¹ Mukama n'a koba Musa nti ² Weekolere amakondeere mabiri ge feeza; wagakola n'o mulimu omuweesye era gabbanga gy'oli ga kweta kibiina, era g'o kutambulya nsiisira. ³ Era bwe bagafuuwanga, ekibiina kyonakyona kyakuŋaaniranga gy'oli ku mulyango gw'e weema ey'o kusisinkanirangamu. ⁴ Era bwe banaafuuwanga erimu lyonka, kale abakulu, emitwe gy'e nkumi gya Isiraeri, bakuŋaaniranga gy'oli. ⁵ Era bwe mwagafuuwanga okugalaya, ensiisira egiri ku luuyi olw'e bugwaisana gyatambulanga. ⁶ Era bwe mwagafuuwanga okugalaya omulundi ogw'o kubiri, ensiisira egiri ku luuyi olw'o bukiika obulyo gyatambulanga bagafuuwanga okugalaya olw'o kutambula kwabwe. ⁷ Naye ekibiina bwe kyabbanga kyo kukuŋaanyizibwa, mwafuuwanga, naye temwagalayanga. ⁸ Na bataane ba Alooni, bakabona, bafuuwanga amakondeere; era gabbanga gye muli iteeka eritaliwaawo mu mirembe gyanyu gyonagona. ⁹ Era bwe mwatabaalanga mu nsi yanyu omulabe abajooga, kale mwafuuwanga amakondeere okugalaya; era mwaijukirwanga mu maiso ga Mukama Katonda wanyu, era mwalokokanga mu balabe banyu. ¹⁰ Era ku lunaku olw'e isanyu lyanyu, n'o ku mbaga gyanyu egyalagiirwe, n'e myezi gyanyu we gyasookeranga, mwafuuwanga amakondeere ago ku biweebwayo byanyu ebyokyebwa n'o ku Sadaaka egy'e byanyu ebiweebwayo olw'e mirembe; era gabbanga gye muli kiijukiryo mu maiso ga Katonda wanyu ninze Mukama Katonda wanyu. ¹¹ Awo olwatuukire mu mwaka ogw'o kubiri, mu mwezi ogw'o kubiri, ku lunaku olw'abiri olw'o mwezi, ekireri ni kitoolebwa kungulu ku weema ey'o bujulizi. ¹² Abaana ba Isiraeri ni basitula ng'e biramago byabwe bwe byabbaire ni bava mu idungu lya Sinaayi; Ekireri ni kyemerera mu idungu lya Palani. ¹³ Ni basooka okusitula ng'e kiragiro kya Mukama bwe kyabbaire mu mukono gwa Musa. ¹⁴ Ebbendera ey'o lusiisira olw'a baana ba Yuda n'e tangira n'e situla ng'e igye lyabwe bwe lyabbaire n'o mukulu w'e igye lye yabbaire Nakusoni mutaane wa Aminadaabu. ¹⁵ N'o mukulu w'e igye ly'e kika ky'a baana ba Isakaali yabbaire Nesaneri mutaane wa Zuwaali. ¹⁶ N'o mukulu w'e igye ly'e kika ky'a baana ba Zebbulooni yabbaire Eriyaabu mutabane wa Keroni. ¹⁷ Enyumba ni simbulibwa; bataane ba Gerusoni n'a bataane ba Merali, abeetiikanga enyumba, ni basitula. ¹⁸ Ebbendera y'o lusiisira lwa Lewubeeni n'e tambula ng'e igye lyabwe bwe lyabbaire n'o mukulu w'e igye lye yabbaire Erizuuli mutaane wa Sedewuli. ¹⁹ N'o mukulu w'e igye ly'e kika ky'a baana ba Simyoni yabbaire Serumiyeeri mutaane wa Zulisadaayi. ²⁰ N'o mukulu w'e igye ly'e kika ky'a baana ba Gaadi yabbaire Eriyasaafu mutaane wa Deweri. ²¹ Abakokasi ni beetiika nga basitwire awatukuvu badi ne basimbanga enyumba ibo nga bakaali kutuuka. ²² Ebendera ey'o lusiisira lw'a baana ba Efulayimu n'e situla ng'e igye lyabwe bwe lyabbaire n'o mukulu w'e igye lye yabbaire Erisaama mutaane wa Amikudi, ²³ N'o mukulu w'e igye ly'e kika ky'a baana ba Manase yabbaire Gamalyeri mutaane wa Pedazuuli. ²⁴ N'o mukulu w'e igye ly'e kika ky'a baana ba Benyamini yabbaire Abidaani mutaane wa Gidiyooni. ²⁵ Ebbendera y'o lusiisira lw'a baana ba Daani, eyasembanga ensiisira gyonagyona, n'e situla ng'e igye lyabwe bwe lyabbaire n'o mukulu w'e igye lye yabbaire Akiyezeeri mutaane wa Amisadaayi. ²⁶ N'o mukulu w'e igye ly'e kika ky'a baana ba Aseri yabbaire Pagiyeeri mutaane wa okulaani. ²⁷ N'o mukulu w'e igye ly'e kika ky'a baana ba Nafutaali yabbaire Akira mutaane wa Enani. ²⁸ Okwo niikwo kwabbaire okutambula kw'a baana ba Isiraeri ng'e igye lyabwe bwe lyabbaire; ni basitula. ²⁹ Awo Musa n'akoba Kobabu mutaane wa Leweri Omumidiyaani, muko wa Musa, nti tutambula okwaba mu kifo Mukama kye yatumwireku nti ndikibawa Iza iwe oyabe naife, Feena twakukolanga kusa kubanga Mukama yatumwire ebisa ku Isiraeri. ³⁰ N'amukoba nti ti nayabe naye na irayo mu nsi y'e waisu n'eri enda gyange. ³¹ N'a koba nti totuleka, nkwegayiriire; kubanga iwe omaite bwe tubba tusiisiranga mu idungu, era wabbanga gye tuli ng'a maiso. ³² Kale olwatuukanga, bwewayaba naife, niiwo awo, olwatukanga buli bisa byonabyona Mukama byeyatukolanga ife, ebyo twakukolanga weena. ³³ Ni basitula ni bava ku lusozi lwa Mukama okutambula olugendo olw'e naku isatu; n'e sanduuku ey'e ndagaanu ya Mukama n'e batangira olugendo olw'e naku isatu okubasaagirira ekifo eky'o kuwumuliramu. ³⁴ N'e kireri kya Mukama kyabbanga ku ibo emisana, bwe basitulanga okuva mu lusiisira. ³⁵ Awo olwatuukanga esanduuku bwe yasitulwanga Musa n'a tumula nti golokoka, ai Mukama, ababone ibo basaansaanyizibwe; n'abo abakukyawire bairuke mu maiso go. ³⁶ Era bwe yayemereranga n'a tumula nti iraawo, ai Mukama, eri emitwaalo gy'e nkumi gya Isiraeri. Ensuula