¹ Awo enaku nyingi bwe gyabitire Mukama bwe yawumwirye Abaisiraeri mu balabe babwe bonabona abaabeetooloire, era Yoswa ng'a kairikire ng'a malire emyaka mingi; ² Yoswa kaisi n'a beeta Abaisiraeri bonabona, abakaire baabwe n'e mitwe gyabwe, n'a balamuzi babwe n'a baami babwe, n'a bakoba nti nze nkairikire, malire emyaka mingi: ³ mweena mwaboine byonabyona Mukama Katonda wanyu bye yabakoleire ku mawanga gano gonagona ku lwanyu; kubanga Mukama Katonda wanyu oyo niiye yabalwaniire. ⁴ Bona, mbagabiire amawanga gano agasigairewo, okubba obusika obw'e bika byanyu, okuva ku Yoludaani, awamu n'a mawanga gonagona ge nazikiriirye, okutuuka ku nyanza enene ku luuyi olw'e bugwaisana. ⁵ Ne Mukama Katonda wanyu niiye alibasindika emberi yanyu n'a babbinga mu maiso ganyu; mweena mulirya ensi yabwe, nga Mukama Katonda wanyu bwe yabakobere. ⁶ Kale mugume inu emyoyo okwekuumanga n'o kukolanga byonabyona ebyawandiikiibwe mu kitabo eky'a mateeka ga Musa, muleke okugakyamirangamu ku mukono omulyo waire omugooda; ⁷ muleke okuyingiranga mu mawanga gano, agasigaire mu imwe; waire okutumulanga, ku liina lya bakatonda baabwe, waire okubalayilyanga, waire okubaweereryanga, waire okubafukaamiriranga: ⁸ naye mwegaitenga ne Mukama Katonda wanyu, nga bwe mwakolanga okutuusya watyanu: ⁹ Kubanga Mukama yabbingire mu maiso ganyu amawanga amanene ag'a maani: naye imwe, wabula muntu eyayemereire mu maiso ganyu okutuusya watyanu. ¹⁰ Munanyu mumu yabbinganga lukumi: kubanga Mukama Katonda wanyu, oyo niiye abalwaniriira, nga bwe yabakobere. ¹¹ Kale mwekuumenga mwenka mutakenga Mukama Katonda wanyu. ¹² Naye oba nga mwairanga enyuma n'a katono, ni mwegaitanga n'a mawanga gano agasigairewo, niigo gano agaasigaire mu imwe, ni mufumbirwagananga nabo, ni muyingiranga gye bali, boona (ni bayingiranga) gye muli: ¹³ mutegeerere dala nga Mukama Katonda wanyu taabbingenga ate mawanga gano mu maiso ganyu; naye gabbanga mutego n'e kyambika gye muli n'o luga ku mpete gyanyu n'a mawa mu maiso ganyu, okutuuka lwe mulizikirira okuva mu nsi eno ensa Mukama Katonda wanyu gye yabawaire. ¹⁴ Era, bona, atyanu oyaba olugendo ebintu byonabyona gye byaba: mweena mu maite mu myoyo gyanyu gyonagyona n'o mu meeme gyanyu gyonagyona, nga wabula kigambo kimu ekitatuukire mu bisa byonabyona Mukama Katonda wanyu bye yabatumwireku; byonabyona bibatuukiire, Wabula ne kimu mu ebyo kitatuukire. ¹⁵ Awo olulituuka, ng'e bisa byonabyona bwe byabaiziire Mukama Katonda wanyu bye yabakobere, atyo Mukama yabaleeteranga ebibbiibi byonabyona, okutuuka lw'alibazikirirya okuva mu nsi eno ensa Mukama Katonda wanyu gye yabawaire. ¹⁶ Bwe mwasobyanga endagaanu ya Mukama Katonda wanyu, gye yabalagiire, ni mwaba ni muweereeya bakatonda abandi, ni mu bafukaamirira; obusungu bwa Mukama kaisi ne bubuubuuka ku imwe ni muzikirira mangu okuva mu nsi ensa gye yabawaire.