¹ Ekigambo ekyaiziire Yeremiya ku Bayudaaya bonabona ababbaire mu nsi y'e Misiri, ababbaire e Migudooli ne Tapanesi ne Noofu mu nsi ey'e Pasuloosi, nga kitumula nti ² Ati bw'atumula Mukama w'eigye, Katonda wa Isiraeri, nti Muboine obubbiibi bwonabwona bwe naleetere ku Yerusaalemi n'o ku bibuga byonabyona ebye Yuda; era, bona, watyanu matongo, so wabula muntu abba omwo; ³ olw'obubbiibi bwabwe bwe bakolere okunsunguwalya, kubanga baabire okwotererya obubaani n'okuweererya bakatonda abandi be batamanyanga ibo waire imwe waire Bazeiza banyu. ⁴ Era naye nabatumiire abaidu bange bonabona banabbi, nga ngolokoka mu makeeri ne mbatuma, nga ntumula nti Abaisu! timukola kigambo kino eky'omuzizo kye nkyawa. ⁵ Naye ni batawulisisya so tibaategere kitu okukyuka okuleka obubbiibi bwabwe, obutayotereryanga bakatonda abandi obubaani. ⁶ Ekiruyi kyange n'obusungu bwange Kyebwaviire bufukibwa ne bubuubuuka mu bibuga bye Yuda n'o mu nguudo egye Yerusaalemi; era bizikirwe birekeibwe awo, nga bwe kiri watyanu. ⁷ Kale Mukama, Katonda ow'eigye, Katonda wa Isiraeri, kyava atumula ati nti kiki ekibakozesya ekibbiibi ekyekankana awo okwonoona emeeme gyanyu imwe, okwemalirawo omusaiza n'omukali, omwana n'anyonka, wakati mu Yuda, obutabalekera abasigairewo; ⁸ kubanga munsunguwairye n'emirimu egy'emikono gyanyu, nga mwotererya bakatonda abandi obubaani mu nsi y'e Misiri gye mwayabire okubba; Kaisi mumalibwewo, era mubbe ekiramo n'ekivumi mu mawanga gonagona ag'omu nsi? ⁹ Mwerabiire obubbiibi bwa Bazeiza n'obubbiibi bwa bakabaka be Yuda n'obubbiibi bw'abakali baabwe n'obubbiibi bwanyu imwe n'obubbiibi bw'abakali banyu bwe baakoleire mu nsi ye Yuda n'o mu nguudo egy'e Yerusaalemi? ¹⁰ Bakaali kumalibwamu malala ne watyanu, so bakaali kutya, so tibatambuliire mu mateeka gange waire mu biragiro byange bye nateekere mu maiso ganyu n'o mu maiso ga Bazeiza banyu. ¹¹ Mukama w'eigye, Katonda wa Isiraeri, kyava atumula ati nti bona, ndikakasya amaiso gange okuboolekera olw'obubbiibi, okuzikirirya Yuda yenayena. ¹² Era ndiirira ekitundu kya Yuda ekifiikirewo abakakasirye amaiso gaabwe okuyingira mu nsi y'e Misiri okutyama omwo, era bonabona balimalibwawo; mu nsi y'e Misiri mwe baligwira; balimalibwawo n'ekitala n'enjala; balifa, okuva ku mutomuto okutuuka ku mukulu, n'ekitala n'enjala: era balibba kiraamo n'ekyewuunyo n'okulaama n'ekivumi. ¹³ Kubanga ndibonererya abo abatyama mu nsi y'e Misiri nga bwe nabonereirye Yerusaalemi, n'ekitala n'enjala n'o kawumpuli: ¹⁴ n'o ku kitundu kye Yuda ekifiikirewo abayambukire okwaba mu nsi y'e Misiri okubba omwo ne kutabbaaku aliwona waire alisigalawo, kaisi bairewo mu nsi ye Yuda gye batakire okwira okubba: kubanga tewalibba abaliirawo wabula abo abaliwonya obuwonyi. ¹⁵ Awo Abasaiza bonabona abamaite ng'abakali baabwe bootererya bakatonda abandi obubaani n'abakali bonabona ababbaire bemereire awo, ekibiina ekinene, abantu bonabona ababbaire batyama mu nsi y'e Misiri e Pasuloosi, ne bairamu Yeremiya nga batumula nti ¹⁶ Ekigambo ky'otukobeire mu liina lya Mukama tetwakuwulire. ¹⁷ Naye tetulireka kutuukirirya buli kigambo ekyakaviire mu munwa gwaisu, okwotererya