¹ Awo Yobu n'a iramu n'atumula nti ² Mazima maite nga kiri kityo: Naye omuntu asobola atya okubba n'o butuukirivu eri Katonda? ³ Bw'abba nga atakire okuwakana naye tasobola kumwiramu kigambo n'e kimu mu lukumi. ⁴ Omwoyo gwe gwa magezi, era amaani ge mangi:. Yani eyabbaire yekakanyairye eri iye n'a bona omukisa? ⁵ Aijulula ensozi ne gitamanya, Bw'a gifundikisya obusungu bwe. ⁶ Asiisikya ensi okuva mu kifo kyayo, Empango gyayo ni gitengera. ⁷ Alagira eisana n'eritavaayo; Era ateekaku akabonero ku munyenye. ⁸ Abamba eigulu yenka, Era aniinirira amayengo ag'e nyanza. ⁹ Akola nabaliyo, entungalugoye, n'o kakaaga, n'e bisenge eby'obukiika obulyo. ¹⁰ Akola ebikulu ebitasagirikika; niiwo awo, eby'ekitalo ebitaboneka. ¹¹ Bona, ambitaku, ni ntamubona: Era yeeyongerayo mu maiso, naye ne ntamutegeera. ¹² Bona, akwata omuyigo, yani asobola okumuziyiza? Yani eyamukoba nti okola ki? ¹³ Katonda tatooleengawo busungu bwe; Ababeezi ba Lakabu bakutama wansi we. ¹⁴ Nze tindisinga einu obutamwiramu, ni neerobaza ebigambo byange mpakane naye? ¹⁵ Gwe ntandiriremu waire nga ndi mutuukirivu; Nandyegayiriire omulabe wange. ¹⁶ Singa nkoowoire naye ng'anvugiire; era naye tinandikiriirye ng'a wuliire eidoboozi lyange. ¹⁷ Kubanga amenya ne mpunga, era ayongera ebiwundu byange okunanga obwereere. ¹⁸ Taŋanyenga kuweera mwoka, Naye angizwiirye obubalagazi. ¹⁹ Bwe tutumula ku maani ag'omuyinza, bona, nga aliwo! Bwe tutumula ku kusala omusango, yani eyanteekerawo ekiseera? ²⁰ Newaire nga ndi mutuukirivu, omunwa gwange niigwo gwa gwansalira omusango okunsinga: Newaire nga natuukiriire, gwantegeeza okubba omukyamu. ²¹ Nze ndi muntu eyatuukiriire; tinewoozere nzenka; Nyooma obulamu bwange. ²² Bwonabwona niibwo bumu; kyenva ntumula nti Azikirirya oyo eyatuukiriire n'o mubbiibi. ²³ Ekibonyoobonyo bwe kiita amangu ago, Alikudaalira okusalirwa omusango okw'a babulaku kabbiibi. ²⁴ Ensi eweweibweyo mu mukono gw'o mubbiibi : Abiika ku maiso g'a balamuzi baayo; oba nga ti niiye, kale niiye ani? ²⁵ Enaku gyange giwulukuka mangu okusinga omubaka: giiruka, gibulaku busa bwe giribba. ²⁶ Giyikire ng'amaato agatambula embiro Ng'eikookooma eriika ku muyiigo. ²⁷ Bwe ntumula nti Neerabira okwemulugunya kwange, Naasanyusya amaiso gange aganakuwaire ni ŋumya omwoyo: ²⁸ Awo nga ntiire obwinike bwange bwonabona, maite nga tolinjeta abulaku musango. ²⁹ Omusango gulinsinga; Kale kiki ekinteganyisya obwereere? ³⁰ Bwe naaba amaizi ag'o muzira, engalo gyange waire nga ngitukulya ntya; ³¹ Era naye olinsuula mu lusalosalo, n'e ngoye gyange nze girintamwa. ³² Kubanga iye ti muntu nga nze bwe ndi, nze okumwiramu, ife okubonagana okuwozya omusango. ³³ Wabula mulamuzi ali wakati waisu, Eyandisoboire okuteeka omukono gwe ku ife fembiri. ³⁴ Antoireku omwigo gwe, so entiisya ye ereke okunkanga: ³⁵ Kale bwe nanditumwire ni tamutya: Kubanga ti ndi ntyo bwe ndi nze nzenka.