¹ Awo Yoswa n'a yeta Abalewubeeni, n'Abagaadi, n'e kitundu eky'e kika kya Manase, ² n'a bakoba nti mukwaite byonabona Musa omuweererya wa Mukama bye yabalagiire, era muwuliire eidoboozi lyange mu byonabyona bye nabalagiire: ³ timulekanga bagande banyu enaku egyo enyingi okutuuka watyanu, naye mukwaite ekiragiro eky'e iteeka lya Mukama Katonda wanyu. ⁴ Ne atyanu Mukama Katonda wanyu awumwirye bagande banyu, nga bwe yabakobere: kale atyanu mukyuke muyingire mu weema gyanyu (mwabe) mu nsi ey'o butaka bwanyu, Musa omuweererya wa Mukama gye yabawaire emitala wa Yoludaani. ⁵ Naye mwekuumenga inu okukwatanga ekiragiro n'e iteeka, Musa omuweererya wa Mukama lye yabalagiire, okutakanga Mukama Katonda wanyu, n'o kutambuliranga mu mangira ge gonagona, n'o kukwatanga amateeka ge, n'o kwegaitanga naye, n'o kumuweereryanga n'o mwoyo gwanyu gwonagwona era n'e meeme yanyu yonayona. ⁶ Awo Yoswa n'a basabira omukisa, n'a basindika: ni bayingira mu weema gyabwe. ⁷ Naye ekitundu ekimu eky'e kika kya Manase Musa yakiwa (obusika) mu Basani: naye ekitundu eky'o kubiri Yoswa n'a kiwa mu bagande baabwe emitala wa Yoludaani ku luuyi olw'e bugwaisana: Era Yoswa bwe yabasindikire mu weema gyabwe, n'a basabira omukisa, ⁸ n'a bakoba nti Mwirewo n'e bintu bingi mu weema gyanyu, n'e nte nyingi inu, n'e feeza, n'e zaabu, n’e bikomo, n'e byoma, n'e ngoye nyingi inu; mugabane omunyago ogw'a balabe banyu na bagande banyu. ⁹ N'a baana ba Lewubeeni n'a baana ba Gaadi n'e kitundu eky'e kika kya Manase ni bairayo nga bava mu baana ba Isiraeri mu Siiro, ekiri mu nsi y'e Kanani, okwaba mu nsi ya Gireyaadi, mu nsi ey'o butaka bwabwe, gye baliire, nga Mukama bwe yalagiire mu mukono gwa Musa. ¹⁰ Bwe batuukire mu nsi eriraine Yoludaani, eri mu nsi y'e Kanani, abaana ba Lewubeeni n'a baana ba Gaadi n'e kitundu eky'e kika kya Manase ni bazimba awo ekyoto ku Yoludaani, ekyoto ekinene ekiringirirwa. ¹¹ N'a baana ba Isiraeri ni bawulira nga kitumulwa nti Bona, abaana ba Lewubeeni n'a baana ba Gaadi n'e kitundu eky'e kika kya Manase bazimbire ekyoto ku muyegoyego ogw'e nsi y'e Kanani, mu nsi eriraine Yoludaani, ku luuyi olw'a baana ba Isiraeri. ¹² Abaana ba Isiraeri bwe bakiwuliire, ekibiina kyonakyona eky'a baana ba Isiraeri ni bakuŋaanira mu Siiro, okuniina okulwana nabo: ¹³ Abaana ba Isiraeri ni batuma Finekaasi omwana wa Eriyazaali kabona eri abaana ba Lewubeeni n'a baana ba Gaadi n'e kitundu eky'e kika kya Manase, mu nsi ye Gireyaadi; ¹⁴ era awamu naye abakulu ikumi, buli kika kya Isiraeri omukulu mumu ow'e nyumba ya baitawabwe; buli mumu yabbaire mutwe gw'e nyumba gya baitawabwe mu nkumi gya Isiraeri. ¹⁵ Ni baiza eri abaana ba Lewubeeni n'a baana ba Gaadi n'e kitundu eky'e kika kya Manase, mu nsi ya Gireyaadi, ne babakoba nti ¹⁶ Ekibiina kya Mukama kyonakyona bwe kitumula kiti nti kyonoono ki kino kye mwayonoonere eri Katonda wa Isiraeri, okukyama watyanu obutasengererya Mukama kubanga mwezimbiire ekyoto, okujeemera Mukama wstyanu? ¹⁷ Obubbiibi bwa Peoli tibwatumalire, bwe tuterongoosye okutuusya watyanu, waire nga kawumpuli yaizire ku kibiina kya Mukama, ¹⁸ imwe okuwalirizibwa okukyama watyanu obutagoberera Mukama? era kubanga mujeemera Mukama watyanu, amakeeri kaisi na asunguwalira ekibiina kyonakyona ekya Isiraeri. ¹⁹ Naye era ensi ey'o