¹ Awo, bakabaka bonabona ababbaire emitala wa Yoludaani, mu nsi ey'e nsozi, n'o mu nsenyu, n'o ku itale lyonalyona ery'e nyanza enene Lebanooni gye lusimbire, Abakiiti, n'Abamoli, n'Abakanani, n'Abaperizi n'Abakiivi, Abayebusi, bwe bakiwuliire; ² Kaisi ni bakuŋaanira wamu, okulwanisya Yoswa n'Abaisiraeri, n'o mwoyo gumu. ³ Naye ababbaire mu Gibyoni bwe baawuliire Yoswa bye yakolere ku yeriko ne Ayi, ⁴ ni basala amagezi, ni baaba ne beefuula ng'a babaka, ni batwala ensawo enkaire ku ndogoyi gyabwe, n'a mawu ag'o mwenge amakaire agakanukire agatungiriirwe; ⁵ n'e ngaito enkaire egibotokere mu bigere byabwe, era nga bavaire ebivaalo ebikaire; n’e mere yonayona ey'e ntanda yaabwe ng'e kaliire ng'e kwaite obukuku. ⁶ Ni baiza eri Yoswa mu lusiisira Girugaali, ni bamukoba iye n'a bantu ba Isiraeri nti Tuviire mu nsi wala: kale watyanu mulagaane naife: ⁷ N'a bantu ba Isiraeri ni bakoba Abakiivi nti koizi ewanyu muli wakati w'e nsi yaisu; feena twalagaana tutya naimwe? ⁸ Ni bakoba Yoswa nti tuli baidu bo. Yoswa n'a bakoba nti muli baani? era muva waina? ⁹ Ni bamukoba nti abaidu bo baviire mu nsi wala inu okwiza wano olw'e riina lya Mukama Katonda wo: kubanga twawuliire okwatiikirira kwe, ne byonabyona bye yakoleire mu Misiri, ¹⁰ ne byonabyona bye yakoleire bakabaka ababiri ab'Abamoli, abaali emitala wa Yoludaani, Sikoni kabaka w'e Kesuboni, n'e Ogi kabaka w'e Basani, eyabbaire mu Asutaloosi. ¹¹ N'abakaire baisu ni bonabona abaali mu nsi yaisu ne batukoba nti mutwalire olugendo olwo entanda mu mikono gyanyu mwabe mubasisinkane, mubakobe nti tuli baidu banyu: kale atyanu mulagaane naife. ¹² Emere yaisu eno twagisibiriire entanda yaisu mu nyumba gyaisu ng'e kaali ebuguma ku lunaku lwe twaviireyo okwiza gye muli; naye watyanu, bona, ekaliriire, era ekwaite n'o bukuku: ¹³ n'a mawu gano ag’o mwenge, ge twaizwirye, gabbaire mayaka; era, bona, gakanukirkanukire: n'e bivaalo byaisu bino engaito gyaisu bikairikire olw'o lugendo olunene einu, ¹⁴ Abantu ni batwala ku ntanda gyabwe, ni batabuulya bigambo eri omunwa gwa Mukama. ¹⁵ Yoswa n'a lagaana nabo emirembe, n'a lagaana nabo obutabaita: n’a bakulu b'e kibiina ne babalayirira. ¹⁶ Awo mu naku eisatu, nga bamalire okulagaana nabo, ne bawulira nga baliraanwa baabwe, era nga babbaire wakati waabwe. ¹⁷ Abaana ba Isiraeri ni batambula ne batuuka mu bibuga byabwe ku lunaku olw'o kusatu: Ebibuga byabwe byabbaire Gibyoni, ne Kefira, ne Beerosi, ne Kiriyasuyalimu. ¹⁸ N'a baana ba Isiraeri ni batabakubba, kubanga abakulu b'e kibiina babalayiriire Mukama Katonda wa Isiraeri: N'e kibiina kyonakyona ni kyemulugunyirya abakulu. ¹⁹ Naye abakulu bonabona ni bakoba ekibiina kyonakyona nti twabalayiriire Mukama Katonda wa Isiraeri: kale watyanu tituusobole kubakwataku. ²⁰ Bwe twabakola tutyo, okubaleka nga balamu; obusungu buleke okutubbaaku, olw'e kirayiro kye twabalayiriire. ²¹ Abakulu ni bakoba nti nga balamu: ne babba ababbeeti b'e nku era abasyoomi b'a maizi eri ekibiina kyonakyona; ng'a bakulu bwe babakobere. ²² Yoswa n'abeeta n'a bakoba nti kiki ekyabatubbeyeserye, nga mutumula nti tuli wala na imwe, nga muli mu ife? ²³ Kale atyanu mulaamibwe, so tiwalibula kubba mu imwe abaidu enaku gyonagyona, ababbeeti b'e nku era abasyomii b'a maizi eri enyumba ya Katonda wange. ²⁴ Ne bamwiramu Yoswa ni batumula nti Kubanga abaidu bo bategeezeibwe dala nga Mukama Katonda wo yalagiire Musa omuweererya we okubawa ensi yonayona, n'o kuzikirirya bonabona ababbaire mu nsi mu maiso ganyu; kyetwaviire tutya inu olw'o bulamu bwaisu ku lwanyu, ni tukola tutyo. ²⁵ Ne watyanu, bona, tuli mu mukono gwo: bw'olowooza nga kisa era kituukirivu okutukola, kola otyo. ²⁶ Era atyo bwe yabakolere, n'a bawonya mu mukono gw'a baana ba Isiraeri okubaita. ²⁷ Ku lunaku ludi Yoswa n'a bafuula ababbeeti b'e nku era abasyomi b'a maizi eri ekibiina n'eri ekyoto kya Mukama, ne watyanu, mu kifo kyeyalagiranga.