¹ Abantu babula lutalo ku nsi? N'e naku gyabwe tigifaanana enaku gy'oyo akolera empeera? ² Ng'o mwidu ayaayaanira inu ekiwolyo, Era ng'oyo akolera empeera bw'a suubira empeera ye: ³ Ntyo nzena bwe malibwe emyezi egibulaku kye gigasa, N'e biseera eby'o bwire ebinkooya byanteekeirwewo. ⁴ Bwe ngalamira ni ntumula nti Nayimuka di? naye obwire bulwawo; Era ngona nikubbiirwa okukyesya obwire. ⁵ Omubiri gwange guvaire emaginu n'a matiinde; oluwu lwange luziba ne lutulika ate. ⁶ Enaku gyange giwulukuka mangu okusinga obutanta bw'o muluki w'engoye, Era giwaawo awabula isuubi. ⁷ Woowe, ijukira ng'o bulamu bwange mpewo: Amaiso gange tigakaali gabona ate bisa. ⁸ Eriiso ly'oyo ambona tirikaali limbona ate: Amaiso go galibba ku ninze, naye nga mbulawo. ⁹ Ekireri nga bwe kiwaawo ne kigota, Atyo n'oyo aika mu magombe taaniinenga kuvaayo. ¹⁰ Tairenga ate mu nyumba ye, So n'ekifo kye tekyamumanyenga ate. ¹¹ Kyenaviire ndeka okuziyiza omunwa gwange; natumula obubalagali bw'o mwoyo gwange; neemulugunyisya obwinike bw'e meeme yange. ¹² Ninze nyanza, oba lukwata, n'o kuteekaku n'o nteekaku abankuuma? ¹³ Bwe ntumula nti Ekitanda kyange kyansanyusya, Ekiriri kyange kyawumulya okwemulugunya kwange; ¹⁴ Kale kaisi n'o ntiisya n'e birooto, n'o nkanga n'o kwolesebwa: ¹⁵ Emeeme yange n'o kwerobozya ni yeerobozya okutugibwa, n'okufa okusinga amagumba gange gano. ¹⁶ Ntamiirwe obulamu bwange; tintaka kubba mulamu enaku gyonagyona: Ndeka; kubanga enaku gyange gibulamu. ¹⁷ Omuntu niikyo ki, iwe okumukulya, Era iwe okumuteekaku omwoyo gwo. ¹⁸ N'okumwizira buli makeeri, N'okumukema buli kaseera? ¹⁹ Olituukya waina obutantoolangaku maiso, n'o butandekanga okumala okumira amatanta gange? ²⁰ Oba nga nyonoonere, nkukola ki iwe, iwe abonekera abantu? Kiki ekyakuntekeseryewo okubba sabbaawa gy'oli, n'okuzitowa ne neezitoowerera nze nzenka? ²¹ Era kiki ekikulobera okusonyiwa okusobya kwange n'o kutoolawo obutali butuukirivu bwange? Kubanga Atyanu naagalamira mu nfuufu; wena olisagirira dala, naye nze nga mbulawo.