kabaka w'eugulu omukali obubaani n'okumufukira ebiweebwayo eby'okunywa nga bwe twakolanga, ife n'a bazeiza, bakabaka baisu n'abakungu baisu, mu bibuga bye Yuda n'o mu nguudo egy'e Yerusaalemi: kubanga lwe twabbanga n'eby'okulya ebingi, ne tubba kusa ne tutabona bubbiibi. ¹⁸ Naye kasookeire tulekayo okwotererya kabaka w'eigulu omukali obubbaane n'okumufukira ebiweebwayo eby'okunywa, tubbaire mu kwetaaga n'okumalibwawo ekitala n'enjala. ¹⁹ Era bwe twayotereryanga kabaka w'eigulu omukali obubbaane ne tumufukira ebiweebwayo eby'okunywa, twamufumbiire emigaati okumusinza ne tumufukira ebiweebwayo eby'okunywa awabula baibawaisu? ²⁰ Awo Yeremiya n'akoba abantu bonabona, Abasaiza n'abakali, abantu bonabona ababbaire bamwiriremu batyo, ng'atumula nti ²¹ Obubaani bwe mwayotereirye mu bibuga bye Yuda n'o mu nguudo egy'e Yerusaalemi, imwe na bazeiza banyu, bakabaka banyu n'abakungu banyu, n'abantu ab'omu nsi, Mukama teyabaijukiire, so tekyaizire mu mwoyo gwe? ²² n'okusobola Mukama n'atasobola kuzibiikirirya ate olw'obubbiibi obw'ebikolwa byanyu n'olw'emizizo gye mwakolere; ensi yanyu kyeviire efuuka amatongo n'ekyewuunyo n'ekiraamo, nga wabula agityamamu, nga bwe kiri watyanu. ²³ Kubanga mwayotereirye obubaani, era kubanga mwayonoonere Mukama, so temugondeire idoboozi lya Mukama so timutambuliire mu mateeka ge waire mu biragiro bye waire mu ebyo bye yategeezerye; obubbiibi buno kyebuviire bubatuukaku, nga bwe kiri watyanu. ²⁴ Era ate Yeremiya n'akoba abantu bonabona n'abakali bonabona nti Muwulire ekigambo kya Mukama, imwe mwenamwena aba Yuda abali mu nsi y'e Misiri: ²⁵ ati bw'atumula Mukama w'eigye, Katonda wa Isiraeri, nti imwe na bakali banyu mutumwire n'eminwa era mukituukiriirye n'emikono gyanyu, nga mutumula nti titulireka kutuukirirya bweyamu bwaisu bwe tweyamire okwotereryanga kabaka w'eigulu omukali obubaani n'okumufukiranga ebiweebwayo eby'okunywa: kale munywezye obweyamu bwanyu era mutuukirirye obweyamu bwanyu. ²⁶ Kale muwulire ekigambo kya Mukama, imwe mwenamwena aba Yuda ababba mu nsi y'e Misiri: bona, ndayiire eriina lyange eikulu, bw'atumula Mukama, ng'eriina lyange tiriryetebwa ate mu munwa gw'omuntu yenayena owa Yuda mu nsi yonayona ey'e Misiri, ng'atumula nti nga Mukama Katonda bw'ali omulamu. ²⁷ Bona, mbalabirira olw'o bubbiibi so ti lw'o busa: n'abasaiza bonabona aba Yuda abali mu nsi y'e Misiri balimalibwayo ekitala n'enjala, okutuusya lwe baliwaawo. ²⁸ N'abo abaliwona ekitala baliirawo okuva mu nsi y'e Misiri n'a bazeiza mu nsi ye Yuda, omuwendo gwabwe nga mutono; n'ekitundu kyonakyona ekye Yuda abaabire mu nsi y'e Misiri okubba omwo balimanya oyo bw'ali ekigambo kye niikyo kyemerera, ekyange oba ekyabwe. ²⁹ Era kano niiko kaabba akabonero gye muli, bw'atumula Mukama, nga ndibabonererya mu kifo kino, kaisi mumanye ng'ebigambo byange tebirireka kwemerera gye muli olw'obubbiibi: ³⁰ Ati bw'atumula Mukama nti bona, ndiwaayo Falaawo Kofera kabaka w'e Misiri mu mukono gw'abalabe be n'o mu mukono gw'abo abasagira obulamu bwe; nga bwe nawaireyo Zedekiya kabaka we Yuda mu mukono gwa Nebukaduneeza kabaka w'e Babulooni omulabe we era eyasagiire obulamu bwe