¹ Yoswa n'a kuŋaanyirya ebika byonabyona ebya Isiraeri mu Sekemu, n'a yeta abakaire ba Isiraeri n'e mitwe gyabwe n'a balamuli babwe, n'a baami babwe; ni beeraga mu maiso ga Katonda. ² Yoswa n'a koba abantu bonabona nti Mukama, Katonda wa Isiraeri, bw'atumula ati nti bazeiza banyu babba mu biseera eby'eira emitala w'o mwiga, Teera, Itaaye wa Ibulayimu era itaaye wa Nakoli: na baweererya bakatonda abandi. ³ Ni ntwala zeiza wanyu Ibulayimu n'o mutoola emitala w'Omwiga, ni muleeta mu nsi yonayona eya Kanani, ni ntumula eizaire lye, ni muwa Isaaka. ⁴ Ni mpa Isaaka Yakobo n'e Esawu: ni mpa Esawu olusozi Seyiri, okululya; Yakobo n’a baana be ni baserengeta mu Misiri. Ni ntuma Musa n'a Alooni, ni mbonyaabonya Misiri, ng'ebyo bwe byabbaire bye nakolere wakati waayo, oluvanyuma ni mbatoolamu. ⁵ Ni ntuma Musa n'a Alooni, ni mbonyaabonya Misiri, ng'ebyo bwe byabbaire bye nakolere wakati waayo: oluvanyuma ni mbatoolamu. ⁶ Na Bazeiza banyu ni mbatoola mu Misiri: ni mutuuka ku nyanza; n'Abamisiri ni basengererya Bazeiza banyu n'a magaali n'a bebagaire embalaasi ku nyanza emyofu. ⁷ Bwe bamukoowoire Mukama, n'a teekawo endikirirya wakati wanyu n'Abamisiri, n'a baleetaku enyanza, n’a basaanikira; n'a maiso ganyu gaboine bye nakolere mu Misiri: naimwe ni mumala enaku nyingi mu idungu. ⁸ Ni mbaleeta mu nsi ey'Abamoli, ababbaire emitala wa Yoludaani; ni balwana na imwe: ni mbawa mu mukono gwanyu, n'e nsi yanyu ni mugirya; ni mbazikirirya mu maiso ganyu: ⁹ Awo Balaki omwana wa Zipoli, kabaka wa Moabu, n'a golokoka n'a lwana n'o Isiraeri; n'a tuma n’a yeta Balamu omwana wa Byoli okubalaama: ¹⁰ naye ne ŋaana okuwulira Balamu; kyeyaviire abasabira omukisa ate: Ntyo ni mbawonya mu mukono gwe. ¹¹ Ni musomoka Yoludaani, ni mutuuka ku Yeriko: n'ab'e Yeriko ni balwana naimwe, Omwamoli, n'Omuperizi, n'Omukanani, n'Omukiiti, n'Omugirugaasi, n'Omukiivi, n'Omuyebusi; ni mbawa mu mukono gwanyu. ¹² Ne ntuma eirumba mu maiso ganyu, ni ribabbinga mu maiso ganyu bakabaka bombiri ab'Abamoli; ti na kitala kyo waire omutego gwo. ¹³ Ni mbawa ensi gy'otakoleire mirimu, n'e bibuga bye mutaazimbire, ni mubibbaamu; ensuku egy'e mizabbibu n'e gy'e mizeyituuni gye mutasimbire gye mulyaku. ¹⁴ Kale atyanu mutyenga Mukama, mumuweereryanga mu mazima awabula bukuusa: era mutooleewo bakatonda bazeiza banyu be baaweereryanga emitala w'Omwiga, n'o mu Misiri; muweereryenga Mukama. ¹⁵ Era oba nga mulowooza nga kibbiibi okuweereryanga Mukama, mulonde watyanu gwe mwaweereryanga; oba bakatonda babazeiza banyu ababbaire emitala w'Omwiga be baweereryanga, oba bakatonda ab'Abamoli, beene nsi mwe muli: naye nze n'e nyumba yange, ife twaweereryanga Mukama. ¹⁶ Abantu ne bairamu ni