¹ Awo abaami bonabona ab'ebitongole n'o Yokanani mutaane wa Kaleya n'o Yezaniya mutaane wa Kosaaya n'abantu bonabona okuva ku mutomuto okutuuka ku mukulu, ² ne basembera ne bakoba Yeremiya nabbi nti tukwegayiriire, okusaba kwaisu kwikirizibwe gy'oli, otusabire eri Mukama Katonda wo, ng'osabira ekitundu kino kyonakyona ekifiikirewo; kubanga tusigairewo batono fenka abaabbanga abangi ng'amaiso go bwe gatuboine: ³ Mukama Katonda wo atulage engira etugwanira okutambuliramu n'ekigambo ekitugwanira okukola. ⁴ Awo Yeremiya nabbi n'abakoba nti mbawuliire; bona, nasabire Mukama Katonda wanyu ng'ebigambo byanyu bwe biri; kale olulituuka kyonakyona Mukama ky'alibairamu ndikibakobera; tindibagisa kigambo kyonakyona. ⁵ Awo ne bakoba Yeremiya nti Mukama abbe omujulizi ow'amazima omwesigwa mu ife, bwe tutalikola ng'ekigambo kyonakyona bwe kiribba Mukama Katonda wo ky'alikutuma gye tuli. ⁶ Oba nga kisa oba nga kibbiibi, tuligondera eidoboozi lya Mukama Katonda waisu gye tukutuma; Kaisi tubbenga kusa bwe tugondera eidoboozi lya Mukama Katonda waisu. ⁷ Awo olwatuukire enaku ikumi bwe gyabitirewo, ekigambo kya Mukama ne kizira Yeremiya. ⁸ Awo n'ayeta Yokanani mutaane wa Kaleya n'abaami bonabona ab'ebitongole ababbaire naye, n'abantu bonabona okuva ku mutomuto okutuuka ku mukulu, ⁹ n'abakoba nti ati bw'atumula Mukama Katonda wa Isiraeri gwe mwantumire okwanjula okusaba kwanyu mu maiso ge, nti ¹⁰ Bwe muliikirirya okubba mu nsi eno, kale ndibazimba, so tindibaabya, era ndibasimba, so tindibasimbula: kubanga nejusirye obubbiibi bwe nabakolere. ¹¹ Temutya kabaka w'e Babulooni gwe mutya; temumutya, bw'atumula Mukama: kubanga nze ndi wamu naimwe okubalokola n'okubawonya mu mukono gwe. ¹² Era ndibawa okusaasirwa abasaasire, era abairyeyo mu nsi yanyu. ¹³ Naye bwe mwakoba nti titwaba kutyama mu nsi eno; ne mutagondera idoboozi lya Mukama Katonda wanyu; ¹⁴ nga mutumula nti Bbe; naye tulyaba mu nsi y'e Misiri gye tutalibonera ntalo, so tituliwulira idoboozi lye ikondeere, so titulirumwa njala olw'emere; n'eyo gye tulityama: ¹⁵ kale muwulire ekigambo kya Mukama, imwe abafiikirewo ku Yuda: Ati bw'atumula Mukama w'eigye, Katonda wa Isiraeri nti Bwe mulikakasya amaiso ganyu dala okuyingira mu Misiri, ne mwaba okubba omwo; ¹⁶ kale olulituuka ekitala kye mutya kiribakwatiira eyo mu nsi y'e Misiri, n'enjala gye mutiire eribacocerya eyo mu Misiri; era eyo gye mulifiira. ¹⁷ Kityo bwe kiribba eri Abasaiza bonabona abakakasya amaiso gaabwe okwaba e Misiri okubba eyo; balifa n'ekitala n'enjala n'o kawumpuli: so tiwalibba ku ibo abalifiikawo waire okuwona obubbiibi bwe ndibaleetaku. ¹⁸ Kubanga Ati bw'atumula Mukama w'eigye, Katonda wa Isiraeri, nti Obusungu bwange n'ekiruyi kyange nga bwe byafukiibwe ku abo abaali mu Yerusaalemi, ekiruyi kyange bwe kirifukibwa ku imwe kityo bwe muliyingira mu Misiri: era mulibba kiraamo n'ekyewuunyo n'okulaama n'ekivumi; so temulibona ate kifo kino. ¹⁹ Mukama atumwire ku imwe, ai ekitundu ekifiikireewo ku Yuda, nti timwaba mu Misiri: mutegeerere dala nga Atyanu nze mbaire mujulirizi gye muli. ²⁰ Kubanga mukolere emeeme gyanyu imwe eby'obukuusa; kubanga mwantumire eri Mukama Katonda wanyu nga mutumula nti tusabire eri Mukama Katonda waisu; era nga byonabyona bwe biribba; Mukama Katonda waisu by'alitumula, tukobere otyo, fena tulibikola: ²¹ era watyanu mbibakobeire; naye temugondeire idoboozi lya Mukama Katonda wanyu mu kyonakyona ky'antumire gye muli ²² Kale mutegeerere dala nga mulifa n'ekitala n'enjala n'o kawumpuli, mu kifo gye mutaka okwaba okubba.