¹ Awo ekibiina kyonakyona ni bayimusya eidoboozi lyabwe, ne balira; abantu ni bakunga amaliga obwire obwo. ² Abaana ba Isiraeri bonabona ni beemulugunyirya Musa na Alooni ekibiina kyonakyona ni babakoba nti singa twafiiriire mu nsi y'e Misiri! oba singa twafiiriire mu idungu muno! ³ Bakali baisu n'a baana baisu abatobato balibba munyago ti niikyo ekisinga obusa gye tuli okwirayo mu Misiri? ⁴ Ni bakobagana nti Tweteekerewo omugabe, twireyo mu Misiri. ⁵ Awo Musa na Alooni ni bavuunama amaiso gabwe mu maiso g'e kibiina kyonakyona eky'a baana ba Isiraeri. ⁶ Yoswa mutaane wa Nuuni n'o Kalebu mutaane wa Yefune, Ababbaire ku muwendo gw'abo abaketere ensi, ni bakanula engoye gyabwe ⁷ ne bakobera ekibiina kyonakyona eky'a baana ba Isiraeri nga batumula nti ensi gye twabitiremu okugikeeta nsi nsa inu. ⁸ Mukama oba ng'a tusanyukira, kale alituyingirya mu nsi omwo, n'a gituwa; ensi ekulukuta n'a mata n'o mujenene gw'e njoki. ⁹ Kyooka ti mujeemera Mukama, so ti mutya bantu b'o mu nsi; kubanga kyo kulya gye tuli ekiwolyo kyabwe kitooleibwe waigulu ku ibo, era Mukama ali wamu naife ti mubatya. ¹⁰ Naye ekibiina kyonakyona ni balagira okubakubba amabbaale. Ekitiibwa kya Mukama ni kibonekera mu wema ey'o kusisinkanirangamu eri abaana ba Isiraeri bonabona. ¹¹ Mukama n'a koba Musa nti Abantu bano balituukya waina okunyooma? era balituukya waina obutanjikirirya olw'o bubonero bwonabwona bwe nakolere mu ibo? ¹² N'a bakubba n'o kawumpuli, ni mbatoolaku obusika bwabwe, ni nkutoolamu eigwanga eribasinga ibo obunene n'a maani. ¹³ Musa n'a koba Mukama nti Kale Abamisiri balikiwulira; kubanga watoire abantu bano mu ibo n'a maani go n'o baniinisya; ¹⁴ ne bakikobera abatyama mu nsi muno bawuliire nga iwe Mukama oli wakati mu bantu bano; kubanga iwe Mukama oboneka maiso n'a maiso, n'e kireri kyo kyemerera ku ibo, n'o batangira, mu mpango ey'e kireri emisana, n'o mu mpango ey'o musyo obwire. ¹⁵ Kale bwewaleka abantu bano ng'o muntu omumu, kale amawanga agaawulira eitutumu lyo balitumula ¹⁶ nti Kubanga Mukama teyasoboire kuyingirya bantu bano mu nsi gye yabalayiriire, Kyeyaviire abaitira mu idungu. ¹⁷ Kale atyanu, nkwegayiriire obuyinza bwa Mukama bubbe bungi, nga bwe watumwire ¹⁸ nti Mukama alwawo okusunguwala, era ow'o kusaasira kungi, asonyiwa obutali butuukirivu n'o kusobya, era atalimutoolaku musango n'a katono aguliku; awalana obutali butuukirivu bwa bazeiza baabwe ku baana, ku mirembe egy'o kusatu n'e gy'o kuna. ¹⁹ Nkwegayiriire, sonyiwa, obutali obutuukirivu bw'a bantu bano ng'o kusaasira kwo bwe kuli okungi, era nga bwe wasonyiwanga abantu bano okuva mu Misiri na guno gwiza. ²⁰ Mukama n'a koba nti nsonyiwire ng'e kigambo kyo bwe kibbaire ²¹ naye mazima dala, nga bwe ndi omulamu, era ng'e nsi gyonagyona bwe girizula ekitiibwa kya Mukama; ²² kubanga Abasaiza abo bonabona ababoine ekitiibwa kyange n'o bubonero bwange bwe nakoleire mu Misiri n'o mu idungu, naye ne bankema emirundi gino eikumi, ni batawulira idoboozi