¹ Ekigambo ekyaiziire Yeremiya ekyaviire eri Mukama, Nebuzaladaani omukulu w'abambowa bwe yamalire okumulekulira mu Laama, bwe yamutwaire ng'asibiibwe mu masamba mu basibe bonabona ab'e Yerusaalemi ne Yuda abaatwaliibwe e Babulooni nga basibe. ² Omukulu w'abambowa n'atwala Yeremiya n'amukoba nti Mukama Katonda wo yatumwire obubbiibi buno ku kifo kino ³ n'okuleeta Mukama abuleetere, era akolere nga bwe yatumwire; kubanga mwayonoonere Mukama, so timugondeire idoboozi lye, ekigambo kino kyekiviire kibatuukaku. ⁴ Kale, bona, nkusumulula atyanu mu masamba agali ku mukono gwo. Oba ng'osiima okwiza nanze okwaba e Babulooni, iza, nzena nakukuumanga kusa; naye oba ng'okyeta kibbiibi okwiza nanze okwaba e Babulooni, lekayo: bona, ensi yonayona eri mu maiso go gy'osiima okwaba era gy'osinga okutaka, gy'obba oyaba. ⁵ Awo bwe yabbaire nga akaali kwirayo, n'atumula nti irayo eri Gedaliya Mutaane wa Akikamu Mutaane Safani, kabaka w’e Babulooni gw’awaire okufuga ebibuga bye Yuda, obbe ewuwe mu bantu: oba yaba yonayona gy'osiima okwaba. Awo omukulu w'abambowa n'amuwa ebyokulya n'ekirabo n'amwita. ⁶ Awo Yeremiya n'ayaba eri Gelaliya Mutaane wa Akikamu e Mizupa, n'abba ewuwe mu bantu ababbaire basigaire mu nsi. ⁷ Awo abaami bonabona ab'ebitongole ababbaire mu byalo, ibo n'abasaiza baabwe, bwe baawuliire nga kabaka w’e Babulooni awaire Gelaliya Mutaane wa Akikamu okufuga ensi, era ng'amukwatisirye abasaiza n'abakali n'abaana abatobato n'o mu abo abasinga obwavu mu nsi, ku ibo abataatwaliibwe e Babulooni nga basibe; ⁸ awo ne baiza eri Gedaliya e Mizupa, Isimaeri Mutaane wa Nesaniya n'o Yokanani n'o Yonasaani bataane ba Kaleya n'o Seraya Mutaane wa Tanukumesi n'a bataane ba Efayi Omunetofa, n'o Yezaniya omwana w'omu Maakasi, ibo n'abasaiza baabwe. ⁹ Awo Gedaliya Mutaane wa Akikamu Mutaane wa Safani n'abalayirira ibo n'abasaiza baabwe ng'atumula nti timutya kuweererya Abakaludaaya: mubbe mu nsi, muweereryenga kabaka w'e Babulooni, era mwabbanga kusa. ¹⁰ Nze, bona, nabbanga e Mizupa okwemereranga mu maiso g'Abakaludaaya abaliiza gye tuli: naye imwe mukuŋanye omwenge n'ebibala eby'omu kyeya n'amafuta, mubiteeke mu bintu byanyu, mubbenga mu bibuga byanyu bye muliire. ¹¹ Era batyo Abayudaaya bonabona ababbaire mu Mowaabu n'o mu baana ba Amoni n'o mu Edomu n'abo ababbaire mu nsi gyonagyona bwe baawuliire nga kabaka w'e Babulooni afiikiryewo ku Yuda era ng'akulirye ku ibo Gedaliya Mutaane wa Akikaamu Mutaane wa Safani; ¹² kale Abayudaaya bonabona ne bairawo nga bava mu bifo byonabyona gye babbaire bababbingiire ne baiza mu nsi ye Yuda eri Gedaliya e Mizupa, ne bakuŋaanya omwenge n'ebibala eby'omu kyeya bingi inu dala. ¹³ Era ate Yokanani Mutaane wa Kaleya n'abaami bonabona ab'ebitongole ababbaire mu byalo ne baiza eri Gedaliya e Mizupa ¹⁴ ne bamukoba nti omaite nga Baalisi kabaka w'abaana ba Amoni atumire Isimaeri Mutaane wa Nesaniya okukwita? Naye Gedaliya Mutaane wa Akikamu n'atabaikiriirya. ¹⁵ Awo Yokanani Mutaane wa Kaleya n'atumula n'o Gedaliya e Mizupa kyama ng'akoba nti Ka njabe, nkwegayiriire, ngite Isimaeri mutaane wa Nesaniya, so tiwalibba muntu alikimanya: yandikwitiire ki, Abayudaaya bonabona abakungaine gy'oli n'okusaansaana ne basaansaana, n'ekitundu kye Yuda ekifiikirewo ne kizikirira? ¹⁶ Naye Gedaliya mutaane wa Akikamu n'akoba Yokanani mutaane wa Kaleya nti tokola kigambo ekyo: kubanga omuwaayirirya Isimaeri.