¹ Naye, Yobu, nkwegayiriire, wulira okutumula kwange, Era tega ekitu kyo eri ebigambo byange byonabyona. ² Bona, njasamire omunwa gwange, olulimi lwange lutumwire mu munwa gwange. ³ Ebigambo byange byayatula obugolokofu bw'o mwoyo gwange, n'omunwa gwange bye gumaite bye gwatumula awabula bukuusa. ⁴ Omwoyo gwa Katonda niigwo gwankolere, N'omwoka gw'Omuyinza w'e bintu byonabyona niigwo gumpa obulamu. ⁵ Oba, osobola, ngiraamu: Liraanya ebigambo byo mu maiso gange, oyemerere wakati. ⁶ Bona, ndi awali Katonda era nga iwe bw'oli: Era nzena nabumbiibwe okuva mu itakali. ⁷ Bona, entiisya yange teekukange, so n'okunyigiriirya kwange tikuukuzitoowerere. ⁸ Mazima otumwire nze nga mpulira, nzena mpuliire eidoboozi ly'e bigambo byo ng'o tumula nti ⁹ Ndi mulongoofu nga mbulaku kusobya; Mbulaku musango, so mu nze mubula butali butuukirivu: ¹⁰ Bona, antolaku ensonga, Anjeta mulabe we; ¹¹ Ateeka ebigere byange mu nvuba, Alabirira amangira gange gonagona. ¹² Bona, naakwiramu, mu ekyo obula nsonga; Kubanga Katonda asinga omuntu obukulu. ¹³ Kiki ekikwakanya naye? Kubanga tabalirira muwendo gwe bigambo bye byonabyona. ¹⁴ Kubanga Katonda atumula omulundi gumu, Niiwo awo, emirundi ibiri, abantu waire nga tebateekayo mwoyo. ¹⁵ Mu kirooto, mu kwolesebwa okw'omu bwire, endoolo enyingi bwe gikwata abantu, nga babongoota ku kitanda; ¹⁶ Awo kaisi n'agula amatu g'abantu, n'ateeka akabonero ku kwegeresebwa kwabwe, ¹⁷ Atoole abantu mu kuteesya kwabwe, Era agise abantu amalala; ¹⁸ Aziyizya emeeme ye okwika mu bwina, N'obulamu bwe buleke okufa n'e kitala. ¹⁹ N'okulumwa kumukangavula ku kitanda kye, to n'okulwana okutamala mu magumba ge: ²⁰ Obulamu bwe n'okutamwa ni butamwa emere, n'emeeme ye ekyokulya ekiyonjo. ²¹ Omubiri gwe gumalibwawo n'okuyinzika ni gutayinzika kubonebwa; N'amagumba ge agabbaire tigaboneka ni gakukunala. ²² Niiwo awo, emeeme ye esemberera obwina, N'obulamu bwe busemberera abazikirirya. ²³ Oba waliwo wamu naye malayika, Omutegeeza, omumu mu lukumi, okwolesya abantu ebibagwanira; ²⁴ Awo n'amukwatirwa ekisa n'a tumula nti muwonye aleke okwika mu bwina, mboine ekinunulo. ²⁵ Omubiri gwe gulibba muyaka okusinga ogw'o mwana omutomuto; Aira mu naku gy'obutobuto bwe: ²⁶ Asaba Katonda, era amukwatirwa ekisa; n'okubona abona amaiso ge n'e isanyu: Era awa ate omuntu obutuukirivu bwe. ²⁷ Ayembera mu maiso g'a bantu n'a tumula nti Nyonoonere ne nyoola ekyo ekyabbaire ekisa, So mbulaku kye nagasiibwa: ²⁸ Anunwire emeeme yange obutaika mu bwina. N'obulamu bwange bwalingiriranga omusana. ²⁹ Bona, ebyo byonabyona Katonda abikola, emirundi ibiri, Niiwo awo, n'eisatu eri omuntu, ³⁰ Okwiryawo emeeme ye mu bwina, Ayakirwe omusana ogw'abalamu. ³¹ Weetegereze inu, ai Yobu, ompulire: Sirika, nzena natumula. ³² Oba nga olina eky'okutumula ngiraamu: Tumula, kubanga ntaka okukufuula omutuukirivu. ³³ Oba nga ti niiwo awo, mpulira: Sirika, nzena naakwegeresya amagezi.