lyange; ²³ mazima ti balibona nsi gye nalayiriire bazeiza baabwe, so tewalibba ku abo abanyooma n'o mumu aligibona ²⁴ naye omwidu wange, Kalebu, kubanga iye alina omwoyo ogundi mu iye, era iye ansengerererya dala, oyo ndi muleeta mu nsi gye yayabiremu; n'e izaire lye liriyigira. ²⁵ Kale Omwamaleki n'Omukanani batyama mu kiwonvu amakeeri mukyuke, mweyabire mu idungu mu ngira ey'e nyaza emyofu. ²⁶ Mukama n'a koba Musa n'a Alooni nti ²⁷ Ndituukya waina okugumiinkirirya ekibiina kino ekibbiibi, abaneemulugunyirya? Mpuliire okwe mulugunya kw'a baana ba Isiraeri kwe baneemulugunyirya. ²⁸ Bakobe nti nga bwe ndi omulamu, bw'a tumula Mukama, mazima nga bwe mutumwire mu matu gange, ntyo bwe nabakolanga ²⁹ emirambo gyanyu girigwa mu idungu muno; n'abo bonabona ababaliibwe ku imwe, ng'o muwendo gwanyu gwonagwona bwe gwabbaire, Ababbaire baakamala emyaka abiri n'o kusingawo, abaneemulugunyiirye, ³⁰ mazima ti mulituuka mu nsi, gye nayimukiriirye omukono gwange okubatyamisya omwo, wabula Kalebu mutaane wa Yefune, n'o Yoswa mutaane wa Nuuni. ³¹ Naye abaana banyu Abatobato, be mukobere okubba omunyago, abo ndibayingirya, boona balimanya ensi gye mugaine. ³² Naye imwe, emirambo gyanyu girigwa mu idungu muno. ³³ N'a baana banyu babbanga batambuli mu idungu okumala emyaka ana, era baabbangaku obwenzi bwanyu, okutuusya emirambo gyanyu lwe girizikiririra mu idungu. ³⁴ Ng'o muwendo gw'e naku bwe gwabbaire gye mwakeiteiremu ensi, niigyo naku ana, buli lunaku mwaka, bwe mwabbangaku mutyo obutali butuukirivu bwanyu, niigyo emyaka ana, era mwamanyanga bwe nabakobeire. ³⁵ Nze Mukama ntumwire, mazima ndikola kino ekibiina kino kyonakyona ekibbiibi, abankuŋaaniireku mu idungu muno mwe balizikiririra, era mwe balifiira. ³⁶ N'a bantu Musa be yatumire okukeeta ensi, abairirewo ni bamwemulugunyirirya ekibiina kyonakyona, nga baleeta ebigambo ebibbiibi ku nsi, ³⁷ abantu abo abaaleetere ebigambo ebibbiibi eby'e nsi ni bafa kawumpuli mu maiso ga Mukama. ³⁸ Naye Yoswa mutaane wa Nuuni n'o Kalebu mutaane wa Yefune ni basigalawo nga balamu ku bantu abo abaabire okukeeta ensi. ³⁹ Awo Musa n'a bakobera abaana ba Isiraeri bonabona ebigambo ebyo abantu ne bawuubaala inu. ⁴⁰ Ne bagolokoka amakeeri mu makeeri, ni beyabira ku ntiiko y'o lusozi nga batumula nti bona, tuuno, era twayambuka mu kifo Mukama kye yasubizirye kubanga twayonoonere. ⁴¹ Musa n'a koba nti atyanu musobeirye ki ekiragiro kya Mukama, kubanga ti kyabbe n'o mukisa? ⁴² Ti mwambuka, kubanga Mukama tali mu imwe; muleke okukubbirwa dala mu maiso g'a balabe banyu. ⁴³ Kubanga eyo Omwamaleki n'Omukanani bali mu maiso ganyu, era mwagwa n'e kitala kubanga mwairire enyuma obutasengererya Mukama, Mukama kyeyaviire aleka okubba na imwe. ⁴⁴ Naye ni beeyinula okuniina ku ntiiko y'o lusozi naye sanduuku ey'e ndagaanu ya Mukama no Musa ti baviire mu lusiisira. ⁴⁵ Awo Omwamaleki n'a serengeta, n'Omukanani eyatyaime ku lusozi okwo, ni babakubba ne babasyeera dala okutuukya e Koluma. Ensuula