yatyamanga naimwe. ¹⁷ Mukama n'a koba Musa nti ¹⁸ Tumula n'a baana ba Isiraeri obakobe nti bwe mulituuka mu nsi gye mbatwala, awo olwatuukanga, ¹⁹ bwe mwalyanga ku mugaati ogw'e nsi, mwawangayo ekiweebwayo ekisitulibwa eri Mukama. ²⁰ Ku kafuta wanyu ow'o luberyeberye kwe mwatoolanga omugaati ni muguwaayo okubba ekiweebwayo ekisitulibwa nga bwe mukola ekiweebwayo ekisitulibwa eky'o mu iguuliro, bwe mwakisitulanga mutyo. ²¹ Ku kafuta wanyu ow'o luberyeberye kwe mwatoolanga okuwa Mukama ekiweebwayo ekisitulibwa mu mirembe gyanyu gyonagyona. ²² Era bwe mwasobyanga ni mutakwata biragiro bino byonabyona, Mukama bye yakobeire Musa, ²³ byonabyona Mukama bye yabalagiire n'o mukono gwa Musa, okuva ku lunaku Mukama lwe yalagiriireku, n'o luvanyuma lwonalwona mu mirembe gyanyu gyonagyona; ²⁴ awo olwatuukanga, bwe mwabbanga mukikolere nga ti mumanyiriire, ekibiina nga tekimaite, ekibiina kyonakyona bawawangayo ente imu envubuka okubba ekiweebwayo ekyokyebwa, olw'e ivumbe eisa eri Mukama, wamu n'e kiweebwayo kyaku eky'o bwita n'e kiweebwayo kyaku eky'o kunywa, ng'e iteeka bwe liri, n'e mbuli imu enume okubba ekiweebwayo olw'e kibbiibi. ²⁵ Era kabona yatangiriranga ekibiina kyonakyona eky'a baana ba Isiraeri, era basonyiyibwanga; kubanga kubbaire kusobya, era nga baleetere ekitone kyabwe, ekiweebwayo ekikolebwa n'o musyo eri Mukama, n'e kyabwe ekiweebwayo olw'e kibbiibi mu maiso ga Mukama, olw'o kusobya kwabwe ²⁶ n'e kibiina kyonakyona eky'a baana ba Isiraeri basonyiyibwanga, n'o mugeni atyama mu ibo; kubanga kyakoleibwe nga tebamanyiriire eri abantu bonabona. ²⁷ Era omuntu bweyayonoonanga nga tamanyiriire, kale yawangayo embuli enduusi ekaali kumala mwaka gumu okubba ekiweebwayo olw'e kibbiibi. ²⁸ Era kabona yatangiriranga obulamu obusobya, bwe yayonoonanga nga tamanyiriire, mu maiso ga Mukama, okumutangirira; kale yasonyiyibwanga. ²⁹ Mwabbanga n'e iteeka limu eri oyo eyakolanga ekikolwa kyonakyona nga tamanyiriire, eri enzaalwa mu baana ba Isiraeri, n'eri Omugeni atyama mu ibo. ³⁰ Naye obulamu obwakolanga ekikolwa kyonakyona n'e kyeju, oba nga nzalwa oba nga mugeni, oyo ng'a voire Mukama; n'o bulamu obwo bwazikirizibwanga mu bantu be. ³¹ Kubanga anyoomere ekigambo kya Mukama era ng'a menyere ekiragiro kye; obulamu obwo bwazikiririzibwanga dala, obutali butuukirivu bwe bwabbanga ku niiye. ³² Awo abaana ba Isiraeri bwe babbaire nga bakaali mu idungu, ne basanga omuntu ng'atyabira enku ku lunaku lwa sabbiiti. ³³ Boona abamusangire ng'a londa enku ne bamuleetera Musa n'a Alooni n'e kibiina kyonakyona. ³⁴ Ne bamusiba, kubanga kyabbaire kikaali kutegeezebwa bweyakolebwa. ³⁵ Mukama n'a koba Musa nti omuntu oyo taaleke kwitibwa ekibiina kyonakyona kyamukubbira amabbaale ewanza w'o lusiisira. ³⁶ Ekibiina kyonakyona ni bamutwala ewanza w'o lusiisira, ne bamukubba amabbaale, n'afa; nga Mukama bwe yalagiire Musa. ³⁷ Mukama n'a koba Musa nti ³⁸ Tumula n'a baana ba Isiraeri obalagire okwekolera amatanvuwa ku nkugiro gy'e bivaalo byabwe mu mirembe gyabwe gyonagyona, era bateeke omugwa ogwa kaniki ku matanvuwa agali ku buli lukugiro ³⁹ era gabbanga gye muli amatanvuuwa, mugabonenga mwijukire ebiragiro byonabyona ebya Mukama, mubikolenga; muleke okutambulatambula okusengererya omwoyo gwanyu imwe n'a maiso ganyu imwe, bye mubitya okusengererya okwenda nabyo ⁴⁰ mwijukire ebiragiro byange byonabyona mubikole, mubbe batukuvu eri Katonda wanyu. ⁴¹ Ninze Mukama Katonda wanyu, eyabatoire mu nsi y'e Misiri, okubba Katonda wanyu ninze Mukama Katonda wanyu. Essuula