¹ Awo Koola, mutaane wa Izukali, mutaane wa Kokasi, mutaane wa Leevi, n'o Dasani n'o Abiraamu, bataane ba Eriyaabu, n'o Oni, mutaane wa Peresi, bataane ba Lewubeeni, ni batwala abantu ² ni bagolokoka mu maiso ga Musa, wamu n'a bandi ab'o ku baana ba Isiraeri, abakulu b'e kibiina bibiri mu ataano, abayeteibwe mu ikuŋaaniro, abasaiza abaayatiikiriire ³ ni beekuŋaanyirya ku Musa n'o ku Alooni ni babakoba nti muyinga okwekulya, kubanga ekibiina kyonakyona kitukuvu, buli muntu ku ibo, era Mukama ali mu ibo kale mwegulumirya ki okusinga ekibiina kya Mukama? ⁴ Awo Musa bwe yakiwuliire n'a vuunama amaiso ge ⁵ n'a koba Koola na bainainaye bonabona nti eizo Mukama yalaga ababe bwe bali, n'o mutukuvu bw'ali, era yamusemberya gy'ali oyo gweyalonda yamusemberya gy'ali. ⁶ Mukole muti; mwirire ebyotereryo, Koola na bainaye bonabona; ⁷ muteeke omwo omusyo, mubiteekeku obubaani mu maiso ga Mukama eizo kale olwatuuka omuntu Mukama gweyalonda niiye yabba omutukuvu muyinga okwekulya, imwe bataane ba Leevi. ⁸ Musa n'akoba Koola nti Muwulire, imwe bataane ba Leevi ⁹ kyabbaire kitono gye muli Katonda wa Isiraeri okubaawula mu kibiina kya Isiraeri, okubasemberya gy'ali; okukolanga okuweererya okw'o mu nyumba ya Mukama, n'o kwemereranga mu maiso g'e kibiina okubaweererya ¹⁰ n'o kusemberya iwe n'a bagande bo bonabona bataane ba Leevi wamu naiwe? era musagira n'o bwakabona? ¹¹ Kyemuviire mukuŋaanira ku Mukama iwe n'o bainawo bonabona na Alooni niiye ani imwe okumwemulugunyirya? ¹² Musa n'a tuma okweta Dasani na Abiraamu, bataane ba Eriyaabu ni bakoba nti ti twiza kwambuka ¹³ kyabbaire kitono iwe okututoola mu nsi ekulukuta n'a mata n'o mubisi gw'e njoki n'o tuniinisya, okutwitira mu idungu, era naye n'o kugwanira ni kikugwanira okwefuula omulangira ku ife? ¹⁴ Era ate totuleetere mu nsi ekulukuta n'a mata n'o mubisi gw'e njoki, so totuwaire busika bwe nimiro n'e nsuku egy'e mizabbibu otaka okutoolamu amaiso abantu abo? ti twiza kwambuka. ¹⁵ Awo Musa n'a sunguwala inu, n'a koba Mukama nti toteekayo mwoyo eri ekyabwe ekiweebwayo ti mbatoolangaku ne ndogoyi eimu, so tinkolanga kubbiibi n'o mumu ku ibo. ¹⁶ Musa n'a koba Koola nti iwe n'e kibiina kyo, kyonakyona mubbe mu maiso ga Mukama, iwe nabo na Alooni, eizo ¹⁷ mwirire buli muntu ekyotereryo kye, mubiteekeku obubaani, muleete mu maiso ga Mukama buli muntu ekyotereryo kye, ebyotereryo bibiri mu ataanu; weena na Alooni, buli muntu ekyotereryo kye. ¹⁸ Ni bairira buli muntu ekyotereryo kye, ni babiteekamu omusyo, ni bateekaku obubaani, ni bemerera ku mulyango gw'e weema ey'o kusisinkanirangamu wamu n'o Musa n'a Alooni. ¹⁹ Koola n'akuŋaanyirya ku ibo ekibiina kyonakyona ku mulyango gw'e weema ey'o kusisinkanirangamu ekitiibwa kya Mukama ni kibonekera ekibiina kyonakyona. ²⁰ Mukama n'a koba Musa n'a Alooni nti ²¹ Mweyawule wakati mu kibiina kino kaisi mbazikirirye mangu ago. ²² Ne bavuunama amaiso gaabwe ni bakoba nti Ai Katonda, Katonda w'e myoyo gya bonabona abalina emibiri, omuntu omumu ng'a yonoonere wasunguwalira ekibiina kyonakyona? ²³ Mukama n'a koba Musa nti ²⁴ Koba ekibiina nti Mugolokoke muve ku weema ya Koola, Dasani, ne Abiraamu. ²⁵ Musa n'a golokoka n'a yaba eri Dasani n'o Abiraamu; abakaire ba Isiraeri ne bamusengererya. ²⁶ N'a koba ekibiina nti mbeegayiriire, muve ku weema egy'a bantu bano ababbiibi, so ti mukoma ku