¹ Awo, Yabini kabaka w'e Kazoli bwe yakiwuliire; n'alingirira Yobabu kabaka w’e Madoni, n'o kabaka w’e Simuloni, n'o kabaka w’e Akusafu ² n'o bakabaka abaali ku luuyi olw'o bukiika obugooda, mu nsi ey'e nsozi, n'o mu Alaba ku luuyi olw'o bukiika obulyo olw'e Kinerosi, n'o mu nsenyu, n'o mu nsozi egy'e Doli ku luuyi olw'e bugwaisana, ³ eri Omukanani ku buvaisana n'o ku bugwaisana; n'eri Omwamoli, n'eri Omukiiti, n'eri Omuperizi; n'eri Omuyebusi mu nsi ey'e nsozi; n’eri Omukiivi Kerumooni gye lusimbire mu nsi ey'e Mizupa. ⁴ Ni baiza, Ibo n'e igye lyabwe lyonalyona awamu nabo; abantu bangi, era ng'o musenyu oguli ku itale ly'e nyanza bwe guli omungi, n'e mbalaasi n'a magaali mangi inu. ⁵ Awo, bakabaka abo bonabona ne bakuŋaana; ni baiza ne basimba olusiisira awamu ku maizi ag'e Meromu, okulwana n'e Isiraeri. ⁶ Mukama n'a koba Yoswa nti totya olw'abo: kubanga eizo nga atyanu ndibawaayo bonabona nga baitiibwe mu maiso ga Isiraeri: embalaasi gyabwe oligitema enteega, n'a magaali gaabwe oligookya omusyo. ⁷ Awo Yoswa n'aiza, n'a balwani bonabona awamu naye, ni babalumba ku maizi ag'e Meromu nga tebamaite, ne babagwaku. ⁸ Mukama n'a bawaayo mu mukono gwa Isiraeri, ni babakubba, ni bababbinga okutuuka ku Sidoni ekinene, n'o ku Misurefosumayimu, n'o ku kiwonvu Mizupe ku buvaisana; ni babakubba obutasigalyaku n'o mumu. ⁹ Yoswa n'a bakola nga Mukama bwe yamulagiire: n'a gitema enteega embalaasi gyabwe, n'a yokya omusyo amagaali gaabwe. ¹⁰ Yoswa n'a ira enyuma mu biseera ebyo, n'a menya Kazoli, n'o kabaka waamu n'amwita n'e kitala; kubanga Kazoli eira lidi niikyo kyabbaire ekibuga ekikulu eky'o bwakabaka obwo bwonabwona. ¹¹ N'e myoyo gyonagyona egyabbairemu ne bagiita n'o bwogi bw'e kitala, ni bagizikiririrya dala: tewaasigairewo aweera omwoka: ne Kazoli n'a kyokya omusyo. ¹² N'e bibuga byonabyona ebya bakabaka babbaire, n'a bakabaka baamu bonabona, Yoswa n'a bamenya n'a baita n'o bwogi bw'e kitala, n'a bazikiririrya dala nga Musa omuweererya wa Mukama bwe yalagiire. ¹³ Naye ebibuga ebyayemereire ku bifunvu byabyo, Abaisiraeri ni batayokyaku n'e kimu, wabula Kazoli kyonka; ekyo Yoswa n'a kyokya. ¹⁴ N'o munyago gwonagwona ogw'e bibuga ebyo n'ente, abaana ba Isiraeri ne babyetwalira okubba ebinyage byabwe; naye buli muntu ne bamwita n'obwogi bw'ekitala, ne babazikirirya; ne batasigalyaku muntu aweera omwoka. ¹⁵ Nga Mukama bwe yalagiire Musa omuweererya we, Musa bwe yalagiire atyo Yoswa: n'o Yoswa bwe yakolere atyo; teyalekere kintu obutakikola mu byonabyona Mukama bye yalagiire Musa. ¹⁶ Atyo Yoswa bwe yatwaire ensi eyo yonayona ensi ey'e nsozi, n'e y'o bukiika obulyo yonayona, n'e nsi yonayona eya Goseni, n'e nsi ey'e nsenyu, ne Alaba, n'e nsi ey'e nsozi eya Isiraeri n'e nsi ey'e nsenyu yaayo; ¹⁷ okuva ku lusozi Kalaki, oluniina e Seyiri, okutuuka ku Baalugadi mu kiwonvu kya Lebanooni ekiri wansi w'o lusozi Kerumooni: n'a bakabaka baayo bonabona n'a bawamba, n'abasumita, n’abaita. ¹⁸ Yoswa n'alwawo ng'a lwana na bakabaka abo bonabona. ¹⁹ Wabula kibuga ekyalagaine emirembe n'a baana ba Isiraeri, wabula Abakiivi ababbaire mu Gibyoni: babimenyere byonabyona mu kulwana. ²⁰ Kubanga kyaviire eri Mukama okukakanyalya emyoyo gyabwe, okwiza okulwana n'e Isiraeri, Kaisi abazikiririrye dala, baleke okubona ekisa, naye abazikirirye, nga Mukama bwe yalagiire Musa. ²¹ Yoswa n'a iza mu biseera ebyo, n'a malamu Abanaki mu nsi ey'e nsozi, mu Kebbulooni, mu Debiri, mu Anabi, n'o mu nsi yonayona ey'e nsozi eya Yuda, n'o mu nsi yonayona ey'e nsozi eya Isiraeri: Yoswa n'a bazikiririrya dala, wamu n'e bibuga byabwe. ²² Tewabbaire Banaki abaasigairewo mu nsi ey'a baana ba Isiraeri: wabula mu Gaza, mu Gaasi, n'o mu Asudodi, niimwo mwasigaire abamu. ²³ Yoswa atyo bwe yaliire ensi yonayona; nga byonabyona Mukama bye yakobere Musa: Yoswa n'a giwa Isiraeri okubba obusika nga bwe bayawuliibwe mu bika byabwe. N'e nsi n'e wumula okulwana.