¹ Mukama n'a koba Yoswa nti totyanga, so totengeranga: twala abantu bonabona abalwani naiwe, ogolokoke oniine ku Ayi: Bona, nkuwaire mu mukono gwo kabaka wa Ayi, n'a bantu be, n'e kibuga kye, n'e nsi ye; ² era olikola Ayi n'o kabaka waamu nga bwe wakolere Yeriko n'o kabaka waamu: naye omunyago gwakyo n'e nte gyakyo mulibyetwalira okubba ebinyage byanyu: muteegere ekibuga enyuma waakyo. ³ Awo Yoswa n'a golokoka, n'a bantu bonabona abalwani, okuniina ku Ayi; Yoswa n'a londa abantu emitwaalo isatu, abazira Ab'a maani, n'abasindika obwire. ⁴ N'a balagira ng'a tumula nti bona, mwateegera ekibuga enyuma w’e kibuga: temukibba wala einu ekibuga naye mwenamwena mweteeketeeke: ⁵ nzena n'a bantu bonabona abali nanze twasemberera ekibuga: awo, bwe baiza okutulumba, ng'o luberyeberye, kaisi ni twiruka mu maiso gaabwe; ⁶ boona ni baiza okutusengererya, okutuusya lwe twabasendasenda okuva mu kibuga ewala; kubanga batumula nti Bairukire mu maiso gaisu ng'o luberyeberye; kyetwaava twiruka mu maiso gaabwe: ⁷ mwena mwagolokoka we muteegeire, ne mukwata ekibuga: kubanga Mukama Katonda wanyu akiwaayo mu mukono gwanyu. ⁸ Awo, bwe mwamala okukwata ekibuga, ni mukyokya omusyo okugoberera ekigambo kya Mukama bwe mwakola: bona, nze mbalagiire. ⁹ Yoswa n'a basindika: ni baaba we bateegeire, ni babba wakati wa Neseri ne Ayi, ku luuyi olw'e bugwaisana olw'e Ayi: naye Yoswa n'a gona obwire obwo mu bantu. ¹⁰ Yoswa n'a wuna amakeeri n'a golokoka; n'a kuŋaanya abantu, n'a niina, iye n'a bakaire ba Isiraeri, mu maiso g'a bantu ni baaba e Ayi. ¹¹ Abantu bonanona, abalwani ababbaire naye, ni baniina ne basembera ni batuuka ekibuga we kibona, ne basimba olusiisira ku luuyi olw'o bukiika obugooda olw'e Ayi: era waaliwo ekiwonvu wakati we ne Ayi. ¹² N'a twala abantu ng'e nkumi itaanu, n'a bateekateeka okuteega wakati we Beseri ne Ayi, ku luuyi olw'e bugwaisana olw'e kibuga. ¹³ Batyo bwe baateekereteekere abantu, eigye lyonalyona eryabbaire ku bukiika obugooda obw'e kibuga, era n'a bateegi baabwe ababbaire ebugwaisana obw'e kibuga; Yoswa n'a yaba obwire obwo wakati mu kiwonvu. ¹⁴ Awo olwatuukire kabaka we Ayi bwe yakiboine, ni banguwa ne bagolokoka, amakeeri, n'a bantu ab'o mu kibuga ni baiza ku Baisiraeri okulwana, iye n'a bantu be bonabona, ku kiseera ekiragiibwe, mu maiso ga Alaba; naye teyamaite nga waliwo abamutegere enyuma w'e kibuga. ¹⁵ Yoswa n'Abaisiraeri bonabona ni beefuula ng'ababbingiibwe mu maiso gabwe, ni bairukira mu ngira ey'e idungu. ¹⁶ N'a bantu bonabona ababbaire mu kibuga ni bakuŋaanyizibwa okubasengererya: ni babbinga Yoswa, ni basendebwasendebwa okuva mu kibuga ewala. ¹⁷ Ni mutasigala muntu mu Ayi waire mu Beseri, ataizire kubbinga Isiraeri: ni baleka ekibuga nga kiguliibwewo ne babbinga Isiraeri. ¹⁸ Mukama n'a koba Yoswa nti Galula omuwunda oguli mu mukono gwo ku Ayi; kubanga nakikuwa mu mukono gwo. Yoswa n'a galula omuwunda ogwabbaire mu mukono gwe eri ekibuga. ¹⁹ N'abategi ni bagolokoka mangu mu kifo kyabwe, ne bairuka mbiro bwe yamalire