¹ Awo Birudaadi Omusuki n'a iramu n'atumula nti ² Olituukya waina okutumula ebyo? Era ebigambo eby'omu munwa gwo birituukya waina okubba ng'e mpewo ey'a maani? ³ Katonda anyoola omusango? Oba Omuyinza w'e bintu byonabyona anyoola ensonga? ⁴ Abaana bo oba nga baamwonoonere, iye n'a bagabula mu mukono gw'o kusobya kwabwe: ⁵ Bwewaikirirya okusagirira dala Katonda, ni weegayirira Omuyinza w'e bintu byonabyona; ⁶ Singa obbaire mulongoofu era wa mazima; tiyandiremere okukuzuukukira, N'awa omukisa ekifo omubba obutuukirivu bwo. ⁷ Okusooka kwo waire nga kwabbaire kutono, naye enkomerero yo ey'o luvanyuma yandyeyongeire inu. ⁸ Kubanga buulya ab'e mirembe egyasookere, nkwegayiriire, okeneenye ebyo bazeiza babwe bye basagiriire dala: ⁹ (Kubanga tuli beizo, so tubulaku kye tumaite, Kubanga enaku gyaisu gye tumala ku nsi kiwolyo:) ¹⁰ Ibo tibalikwegeresya ne bakukobera, Ni batumula ebigambo ebiva mu mwoyo gwabwe? ¹¹ Ekitoogo kisobola okukula awabula bitosi? Olulago lusobola okumera awabula maizi? ¹² Nga lukaali lubisi nga lukaali kutemebwa, luwotoka okusooka omwido ogondi gwonagwona. ¹³ Gatyo bwe gabba amangira ga bonabona abeerabira Katonda; N'e isuubi ly'oyo atatya Katonda lyagotanga: ¹⁴ Obwesige bwe bwakutukanga, n'ekyo kye yeesiga ngoye gya nawumbuli. ¹⁵ Yesigikanga ku nyumba ye, naye teeyemererenga: Yaginywererangaku, naye teegumenga. ¹⁶ Ayerera mu maiso g'e isana, n'amalagala ge galanda okubuna olusuku lwe. ¹⁷ Emizi gye gikwata ku kifunvu, abona ekifo eky'a mabbaale. ¹⁸ Bweyazikirizibwanga okuva mu kifo kye, Awo kyamwegaananga nga kitumula nti tinkubonangaku. ¹⁹ Bona, eryo niilyo eisanyu ery'engira ye, n'abandi baliroka okuva mu itakali. ²⁰ Bona, Katonda taasuulenga muntu eyatuukiriire. So taawanirirenga abo abakola obubbiibi. ²¹ Bw'alimala alizulya omunwa gwo enseko, n’o munwa gwo okutumulira waigulu. ²² Abakukyawa balivaala ensoni; n’e weema ey’a babbiibi teribbaawo ate.