¹ Mukama n'a kobera Musa mu idungu lya Sinaayi, mu mwezi ogw'o luberyeberye ogw'o mwaka ogw'o kubiri nga bamalire okuva mu nsi y'e Misiri, nti ² Era abaana ba Isiraeri bakwatenga Okubitaku mu ntuuko gyakwo egyalagiirwe. ³ Ku lunaku olw'e ikumi n'e ina olw'o mwezi guno, akawungeezi, kwe mwakukwatiranga mu ntuuko gyakwo egyalagiirwe ng'a mateeka gaakwo gonagona n'o bulombolombo bwakwo bwonabwona niibwo buli, bwe mwakukwatanga mutyo. ⁴ Musa n'a koba abaana ba Isiraeri bakwatenga Okubitaku. ⁵ Ni bakwatira okubitaku mu mwezi ogw'o luberyeberye, ku lunaku olw'e ikumi n'e ina olw'o mwezi, olweigulo, mu idungu lya Sinaayi nga byonabyona bwe byabbaire Mukama bye yalagiire Musa, bwe bakolere abaana ba Isiraeri. ⁶ Awo ni wabaawo abantu ababbaire nga ti balongoofu olw'o mulambo gw'o muntu, n'o butasobola ni batasobola kukwatira kubitaku ku lunaku olwo ni baiza mu maiso ga Musa n'o Alooni ku lunaku olwo ⁷ abantu abo ni bamukoba nti mubula balongoofu olw'o mulambo gw'o muntu ekituziyizya kiki okuwaayo ekitone kya Mukama mu ntuuko gyakyo mu baana ba Isiraeri? ⁸ Musa n'a koba nti Musooke muleke; kaisi mpulire Mukama ky'eyalagira ku imwe. ⁹ Mukama n'a koba Musa nti ¹⁰ Koba abaana ba Isiraeri nti Omuntu yenayena ku imwe oba ku mirembe gyanyu bweyabbanga ti mulongoofu olw'o mulambo, oba bweyabbanga ali mu lugendo ewala, naye eyakwatanga okubitaku eri Mukama ¹¹ mu mwezi ogw'o kubiri ku lunaku olw'e ikumi n'e ina akawungeezi kwe bakukwatiranga; baakulyanga n'e migaati egitazimbulukuswa n'e iva erikaawa ¹² tebasigalyangaku Okutuusya amakeeri, so tebamenyanga igumba lyakwo ng'e iteeka lyonalyona ery'Okubitaku bwe liri bwe bakukwatanga batyo. ¹³ Naye omuntu omulongoofu so atali mu lugendo, n'a leka okukwata okubitaku, obulamu obwo bwazikirizibwanga mu bantu be kubanga tawaireeyo ekitone kya Mukama mu ntuuko gyakyo gyalagiirwe, omuntu oyo yabbangaku ekibbiibi kye. ¹⁴ Era omugeni bweyatyamanga mu imwe, n'a taka okukwata Okubitaku eri Mukama; ng'e iteeka ery'Okubitaku n'o bulombolombo bwakwo bwe buli, bweyakolanga atyo mwabbanga n'e iteeka limu eri omugeni era n'eri oyo eyazaaliirwe mu nsi. ¹⁵ Awo ku lunaku nayumba niikwo kusimbirwa ekireri ne kibiika ku nyumba y'e weema ey'o bujulizi era akawungeezi n'e kibba ku nyumba ng'e kifaananyi ky'o musyo, okutuusya amakeeri. ¹⁶ Bwe kyabbanga kityo enaku gyonagyona ekireri kyagibiikangaku, n'e kifaananyi ky'o musyo obwire. ¹⁷ Era buli ekireri niilwo kyatolebwangaku ku Weema, awo abaana ba Isiraeri kaisi ne batambula n'o mu kifo ekireri mwe kyabbaranga, awo abaana ba Isiraeri we baasiisiranga. ¹⁸ Abaana ba Isiraeri batambulanga lwe kiragiro kya Mukama, era baasiisiranga lwe kiragiro kya Mukama ekiseera kyonakyona ekireri kye kyamalanga ku nyumba batyamanga mu lusiisira. ¹⁹ Era ekireri bwe kyalwanga enaku nyingi ku nyumba, awo abaana ba Isiraeri ni bakwatanga ekiragiro kya Mukama, ne batatambula. ²⁰ Era olwisi ekireri kyamalanga enaku ntono ku nyumba; awo ng'e kiragiro kya Mukama bwe kyabbaire ni batyamanga mu lusiisira, era ng'e kiragiro kya Mukama bwe kyabbaire batambulanga. ²¹ Era olwisi ekireri kyabangaku okusooka olwe igulo okutuukya amakeeri; era ekireri bwe kyatolebwangaku amakeeri ni batambula oba bwe kyabbangaku emisana n'o bwire, ekireri bwe kyatolebwangaku, ni batambula. ²² Oba nga naku ibiri oba nga mwezi oba nga mwaka, ekireri bwe kyalwanga ku nyumba, nga kibba okwo, abaana ba Isiraeri ni batyamanga mu lusiisira, ni batatambula naye bwe kyatolebwangaku, ni batambulanga. ²³ Basiisiranga lwe kiragiro kya Mukama, era batambulanga lw'e kiragiro kya Mukama bakwatanga ebyo Mukama bye yakuutira, olw'e kiragiro kya Mukama mu mukono gwa Musa. Essuula