¹ Awo olwatuukire mu mwezi ogw'omusanvu Isimaeri mutaane wa Nesaniya, mutaane wa Erisama, ow'oku izaire lya kabaka, era omumu ku baami abakulu aba kabaka, n'abasaiza eikumi wamu naye, ne baiza eri Gedaliya mutaane wa Akikamu e Mizupa: awo ne baliira eyo emere wamu e Mizupa. ² Awo Isimaeri mutaane wa Nesaniya n'ayimuka n'abasaiza eikumi ababbaire naye ne basumita Gedaliya mutaane wa Akikamu mutaane wa Safani n'ekitala ne bamwita, kabaka w'e Babulooni gwe yabbaire awaire okufuga ensi. ³ Era Isimaeri n'aita n'Abayudaaya bonabona ababbaire naye, ababbaire n'o Gedaliya e Mizupa, n'Abakaludaaya ababonekere eyo, abasaiza abalwani. ⁴ Awo olwatuukire ku lunaku olw'okubiri ng'amalire okwita Gedaliya, so nga wabula muntu akimaite, ⁵ abamu ne baiza abaaviire e Sekemu ne Siiro ne Samaliya, abasaiza kinaana, nga bamweweibwe ebirevu byabwe n'ebivaalo byabwe nga babikanwire, era nga beesalire, nga balina ebitone n'omusita mu mukono gwabwe okubireeta mu nyumba ya Mukama. ⁶ Awo Isimaeri mutaane wa Nesaniya n'ava mu Mizupa okubasisinkana, ng'ayaba ng'akunga amaliga: awo olwatuukire bwe yasisinkaine nabo, n'abakoba nti Mwize eri Gedaliya mutaane wa Akikamu. ⁷ Awo olwatuukire bwe baatuukire wakati mu kibuga, Isimaeri mutaane wa Nesaniya n'abaita n'abasuula wakati mu biina iye n'abasaiza ababbaire naye. ⁸ Naye ne muboneka mu ibo abasaiza ikumi abakobere Isimaeri nti totwita: kubanga tulina ebintu ebyagisiibwe mu nimiro, eŋaanu ne sayiri, n'amafuta, n'omubisi gw'enjoki. Awo n'atabaitira wamu n'a bagande baabwe. ⁹ Era ebiina Isimaeri mwe yaswiire emirambo gyonagyona egy'abasaiza be yaitire, okuliraana Gedaliya, (bwe biri Asa kabaka bye yasiimire olw'okutya Baasa kabaka wa Isiraeri,) Isimaeri mutaane wa Nesaniya n'abiizulya abo abaitiibwe. ¹⁰ Awo Isimaeri n'atwala nga basibe abo bonabona abaafiikirewo ku bantu ababbaire mu Mizupa, abawala ba kabaka n'abantu bonabona ababbaire basigaire mu Mizupa, Nebuzaladaani omukulu w'abambowa be yabbaire agisisirye Gedaliya mutaane wa Nesaniya n'abatwala nga basibe, n'ayaba okusomoka okwaba eri abaana ba Amoni. ¹¹ Naye Yokanani mutaane wa Kaleya n'abaami bonabona ab'ebitongole ababbaire naye bwe baawuliire obubbiibi bwonabwona Isimaeri mutaane wa Nesaniya bwe yabbaire akolere, ¹² kale ne batwala abasaiza bonabona ne baaba okulwana n'o Isimaeri mutaane wa Nesaniya ne bamusanga awali amaizi amangi agali mu Gibyoni. ¹³ Awo olwatuukire abantu bonabona ababbaire n'o Isimaeri bwe baboine Yokanani mutaane wa Kaleya n'abaami bonabona ab'ebitongole ababbaire naye, ne basanyuka. ¹⁴ Awo abantu bonabona Isimaeri be yabbaire atwaire nga basibe okubatoola e Mizupa, ne bakyuka ne bairayo, ne baaba eri Yokanani mutaane wa Kaleya. ¹⁵ Naye Isimaeri mutaane wa Nesaniya n'awona Yokanani ng'alina abasaiza munaana, n'ayaba eri abaana ba Amoni. ¹⁶ Awo Yokanani mutaane wa Kaleya n'abaami bonabona ab'ebitongole ababbaire naye ne batwala ekitundu kyonakyona ekifiikirewo ku bantu be yabbaire airiryewo okubatoola ku Isimaeri mutaane wa Nesaniya, e Mizupa, bwe yamalire okwita Gedaliya mutaane wa Akikamu, abasaiza abalwani n'abakali n'abaana abatobato n'abalaawe be yairiryewo okuva e Gibyoni: ¹⁷ awo ne bairayo ne babba mu Gerusukimamu ekiriraine Besirekemu, okwaba okuyingira mu Misiri, ¹⁸ olw'Abakaludaaya: kubanga babbaire babatiire, kubanga Isimaeri mutaane wa Nesaniya yaitire Gedaliya mutaane wa Akikamu kabaka w'e Babulooni gwe yawaire okufuga ensi.