butaka bwanyu oba nga si nongoofu, kale musomoke muyingire mu nsi ey'o butaka bwa Mukama omuli eweema ya Mukama, mulye mu ife: naye timujeemeranga Mukama, feena timutujeemeranga nga muzimba ekyoto wabula ekyoto kya Mukama Katonda waisu. ²⁰ Akani omwana wa Zeera tiyayonoonere kyonoono mu kyagisisiibwe, obusungu ni bugwa ku kibiina kyonakyona ekya Isiraeri? omuntu odi n'atazikirira yenka mu bubbiibi bwe. ²¹ Awo abaana ba Lewubeeni n'a baana ba Gaadi n'e kitundu eky'ekika kya Manase ni bairamu ni bakoba emitwe gy'e nkumi gya Isiraeri ²² nti Mukama, Katonda wa bakatonda, niiye amaite, era naye Isiraeri alimanya; singa mu kujeema oba mu kwonoona eri Mukama, (totulokola ife atyanu,) ²³ mwe twazimbiire ekyoto okukyama obutasengererya Mukama; oba singa (twakizimbire) okukiweeraku ekiweebwayo ekyokyebwa oba ekiweebwayo eky'o bwita oba okukiweeraku sadaaka egy'e biweebwayo olw'e mirembe Mukama niiye mwene akivunaane; ²⁴ era singa titwakolere tutyo olw'o kwegendererya, nga tulowooza, nga tutumula nti mu biseera ebyaba okwiza abaana banyu balisobola okukoba abaana baisu nti imwe mulina ki ne Mukama, Katonda wa Isiraeri? ²⁵ kubanga Mukama yafiire Yoludaani ensalo wakati mu ife naimwe, imwe abaana ba Lewubeeni n'a baana ba Gaadi; mubula mugabo mu Mukama: batyo abaana banyu bandirekeserye abaana baisu okutya Mukama. ²⁶ Kyetwaviire tutumula nti Kale tweteeketeeke okwezimbira ekyoto, ti lwe byokye, so ti lwe sadaaka: ²⁷ naye kiribba mujulizi wakati mu ife na imwe, no mu mirembe gyaisu egiritwiriirira, kaisi tuweererye Mukama mu maiso ge n'e byokye byaisu n'e sadaaka gyaisu n'e byaisu ebiweebwayo olw'e mirembe; abaana banyu baleke okukoba abaana baisu mu biseera ebyaba okwiza nti mubula mugabo mu Mukama. ²⁸ Kyetwaviire tutumula nti Bwe balikoba batyo ife oba emirembe gyaisu mu biseera ebyaba okwiza, kaisi ne tutumula nti bona ekifaananyi eky'e kyoto kya Mukama, bazeiza baisu kye baakolere, ti lwe byokye, so ti lwa sadaaka; naye iye mujuliziwakati mu ife na imwe. ²⁹ Kikafuuwe ife okujeemera Mukama, n'o kukyama watyanu obutasengererya Mukama, okuzimba ekyoto olw'e biweebwayo ebyokyebwa, (oba) ebiweebwayo eby'o bwita, oba olwe sadaaka, wabula ekyoto kya Mukama Katonda waisu ekiri mu maiso g'e weema ye. ³⁰ Awo Finekaasi kabona n'a bakulu b'e kibiina, niigyo emitwe gy'e nkumi gya Isiraeri abaali awamu naye, bwe bawuliire ebigambo abaana ba Lewubeeni n'abbaana ba Gaadi n'a baana ba Manase bye batumula, ni basanyuka inu. ³¹ N'o Finekaasi omwana wa Eriyazaali kabona n'a koba abaana ba Lewubeeni n'a baana ba Gaadi n'a baana ba Manase nti watyanu timaite nga Mukama ali wakati mu ife kubanga temwayonoonere kyonoono ekyo eri Mukama: atyanu mubawonyerye abaana ba Isiraeri mu mukono gwa Mukama. ³² Finekaasi omwana wa Eriyazaali kabona, n'a bakulu, ni bairawo okuva eri abaana ba Lewubeeni n’a baana ba Gaadi, mu nsi ya Gireyaadi, ni baiza mu nsi ye Kanani, eri abaana ba Isiraeri, ni babairirya ebigambo. ³³ Ebigambo ni bisanyusya abaana ba Isiraeri; abaana ba Isiraeri ni batendereza Katonda, ni batatumula ate bigambo byo kuniina okubalwanisya, okuzikirirya ensi abaana ba Lewubeeni n'a baana ba Gaadi mwe babbaire. ³⁴ Abaana ba Lewubeeni n'a baana ba Gaadi ni beeta ekyoto Edi: nti niiye mujulizi wakati mu ife nga Mukama niiye Katonda.