¹ Awo Miryamu na Alooni ni batumula kubbiibi ku Musa olw'o mukali omukuusi gwe yabbaire akweire kubanga yabbaire akweire omukali Omukuusi. ² Ne batumula nti Mazima Mukama yatumwire na Musa yenka? era ti yatumwire naife? Mukama n'abiwulira. ³ Era omusaiza Musa yabbaire muwombeefu inu, okusinga abantu bonabona ababbaire ku nsi yonayona. ⁴ Mukama n'a tumula mangu ago n'o Musa na Alooni n'o Miryamu nti Mufulume mwensatu mwize ku weema ey'o kusisinkanirangamu. Abo bonsatu ni bafuluma. ⁵ Mukama n'a ikira mu mpango ey'e kireri, n'a yemerera ku mulyango gw'e weema, n'a yeta Alooni n'o Miryamu bombiri ni bafuluma. ⁶ N'a tumula nti muwulire ebigambo byange oba nga mwabbanga mu imwe nabbi, nze Mukama neetegeezanga gy'ali mu kwolesebwa, natumuliranga naye mu kirooto. ⁷ Omwidu wange Musa ti bw'ali atyo; oyo mwesigwa mu nyumba yange yonayona ⁸ oyo natumuliranga naye munwa na munwa, mu lwatu, so ti mu bigambo bye ngero; n'o kufaanana kwa Mukama yakubonanga kale ekyabalobeire ki okutya okutumula okubbiibi ku mwidu wange, ku Musa? ⁹ Obusungu bwa Mukama ni bubuubuuka ku ibo; ni yeeviirawo. ¹⁰ Ekireri ne kiva waigulu ku Weema; era bona, Miryamu n'a bbaaku ebigenge, ng'o muzira Alooni n'alingilira Miryamu, era, bona, ng'aliku ebigenge. ¹¹ Alooni n'a koba Musa nti Ai mukama wange, nkwegayiriire, totuteekaki kibbiibi, kubanga tukolere eby'o busirusiru era nga tukolere ekibbiibi. ¹² Nkwegayiriire aleke okubba ng'o mufu, omubiri gwe nga gwonoonekereku ekitundu ng'ava mu kida kya maye. ¹³ Musa n'a kungira Mukama ng'a tumula nti Muwonye, ai Katonda, nkwegayiriire. ¹⁴ Mukama n'a koba Musa nti Itaaye singa amufuujiire amatanta obulusu mu maiso, ensoni ti gyandimukwatiire enaku musanvu? asibirwe ewanza w'o lusiisira enaku musanvu, kale oluvannyuma kaisi ayingiribwe ate. ¹⁵ Miryamu n'asibirwa ewanza w'o lusiisira enaku musanvu abantu ni batatambula okutuusya Miryamu lwe yayingiziibwe ate. ¹⁶ Awo oluvanyuma abantu ni basitula e Kazerosi ni batambula ni basiisira mu idungu lya Palani. Essuula