¹ Naye atyanu be nsinga obukulu bansekerera, Baitawabwe nabanyooma okubateeka wamu n'e mbwa egy'e kisibo kyange. ² Niiwo awo, amaani ag'e mikono gyabwe gandingasirye ki? Abantu abaweiremu obuvubuka, ³ Bakoozimbire olw'o kwetaaga n'e njala; bameketa eitakali eikalu mu ndikirirya ey'okuzika n'o kwonooneka. ⁴ Banoga enku nga awali ebisaka; n'e nkolo egy'o mwoloola niiyo emere yaabwe. ⁵ Babbingibwa wakati mu bantu; babalangira nga bwe balangira omwibbi. ⁶ Kibagwanira okubba mu njatika egy'o mu biwonvu, mu biina oby'o mu itakali n'oby'o mu njazi. ⁷ Balirira mu bisaka, wansi w'e myenyango we bakuŋaanira. ⁸ Baana ba basirusiru, Niiwo awo, baana ba basaiza ababula liina; Baakubbibwa emiigo ne babbimgibwa mu nsi. ⁹ Kale atyanu nze nfuukire olwembo lwabwe, niiwo awo, ndi kigambo kyo buwemu gye bali. ¹⁰ Bantamwa, baneesamba, tebaleka kunfujira matanta mu maiso. ¹¹ Kubanga asumulwire omuguwa gwe n'ambonyaabonya, Era baswire olukoba olugoba mu maiso gange. ¹² Ku mukono gwange ogwa omulyo kugolokokera abalalulalu; basindiikirirya ebigere byange, era batuuma ku nze amangira gaabwe ag'o kuzikirira. ¹³ Boonoona engira yange, Batumula ku naku gye mboine, Abantu ababulwa ow'o kubayamba. ¹⁴ Baiza nga babita mu kituli ekiwagule ekigazi: Awabula mu matongo bangwaku. ¹⁵ Ebitiisya bikyukire okungwaku, Bayiganya ekitiibwa kyange ng'e mpuuli; n'o mukisa gwange guweirewo ng'e kireri. ¹⁶ Era atyanu emeeme yange efukiibwe munda mwange; enaku egy'o kubonyaabonyezebwamu ginkwaite. ¹⁷ Obwire amagumba gange gafumitibwa mu nze, N'obubalagali obunuma tibuwumula. ¹⁸ Olw'a maani amangi ag'e ndwaire yange ekivaalo kyange kyonoonekere: Ensibira dala ng'e kitogi ky'e kizibawo kyange. ¹⁹ Answire mu bitosi, Era nfuukire ng'e nfuufu n'e ikoke. ²⁰ Nkukungiira so tongiramu: Nayemerera, n'o ningirira. ²¹ Okyusye okubba omulalu gye ndi: Olw'a maani ag'o mukono gwo onjiiganya. ²² Onsitulira awali empewo n'o gineebagalyaku; Era onsaanuukirye mu mpunga, ²³ Kubanga maite ng'olintuukya mu kufa, N'eri enyumba eyateekeirwewo abalamu bonabona. ²⁴ Mazima tagololeire mukono gwe ku kifunvu ky'e byagwire; Waire nga bibba mu kuzikirira kwe, omuntu asobola okulira olw'ebyo? ²⁵ Tinamukungiire amaliga oyo eyabbaire mu naku? Emeeme yange tiyanakuwaliire oyo eyeetaaga? ²⁶ Bwe nasuubiire ebisa, ebibbiibi kaisi ni biiza; Era bwe nalindiriire omusana, endikirirya neiza. ²⁷ Madundu gange geesera ni gatawumula: Enaku egy'okubonyaabonyezebwamu gintuukireku. ²⁸ Ntambula nga mpuubaala awabula isana: Nyemerera mu ikuŋaaniro ni nkubba enduulu banyambe. ²⁹ Ndi mugande w'e bibbe, ne bamaaya ndi mwinaabwe. ³⁰ Oluwu okw'o mubiri gwange lwirugaire, lunsasambukaku, n'amagumba gange gookyeibwe n'e ibugumu. ³¹ Enanga yange kyeviire ekyuka okuwuubaala, n'omulere gwange gufuukire eidoboozi ly'abo abakunga amaliga.