¹ Awo abasaiza abo abasatu ne baleka okwiramu Yobu, kubanga Yabbaire mutuukirivu mu maiso ge iye. ² Awo obusungu bwa Eriku, mutaane wa Balakeri Omubuzi, ow'o mu kika kya Laamu kaisi ni bubuubuuka eri Yobu, kubanga yeeyeta mutuukirivu so ti Katonda. ³ Era obusungu bwe ne bubuubuuka n'eri mikwanu gye bonsatu kubanga tebaboine kyo kwiramu, naye ni basalira Yobu okumusinga. ⁴ Era Eriku yabbaire alindiriire okutumula n'o Yobu, kubanga wabbairewo abaamusinga obukulu. ⁵ Awo Eriku bwe yaboine nga mu munwa k'abasaiza abo abasatu mubula kyo kwiramu, obusungu bwe ni bubuubuuka. ⁶ Awo Eriku mutaane wa Balakeri Omubuzi n'a iramu n'a tumula nti nze ndi mutomuto, mwena muli bakaire inu; Kyenaviire nzibiikirirya ni ntayaŋanga kubalaga kye ndowooza. ⁷ Ntumwire nti enaku niigyo gyanditumwire, olufulube lw'e myaka lwandisoboire amagezi. ⁸ Naye waliwo omwoyo mu bantu, n'o mwoka gw'Omuyinza w'e bintu byonabyona gubawa okutegeera. ⁹ Abakulu ti niibo bagezi, so n'abakaire ti niibo bategeera emisango. ¹⁰ Kyenviire ntumula nti mumpulire; Era nzena naalaga kye ndowooza. ¹¹ bona, nindiriire ebigambo byanyu, Mpulirisisirye ensonga gyanyu, nga musagira bye mubba mutumula. ¹² Niiwo awo, ntegere ekitu eri imwe, Era, bona, nga wabula asingire Yobu, waire airiremu ebigambo bye ku imwe. ¹³ Mwekuume muleke okutumula nti Tuboine amagezi; koizi Katonda asobola okumuwangula, ti bantu: ¹⁴ Kubanga ebigambo bye tabyolekerya nze; So timwiremu n'o kutumula kwanyu. ¹⁵ Basamaaliriire, tibakaali bayanukula: Babula kigambo ky'o kutumula. ¹⁶ Nzena nalindirira, kubanga tebatumula, Kubanga bemerera bwemereri nga tebakaali bayanukula? ¹⁷ Era nzena nayanukula ebyange, Era nzena nalaga kye ndowooza. ¹⁸ Kubanga ngizwire ebigambo; Omwoyo gwange oguli mu nze gumpalirizirye. ¹⁹ Bona, ekida kyange kiri sooti mwenge ogubulaku we gufulumira; ng'amawu amayaaka kitaka okwabika. ²⁰ Natumula kaisi mpeereweere; Naayasama omunwa gwange ne ngiramu. ²¹ Nkwegayiriire, ndeke okusosola mu bantu eri omuntu yenayena; So tinaawe muntu yenayena maina ganyumiikirirya. ²² Kubanga timaite kuwa maina ganyumiikirirya; Omutonzi wange yandintoirewo mangu.