¹ Era ate Eriku n'a iramu n'a tumula nti ² Muwulire ebigambo byange, imwe abasaiza ab'a magezi; Era mutege ekitu gye ndi, imwe abalina okutegeera. ³ Kubanga ekitu kukema ebigambo, ng'a matama bwe galega ku mere. ⁴ Twerondere ekyo ekyabba eky'e nsonga: Tumanye fenka na fenka ebisa bwe biri. ⁵ Kubanga Yobu atumwire nti nze ndi mutuukirivu, Era nti Katonda antoireku ensonga yange: ⁶ Waire nga nina ensonga njetebwa mubbeyi; Ekiwundu kyange tikiwonyezeka, waire nga mbulaku kusobya. ⁷ Muntu ki afaanana Yobu, Anywa okunyoomebwa ng'a maizi? ⁸ Atambulira awamu n'a bakola ebitali by'o butuukirivu, Era atambulira awamu n'a basaiza ababbiibi. ⁹ Kubanga atumwire nti omuntu Kibulaku kye kimugasa Okusanyukira Katonda. ¹⁰ Kale mumpulire, imwe abasaiza abalina okutegeera: Kiirire edi awali Katonda, iye okukola obubbiibi; N'awali Omuyinza w'e bintu byonabyona, iye okukola ebitali byo butuukirivu. ¹¹ Kubanga alisasula omuntu omulimu gwe, Era alibonesya buli muntu ng'a mangira ge bwe gali. ¹² Niiwo awo, mazima Katonda taakolenga kubbiibi, so n'Omuyinza w'e bintu byonabyona taalyenga nsonga. ¹³ Yani eyamugisisirye ensi okugikuuma? Oba yani eyateekereteekere ebintu byonabyona bwe byekankana? ¹⁴ Bw'ateeka omwoyo gwe ku bantu, Bw'a kuŋaanirya gy'ali omwoyo gwe n'o mwoka gwe; ¹⁵ Byonabyona ebirina omubiri birizikiririra wamu, Abantu ni baira mu nfuufu. ¹⁶ Kale oba olina okutegeera, wulira kino: Wulira eidoboozi ly'e bigambo byange. ¹⁷ Akyawa eby'e nsonga oyo alifuga? Era wasalira oyo omutuukirivu era ow'a maani okumusinga? ¹⁸ Kisa okukoba kabaka nti iwe oli mugwagwa? Oba abakungu nti imwe muli babbiibi? ¹⁹ Okusinga einu ti kisa okukoba oyo atatya maiso ga balangira, So talowooza mugaiga okusinga omwavu? Kubanga bonabona mulimu gwe mikono gye. ²⁰ Bafa mu kaseera kadiidiiri, mu iyangwe; Abantu bakankanyilibwa ni babitawo, n'a b'a maani batoolebwawo awabula mukono. ²¹ Kubanga amaiso ge galingirira amangira ag'o muntu, era abona okutambula kwe kwonakwona. ²² Wabula kirikirya waire ekiwolyo eky'o kufa, Abakola ebitali byo butuukirivu we basobola okwegisa. ²³ Kubanga tiyeetaaga kweyongera kulowooza muntu, atuuke mu maiso ga Katonda okusalirwa omusango. ²⁴ Amenyamenya abasaiza ab'a maani mu ngeri etesagirikika, era atekawo abandi mu kifo kyabwe. ²⁵ Kyava alabirira emirimu gyabwe; era abafuundika obwire n'o kuzikirizibwa ni bazikirizibwa. ²⁶ Abakubba ng'a babbiibi mu maiso g'a bandi aweeru; ²⁷ Kubanga bakyama obutamusengererya, so tebataka kuteekayo mwoyo eri amangira ge gonagona: ²⁸ N'okutuukya ni batuukya gy'ali okukunga kw'o mwavu, n'awulira okukunga kw'abo ²⁹ iye bw'awa okutereera, kale yani asobola okusala omusango okusinga? Era iye bw'agisa amaiso ge, kale yani asobola okumulingirira? Oba nga igwanga oba nga muntu, kyonakyona niibwo bumu: ³⁰ Omusaiza atamaite Katonda alekenga okufuga, walekenga okubbaawo eyateega abantu. ³¹ Kubanga waliwo eyabbaire akobere Katonda, nti mbonerezeibwe, tinkaali nsobya ate: ³² Kye ntabona kinjegeresye: Oba nga nkolere obujeemu tinkaali mbukola ate? ³³ Empeera ye eribba nga iwe bw'otaka n'o kugaana n'o gigaana? Kubanga iwe oba weerobozya so ti ninze: Kale tumula ekyo ky'omaite. ³⁴ Abantu abalina okutegeera babbeeya nti niiwo awo, buli muntu ow'a magezi ampulira, yankoba nti ³⁵ Yobu atumula nga bula kumanya, n'ebigambo bye bibulamu magezi, ³⁶ Yobu singa akemeibwe okutuusya enkomerero, kubanga ayanukula ng'a bantu ababbiibi. ³⁷ Kubanga atumula obujeemu ku kwonoona kwe, Akubba mu ngalo gye ng'a yema wakati mu ife, Era ayongerayongera ebigambo bye okuwakanya Katonda.