¹ Awo Mukama n'a koba Musa nti ² Tuma abantu bakeete ensi y'e Kanani, gye mpa abaana ba Isiraeri mwatoola omuntu ku buli kika kya baitawabwe ni mumutuma, buli muntu omukulu mu ibo. ³ Awo Musa n'a batuma ng'a yema mu idungu lye Palani ng'e kiragiro kya Mukama bwe kyabbaire bonabona abasaiza ababbaire emitwe gy'a baana ba Isiraeri. ⁴ N'a maina gaabwe niigo gano ku kika kya Lewubeeni, Semuwa mutaane wa Zakula. ⁵ Ku kika kya Simyoni, Safati mutaane wa Koli. ⁶ Ku kika kya Yuda, Kalebu mutaane wa Yefune. ⁷ Ku kika kya Isakaali, Igali mutaane wa Yusufu. ⁸ Ku kika kya Efulayimu, Koseya mutaane wa Nuuni. ⁹ Ku kika kya Benyamini, Paluti mutaane wa Lafu. ¹⁰ Ku kika kya Zebbulooni, Gadyeri mutaane wa Sodi. ¹¹ Ku kika kya Yusufu, niikyo ekika kya Manase, Gaadi mutaane wa Susi. ¹² Ku kika kya Daani, Amiyeri mutaane wa Gemali. ¹³ Ku kika kya Aseri, Sesula mutaane wa Mikaeri. ¹⁴ Ku kika kya Nafutaali, Nakabi mutaane wa Vofesi. ¹⁵ Ku kika kya Gaadi, Geweri mutaane wa Maki. ¹⁶ Ago niigo maina g'abantu Musa be yatumire okukeeta ensi. Musa n'atuuma Koseya mutaane wa Nuuni Yoswa. ¹⁷ Musa n'a batuma okukeeta ensi ye Kanani, n'a bakoba nti mwambukire mu ngira eno ey'obukiika obulyo, muniine ku nsozi ¹⁸ mulengere ensi bw'eri; n'a bantu abagityamamu oba nga ba maani oba nga banafu, oba nga batono oba nga bangi; ¹⁹ era ensi bw'eri gye batyamamu, oba nga nsa oba nga mbiibbi; n'e bibuga bwe biri bye batyamamu, oba nga nsiisira, oba nga mu bigo; ²⁰ era ensi bw'eri, oba nga ngimu oba nga nkalu, oba nga mulimu emisaale oba nga mubula. Era mugume omwoyo, muleete ku bibala byamu. Era Ebiseera byabbaire biseera by'e mizabbibu egisooka okwenga. ²¹ Awo ni bambuka, ni baketa ensi okuva ku idungu lye Zini okutuuka e Lekobu, okutuusya w'o yingirira e Kamasi ²² Ne bambukira obukiika obulyyo, ni batuuka Kebbulooni; era Akimaani, Sesayi, n'o Talumaayi, abaana ba Anaki, babbaire bali eyo. (Era Kebbulooni kyabbaire kyakamala emyaka musaavu okuzimbibwa, kaisi ne bazimba Zowani ekiri mu Misiri ²³ Ni batuuka mu kiwonvu e Esukoli, ni batemayo eitabi eryabbaireku ekiyemba kimu ekye izabbibu, ni bakisitulira ku musituliro abantu babiri; era baleetere n'o ku makomamawanga, n'o ku itiini. ²⁴ Ekifo ekyo ni kyetebwa ekiwonvu Esukoli, olw'e kiyemba abaana ba Isiraeri kye baatemereyo. ²⁵ Awo ni bairawo nga bamalire okukeeta ensi enaku ana nga gibitirewo. ²⁶ Ni batuuka ni baiza eri Musa n'eri Alooni n'eri ekibiina kyonakona eky'a baana ba Isiraeri, mu idungu ly'e Palani, e Kadesi; ni babairirya ebigambo ibo n'e kibiina kyonakona, ni babalaga ebibala by'e nsi. ²⁷ Ni bamukobera ne bakoba nti Twatuukire mu nsi gye watutumire, era mazima ekulukuta n'a mata n'o mubisi gw'e njoki; era bino niibyo ebibala byayo. ²⁸ Naye abantu abatyama mu nsi ba maani, n'e bibuga biriku enkomera, binene inu era ate tetwaboineyo abaana ba Anaki. ²⁹ Amaleki atyama mu nsi ey'o bukiika obulyo n'Omukiiti, n'Omuyebusi, n'Omwamoli, batyama ku nsozi n'Omukanani atyama okumpi n'e nyanza, era ku lubalama lwa Yoludaani. ³⁰ Kalebu n'a sirikya abantu mu maiso ga Musa, n'a koba nti twambuke mangu ago, tugirye; kubanga tusobolera dala okugiwangula. ³¹ Naye abantu abayambukiire awamu naye ni bakoba nti tetusobola kwambuka ku bantu abo; kubanga batusinga amaani. ³² Ni baleeta ebigambo ebibbiibi eby'e nsi gye babbaire bakeetere eri abaana ba Isiraeri nga batumula nti ensi gye twabitiremu okugikeeta, nsi eriira dala abagityamamu; n'a bantu bonabona be twaboine omwo basaiza ba wanvu inu. ³³ Era twaboineyo Banefiri, abaana ba Anaki, abaviire ku Banefiri feena ni tubba mu maiso gaisu ng'o bwacaaka, era bwe twabbaire mu maiso gabwe. Essuula