bakoba nti kikafuuwe ife okuleka Mukama okuweereryanga bakatonda abandi; ¹⁷ kubanga Mukama Katonda waisu, oyo niiye yatuniinisirye ife n'a bazeiza baisu okututoola mu nsi ey'e Misiri, mu nyumba ey'o bwidu, era niiye y'a kolere obubonero budi obunene mu maiso gaisu, n'atukuuma mu ngira yonayona gye twabitiremu, n'o mu mawanga gonagona ge twabitangamu wakati: ¹⁸ Mukama n'abbingamu amawanga gonagona mu maiso gaisu, Abamoli ababbaire mu nsi: era naife kyetwaviire tuweererya Mukama; kubanga niiye Katonda waisu. ¹⁹ Yoswa n'a koba abantu nti ti musobola kuweereryanga Mukama; kubanga niiye Katonda omutuukuvu; niiye Katonda ow'e iyali; taasonyiwenga kwonoona kwanyu waire ebibbiibi byanyu. ²⁰ Oba nga mwalekanga Mukama, ni muweereryanga bakatonda abayaaka, kaisi n'a kyuka n'a bakola okubbiibi, n'abazikirirya, ng'a malire okubakola okusa. ²¹ Abantu ni bakoba Yoswa nti Bbe, naye twaweereryanga Mukama. ²² Yoswa n'a koba abantu nti muli bajulizi banyu mwenka nga mulondere Mukama okumuweereryanga. Ni batumula nti tuli bajulizi. ²³ Kale atyanu mutoolewo bakatonda abayaka abali mu imwe, mukyuse omwoyo gwanyu eri Mukama Katonda wa Isiraeri. ²⁴ Abantu ni bakoba Yoswa nti Mukama Katonda waisu twamuweereryanga, n’e idoboozi lye twaliwuliranga. ²⁵ Atyo Yoswa n'a lagaana endagaanu n'a bantu ku lunaku olwo, n'a bateekera eiteeka n'e kiragiro mu Sekemu. ²⁶ Yoswa n'a wandiika ebigambo ebyo mu kitabo eky'amateeka ga Katonda; n'atwala eibbaale einene, n'a lisimba awo wansi w'o mwera ogwabbaire ku kifo ekitukuvu ekya Mukama. ²⁷ Yoswa n'a koba abantu bonabona nti bona, eibbaale lino lyabbanga mujulizi gye tuli; kubanga liwuliire ebigambo byonabyona ebya Mukama by'atukobere: kyeryavanga libba mujulizi gye tuli, muleke okwegaana Katonda wanyu. ²⁸ Awo Yoswa n'aseebula abantu, buli muntu ayabe mu butaka bwe. ²⁹ Awo oluvanyuma lw'ebyo Yoswa omwana wa Nuni, omuweererya wa Mukama, kaisi n'afa, ng'a malire emyaka kikumi na ikumi. ³⁰ Ne bamuziika mu nsalo ey'o butaka bwo mu timunasusera, ekiri mu nsi ey'e nsozi eya Efulayimu, ku luuyi olw'o bukiika obugooda olw'o lusozi Gaasi. ³¹ Abaisiraeri ne baweererya Mukama enaku gyonagyona egya Yoswa, n'e naku gyonagyona egy'a bakaire abaasigairewo Yoswa ng'a malire okufa, era abamaite emirimu gyonagyona egya Mukama, gye yakolere Isiraeri. ³² N'a magumba ga Yusufu, abaana ba Isiraeri ge batoire mu Misiri ni baiza nago, ne bagaziika mu Sekemu, mu kitundu eky'e nsi Yakobo kye yaguliire eri bataane ba Kamoli itaaye wa Sekemu ebitundu ebye feeza kikumi: ni gabba obusika obw'a baana ba Yusufu. ³³ Eriyazaali omwana wa Alooni n'afa; ne bamuziika ku lusozi lwa Finekaasi omwana we, lwe yaweweibwe mu nsi ey'e nsozi eya Efulayimu.