¹ Awo Yobu n'aleeta ate olugero lwe n'a tumula nti ² Singa mbaire nga bwe nabbaire mu myezi egyabitire, nga bwe nabbaire mu naku Katonda gye yandabirirangamu; ³ Etabaaza lye lwe yayakiranga omutwe gwange, n'o musana gwe niigwo gwantambulyanga okubita mu ndikirirya; ⁴ Nga bwe nabbaire enaku gyange nga gyengere, ekyama kya Katonda bwe kyabbanga ku weema yange; ⁵ Omuyinza w'e bintu byonabyona bwe yabbaire ng'a kaali nanze, n'a baana bange nga bakaali baneetooloire; ⁶ Ebigere byange bwe byanaabibwanga n'o muzigo, n'olwazi bwe lwanfuukiire emiiga egy'a mafuta! ⁷ Bwe nafulumanga ni njaba eri omulyango mu kibuga, bwe nategekanga entebe yange mu luguudo, ⁸ Abaisuka bambonanga n'e begisa, Abakaire ne bayimukanga ni bemerera; ⁹ Abakungu n'e balekanga okutumula, ni bateeka omukono gwabwe munwa gwabwe; ¹⁰ Eidoboozi ery'a bakulu ni lisirika, Olulimi lwabwe ni lwegaita n'e kijigo ky'o munwa gwabwe. ¹¹ Kubanga ekitu bwe kyampuliranga kaisi ni kineebalya; era eriiso bwe lyambonanga ni libba mujulirizi wange: ¹² Kubanga nawonyanga omwavu eyakungire, era n'abula itaaye eyabulirwe ow'o kumuyamba. ¹³ Omukisa gwangiziire oyo gwe yansabiire eyabbaire ataka okuzikirira: Ne nyembesya olw'e isanyu omwoyo gwa namwandu. ¹⁴ Navaala obutuukirivu ni bumbikaku: Obutalya nsonga bwange ne bubba ng'o munagiro n'e ngule. ¹⁵ Nabbanga amaiso eri omuwofu, Era nabbanga ebigere eri awenyera. ¹⁶ Nabbanga itawabwe abeetaaga: Era nakeberanga ensonga y'oyo gwe ntamaite. ¹⁷ Era namenyanga atali mutuukirivu olusaya, ni nsika omuyiigo ni ngutoola mu mainu ge, ¹⁸ Kale ni ntumula nti ndifiira mu kisu kyange, Era natumulanga enaku jange ng'o musenyu: ¹⁹ Emizi gyange girandire eri amaizi, n'omusulo gubba ku itabi lyange ni gukyeesya obwire: ²⁰ Ekitiibwa kyange kiiza gye ndi, n'o mutego gwange gwiriibwe buyaka mu mukono gwange. ²¹ Nze abantu bampulisisyanga ni balinda, Ne basirikira okuteesya kwange. ²² Nga ndetere ebigambo ibo ni batatumula ate; okutumula kwange ne kubagwaku. ²³ Era banindiriire nga bwe balindirira amaizi; Era baasamire inu omunwa gwabwe ng'abaasamiire amaizi ag'omutoigo. ²⁴ Bwe nabasekeranga ne bataikirirya; n'o musana gw'a maiso gange tebaaguswire. ²⁵ Neerobozyanga engira yabwe ne ntyama ng'o mukulu, Ne mba nga kabaka mu igye, ng'o muntu akubbagizya abakungubaga.