okugolola omukono, ni bayingira mu kibuga, ni bakimenya; ni banguwa ni bookya ekibuga omusyo. ²⁰ Ab'e Ayi bwe baboine enyuma waabwe, ni bamoga, era, bona, omwoka ogw'e kibuga nga gunyookera mu igulu, ni batabba na maani g'o kwiruka okwaba edi waire okwira eno: n'a bantu ababbaire bairukiire mu idungu ni babakyukiraku abababbingire. ²¹ Yoswa n'Abaisiraeri bonabona bwe baboine ng'a bateegi bamenyere ekibuga, n'o mwoka ogw'e kibuga nga gunyooka, awo ne bakyuka ate, ni baita ab'e Ayi. ²² N'a bandi bainaabwe ni bava mu kibuga okubalumba; ni babba wakati mu Baisiraeri, abandi eruuyi n'a bandi eruuyi: ni babakubba, obutaganya muntu kusigalawo waire okwiruka. ²³ N'o kabaka we Ayi ni bamukwata nga mulamu, ni bamuleeta eri Yoswa. ²⁴ Awo Abaisiraeri bwe bamalire okwitira dala ababbaire mu Ayi bonabona mu lusenyu, mu idungu lye bababbingiiremu, bonabona ni bagwa n'o bwogi bw'e kitala ne bawaawo, Abaisiraeri bonabona kaisi ne bairawo e Ayi, ni bakikubba n'o bwogi bw'e kitala. ²⁵ Awo bonabona abaitiibwe ku lunaku olwo, abasaiza n'a bakali, babbaire mutwalo mu nkumi ibiri, niibo bantu bonabona ababbaire mu Ayi. ²⁶ Kubanga Yoswa teyairirye mukono gwe, gwe yagaluliire omuwunda, okutuusya lwe yamalire okubazikirirya dala ababbaire mu Ayi bonabona. ²⁷ Wabula ente n'o munyago ogw'e kibuga ekyo Abaisiraeri ni babyetwalira, okubba ebinyage byabwe, ng'e kigambo kya Mukama kye yalagiire Yoswa. ²⁸ Yoswa n'a yokya Ayi atyo, n'a kifuula ekifunvu emirembe gyonagyona, era ekyazikire, ne watyanu. ²⁹ No kabaka we Ayi n'a muwanika ku musaale okutuusya olwe igulo: eisana bwe ryagwire Yoswa n'a lagira, ni baiza omulambo gwe ku musaale, ne bagusuula ku muzigo: ku wankaaki ow'e kibuga, ni bagutuumaku entuumu enene ey'a mabbaale, ne atyanu. ³⁰ Awo Yoswa kaisi azimbira Mukama ekyoto, Katonda wa Isiraeri, ku nsulo Ebali, ³¹ nga Musa omuweererya wa Mukama bwe yabalagiire abaana ba Isiraeri; nga bwe kyawandiikiibwa mu kitabo eky'a mateeka ga Musa, ekyoto eky'a mabbaale amalamba, omuntu g'a tateekereku kyoma kyonakyona: ni bakiweeraku ebiweebwayo ebyokyebwa eri Mukama ne bamuleetera ebiweebwayo olw'e mirembe. ³² N'awandiika awo ku mabbaale amateeka ga Musa, ge yawandiikire, mu maiso g'a baana ba Isiraeri. ³³ n'Abaisiraeri bonabona, n'a bakaire baabwe, n'a baami, n’a balamuzi baabwe, ni bemerera eruuyi n'e ruuyi egy'e sanduuku mu maiso ga bakabona Abaleevi, abasitwiire esanduuku ey'e ndagaanu lya Mukama, ti nzaalwa bonka, naye n'a banaigwanga ekitundu kyabwe ikumi olusozi Gerizimu gye lusimba, n’e kitundu kyabwe ekindi olusozi Ebali gye lusimba; nga Musa omuweererya wa Mukama bwe yalagiire, basookenga okusabira omukisa abantu ba Isiraeri. ³⁴ Oluvanyuma n'a soma ebigambo byonabyona eby'a mateeka, omukisa n'okulaamira, nga byonabyona bwe biri ebyawandiikiibwe mu kitabo eky'a mateeka. ³⁵ Tewabbaire kigambo mu byonabyona Musa bye yalagiire, Yoswa ky'a tasomere mu maiso ag'e ikuŋaaniro lyonalyona erya Isiraeri, n'abakali, n’a baana abatobato, n'a banaigwanga abaatambulanga mu ibo.