¹ Abantu ni babba nga beemulugunya, nga batumula kubbiibi mu matu ga Mukama Mukama bwe yabawuliire obusungu bwe ni bubuubuuka; omusyo gwa Mukama ni gwokya mu ibo, ni gulya ku nkomerero y'o lusiisira. ² Abantu ni bakungira Musa; Musa n'a saba Mukama, omusyo ni gwikaikana. ³ Ekifo ekyo ni kituumibwa eriina Tabera kubanga omusyo gwa Mukama gwayokyerye mu ibo. ⁴ Awo ekibiina eky'a basenze ekyabbaire mu ibo ni batandika okwegomba n'a baana ba Isiraeri boona ni bakunga amaliga ate, ni bakoba nti Yani eyatuwa enyama okulya? ⁵ Twijukira ebyenyanza bye twaliiranga obwereere mu Misiri; wuju n'e nsuju n'e iva n'o butungulu n'e byokuliira ⁶ naye watyanu obulamu bwaisu bukaliire dala; wabula kintu n'a katono tubula kintu kye tubba twesiga wabula emaanu eno. ⁷ Era emaanu yabbairenga ensigo gya jaada, n'e kifaananyi kyayo ng'e kifaananyi kya bedola. ⁸ Abantu ni batambulatambula, ni bagikuŋaanya ni bagisyeera ku mengo, oba ni bagisekulira mu biwuulo, ni bagifumba mu ntamu, ne bagitoolamu emigaati n'o kuwooma kwayo kwabbairenga okuwooma kw'a mafuta amayaka. ⁹ Era omusulo bwe gwagwanga ku lusiisira obwire, emaanu n'e gwanga ku igwo. ¹⁰ Musa n'a wulira abantu nga bakunga amaliga mu nda gyabwe gyonagyona, buli muntu ku mulyango gw'e weema ye obusungu bwa Mukama ni bubuubuuka inu Musa n'a nyiiga. ¹¹ Awo Musa n'a koba Mukama nti kiki ekikukozeserye okubbiibi omwidu wo? era kiki ekindobeire okubona ekisa mu maiso go, n'o kuteekaku n'o nteekaku omugugu gw'a bantu bano bonabona? ¹² Ninze nabbaire ekida ky'a bantu bano bonabona? ninze nabazaire, n'o kukoba n'o nkoba nti basitule mu kifubba kyo nga itawabwe w'o mwana omuleli bw'a situla omwana anyonka, okubatwala mu nsi gye walayiriire bazeiza baabwe? ¹³ Nanditoire waina nze enyama okugabira abantu bano bonabona? kubanga bankungira nga batumula nti tuwe enyama tulye. ¹⁴ Nze tinsobola kusitula bantu bano bonabona nzenka, kubanga bayingire okunzitoowerera. ¹⁵ Era bwewankola otyo, ngitira dala mangu ago, nkwegayiriire, oba nga mboine ekisa mu maiso go; ndeke okubona enaku gyange. ¹⁶ Mukama n'a koba Musa nti nkuŋaanyirya abasaiza nsanvu ab'o ku bakaire ba Isiraeri, b'o maite okubba Abakaire b'a bantu n'a bakulu ababafuganga; obaleete ku weema eyokusisinkanirangamu, bemerere eyo wamu naiwe. ¹⁷ Nzena naika ni ntumula naiwe eyo era natoola ku mwoyo oguli ku iwe, ni nguteeka ku ibo; boona basitulanga omugugu gw'a bantu wamu naiwe, olekenga okugusitula iwe wenka. ¹⁸ Era koba abantu nti Mwetukulirye olunaku olw'e izo, era mulirya enyama kubanga mukungiire amaliga mu matu ga Mukama nga mutumula nti Yani alituwa enyama okulya? kubanga twabbaire kusa mu Misiri Mukama kyaliva abawa enyama, ni mulya. ¹⁹ Temuliriiraku lunaku lumu, waire enaku eibiri, waire enaku eitaano, waire enaku eikumi, waire enaku abiri; ²⁰ naye mwezi mulamba, okutuusya lw'e rifulumira mu nyindo gyanyu, ni mugisina kubanga mugaine Mukama ali mu imwe, ne mukungira amaliga mu maiso ge nga mutumula nti ekyatutoire ki mu Misiri? ²¹ Musa n'a koba nti Abantu be ndimu wakati, niibo basaiza abatambula n'e bigere obusiriivu mukaaga naye okoberee nti ndibawa enyama baliireku omwezi omulamba. ²² Babaitiranga entama n'e nte okubamalanga? oba balibakuŋaanyirya ebyenyanza byonabyona eby'o mu nyanza okubamalanga? ²³ Mukama n'a koba Musa nti Omukono gwa Mukama guyimpawaire? Atyanu wabona oba ng'e kigambo kyange kyatuukirira gy'oli oba ti niiwo awo. ²⁴ Musa n'a fuluma n'a kobera abantu ebigambo bya Mukama n'a kuŋaanya abasaiza nsanvu ab'o ku bakaire b'a bantu, n'a basaawo okwetooloola Eweema. ²⁵ Mukama n'a ikira mu kireri n'a tumula naye, n'a toola ku mwoyo ogwabbaire ku iye, n'a guteeka ku bakaire ensanvu awo olwatuukire omwoyo bwe gwatyaime ku ibo ni balagula, naye ni bakomya awo. ²⁶ Naye ne musigala mu lusiisira abasaiza babiri, eriina ly'o mumu Eridaadi, n'e riina ly'o gondi Medadi omwoyo ni gutyama ku ibo; era babbaire ku muwendo gw'abo abawandiikiibwe, naye babbaire ti bafulumire okwaba ku Weema ne balagulira mu lusiisira. ²⁷ Omwisuka n'a iruka n'a buulira Musa n'a koba nti Eridaadi n'o Medadi balagulira mu lusiisira. ²⁸ Yoswa mutaane wa Nuuni, omuweererya wa Musa, omumu ku basaiza be abalonde, n'a iramu n'a koba nti Mukama wange Musa, bagaane. ²⁹ Musa n'a koba nti eiyali likukwaite ku lwange? abantu bonabona aba Mukama singa banabbi, Mukama singa abateekaku omwoyo gwe! ³⁰ Musa ni yeirirayo mu lusiisira, iye n'a bakaire ba Isiraeri. ³¹ Empewo n'e fuluma eri Mukama, n'e reeta obugubi okuva ku nyanza, n'e bugwisya mu lusiisira, ng'o lugendo olw'o lunaku olumu ku luuyi luno, n'o lugendo olw'o lunaku olumu ku luuyi ludi, okwetooloola olusiisira, ng'e mikono ibiri okutuuka ku itakali we bwabbaire. ³² Abantu ni bagolokoka ni bazibya olunaku olwo, ni bakyeesya obwire, ne bazibya obwire obw'a makeeri, ne bakuŋaanya obugubi eyakuŋaanyirye obutono, yakuŋaanyirye komeri ikumi ne babweyanikira wonawona okwetooloola olusiisira. ³³ Enyama bwe yabbaire ng'e kaali wakati mu mainu gaabwe, nga bakaali kuginyaanya, obusungu bwa Mukama ni bubuubuuka ku bantu, Mukama n'a kubba abantu ekibonyoobonyo kinene inu. ³⁴ Ekifo ekyo ni kituumibwa eriina Kibezosukataava kubanga niiwo bazikiire abantu abeegomba. ³⁵ Abantu ne basitula e Kiberosukataava ne batambula ni baaba e Kazerosi; ni batyama e Kazerosi. Ensuula