kintu kyonakyona ku byabwe, muleke okuzikirizibwa mu bibbiibi byabwe byonabona. ²⁷ Awo ni bagolokoka okuva ku nyumba ya Koola, Dasani, n'o Abiraamu, enjuyi gyonagyna Dasani na Abiraamu ni bafuluma, ni beemerera ku mulyango gw'e weema gyabwe, na bakali baabwe, n'a bataane baabwe, n'a baana baabwe abatobato. ²⁸ Musa n'a koba nti ku kino kwe mwategeerera nga Mukama yantumire okukola emirimu gino gyonagyona; kubanga tinayemere mu magezi gange nze okugikola. ²⁹ Abantu bano bwe balifa ng'a bantu bonabona bwe bafa buliijo, oba bwe balitoolebwa ng'a bantu bonabona bwe batoolebwa; kale Mukama nga ti yantumire. ³⁰ Naye Mukama bweyakolere ekigambo ekiyaka, eitakali ni lyasama omunwa gwalyo, ni libamira, wamu n'e byabwe byonabyona, ni baika nga balamu mu bwina; kale mwategeera ng'a bantu bano banyoomere Mukama. ³¹ Awo olwatuukire, bwe yabbaire ng'a yaba okumala okutumula ebigambo ebyo byonabyona, eitakali ni lyatika eryabbaire wansi weabwe ³² ensi n'e yasama omunwa gwalyo, n'e bamira, n'e nyumba gyabwe, n’a bantu bonabona aba Koola, n'e bintu byabwe byonabyona ³³ Batyo ibo n'e byabwe byonabyona ni baika nga balamu mu biina ensi n'e basaanikira, ni bazikirira mu kibiina. ³⁴ Isiraeri yonayona ababbaire babeetooloire ni bairuka olw'o kulira kwabwe kubanga bakobere nti ensi ereke okutumira ife. ³⁵ Omusyo ni guva eri Mukama, ni gwokya abasaiza ebibiri mu ataanu abawaireyo obubaani. ³⁶ Mukama n'a koba Musa nti ³⁷ Koba Eriyazaali mutaane wa Alooni kabona, atoole ebyotereryo mu musyo, naiwe ofuke eyo omusyo; kubanga bitukuvu; ³⁸ ebyotereryo bya bayonoonere abayonoonere ku bulamu bwabwe ibo, babifuule esaani egiweesebwa okubiika ku kyoto kubanga babiwaireyo mu maiso ga Mukama, kye bibbeereire ebitukuvu era byabbanga kabonero eri abaana ba Isiraeri. ³⁹ Eriyazaali kabona n'a twala ebyotereryo eby'e bikomo, abo abookyeibwe bye bawaireyo; ni babiweesya okubba ekibiika ku kyoto ⁴⁰ okubba ekiijukiryo eri abaana ba Isiraeri, munaigwanga yenayena, atali we izaire lya Alooni, alekenga okusembera okunyookerya obubaani mu maiso ga Mukama; alekenga okubba nga Koola, era nga bainaye Mukama nga bwe yamukobere n'o mukono gwa Musa. ⁴¹ Naye ku lw'a makeeri ekibiina kyo nakyona eky'a baana ba Isiraeri ni beemulugunyirya Musa na Alooni nga batumula nti Mwaitire abantu ba Mukama. ⁴² Awo olwatuukire, ekibiina bwe kyabbaire kikuŋaaniire ku Musa n'o ku Alooni, ni balingirira eweema ey'o kusisinkanirangamu era, bona, ekireri nga kigibiikireku, ekitiibwa kya Mukama ni kiboneka. ⁴³ Musa n'o Alooni ni baiza mu bweni bw'e weema ey'o kusisinkanirangamu. ⁴⁴ Mukama n'a koba Musa nti ⁴⁵ Mugolokoke muve wakati mu kibiina kino, mbazikirirye mangu ago. Ne bavuunama amaiso gabwe. ⁴⁶ Musa n'akoba Alooni nti Irira ekyokyeryo kyo, otoole omusyo ku kyoto oguteeke omwo, oteekeku obubaani, okitwale mangu eri ekibiina, obatangirire kubanga obusungu bufulumire eri Mukama kawumpuli atanwire. ⁴⁷ Alooni n'a kola nga Musa bwe yatumwire, n'a iruka n'a yaba wakati mu kibiina; era, bona, kawumpuli ng'a tanwire mu bantu. ⁴⁸ N'ayemerera wakati w'a bafu n'a balamu; kawumpuli n'a ziyizibwa. ⁴⁹ N'abo abafiire kawumpuli babbaire mutwaalo gumu mu nkumi ina mu lusanvu, obutateekaku abo abafiire olw'e bigambo bya Koola. ⁵⁰ Alooni n'a irayo eri Musa ku mulyango gw'e wema ey'o kusisinkanirangamu kawumpuli n'a ziyizibwa. Ensuula