¹ Awo olwatuukire Yeremiya bwe yamaliire dala okutumula n'abantu bonabona ebigambo byonabyona, ebya Mukama Katonda wabwe Mukama Katonda wabwe bye yabbaire amutumire gye babbaire, niibyo bigambo ebyo byonabyona, ² awo Azaliya mutaane wa Kosaaya n'o Yokanani mutaane wa Kaleya n'abasaiza bonabona ab'amalala ne batumula nga bakoba Yeremiya nti obbeeya: Mukama Katonda waisu takutumire okutumula nti timuyingiranga mu Misiri okubba omwo: ³ naye Baluki mutaane wa Neriya niiye akutuweereire okutugabula mu mukono gw'Abakaludaaya kaisi batwite batutwale e Babulooni nga tuli basibe. ⁴ Awo Yokanani Mutaane wa Kaleya n'abaami bonabona ab'ebitongole n'abantu bonabona ne batagondera idoboozi lya Mukama okubba mu nsi ye Yuda. ⁵ Naye Yokanani Mutaane wa Kaleya n'abaami bonabona ab'ebitongole ne batwala ekitundu kyonakyona ekye Yuda abaafiikirewo ababbaire bairirewo okuva mu mawanga gonagona gye babbaire bababbingiire okubba mu nsi ye Yuda; ⁶ Abasaiza n'abakali n'abaana abatobato n'abawala ba kabaka na buli muntu Nebuzaladaani omukulu wa bambowa gwe yalekeire Gedaliya mutaane wa Akikamu mutaane wa Safani, n'o Yeremiya nabbi n'o Baluki mutaane wa Neriya; ⁷ ne bayingira mu nsi y'e Misiri; kubanga tebaagondeire idoboozi lya Mukama: ne batuuka n''o Tapanesi. ⁸ Awo ekigambo kya Mukama ne kiiziira Yeremiya e Tapanesi nga kitumula nti ⁹ irira amabbaale amanene mu mukono gwo ogagise mu itakali ery'omu matafaali agali awayingirirwa mu nyumba ya Falaawo e Tapanesi, abasaiza be Yuda nga babona ¹⁰ obakobe nti Ati bw'atumula Mukama w'eigye, Katonda wa Isiraeri, nti bona, ndituma ne ngirira Nebukaduneeza kabaka w’e Babulooni omwidu wange, ni nteeka entebe ye ku mabbaale gano ge ngisira; era alitimba eweema ye eya kabaka ku igo. ¹¹ Era aliiza n'akubba ensi y'e Misiri; ab'okwitibwa baliweebwawo eri okwitibwa, n’ab'obusibe eri obusibe, n'ab'ekitala eri ekitala. ¹² Era ndikuma omusyo mu nyumba gya bakatonda b'e Misiri; era alibookya n'abatwala nga basibe: era alivaala ensi y'e Misiri ng'omusumba bw'avaala ekivaalo kye; era alivaayo mirenbe. ¹³ Era alimenya empango egy'e Besusemeesi ekiri mu nsi y'e Misiri; n'enyumba gya bakatonda b'e Misiri aligyokya omusyo.