¹ Awo Sefatiya mutaane wa Malani n'o Gedaliya mutaane wa Pasukuli n'o Yukali mutaane wa Seremiya n'o Pasukuli mutaane wa Malukiya ne bawulira ebigambo Yeremiya bye yakobeire abantu bonabona ng'atumula nti ² Ati bw'atumula Mukama nti asigala mu kibuga muno alifa ekitala n'enjala n"o kawumpuli naye oyo afuluma n'ayaba eri Abakaludaaya alibba mulamu, n'obulamu bwe bulibba munyago gy'ali, era alibba mulamu. ³ Ati bw'atumula Mukama nti ekibuga kino tekirireka kuweebwayo mu mukono gw'eigye lya kabaka w'e Babulooni, naye alikimenya. ⁴ Awo abakungu ne bakoba kabaka nti Tukwegayiriire, omusaiza ono aitibwe; kubanga anafuya emikono gy'abasaiza abalwani abasigaire mu kibuga muno, n'emikono gy'abantu bonabona, ng'abakoba ebigambo ebifaanana bityo: kubanga omusaiza ono tatakirya mirembe bantu bano wabula obubbiibi. ⁵ Awo Zedekiya kabaka n'atumula nti bona, ali mu mukono gwanyu: kubanga kabaka ti niiye asobola okukola ekigambo kyonakyona okubaziyizya. ⁶ Awo ne batwala Yeremiya ne bamusuula mu nyumba ey'obiina eya Malukiya omwana wa kabaka eyabbaire mu luya olw'abambowa: ne baikya Yeremiya n'emigwa. So mu biina nga mubula maizi wabula ebitoosi: Yeremiya n'atubira mu bitosi. ⁷ Awo Ebedumereki Omuwesiyopya omulaawe eyabbaire mu nyumba ya kabaka bwe yawuliire nga bateekere Yeremiya mu biina; kabaka ng'atyaime mu mulyango gwa Benyamini; ⁸ awo Ebedumereki n'ava mu nnyumba ya kabaka n'akoba kabaka nti ⁹ Mukama wange kabaka, abasaiza bano bakolere kubbiibi mu byonabyona bye bakolere Yeremiya nabbi gwe baswire mu biina; era ataka kufiira mu kifo mw'ali olw'enjala: kubanga tewakaali waliwo mere mu kibuga: ¹⁰ Awo kabaka waisi n'alagira Ebedumereki Omuwesiyopya ng'atumula nti toola wano abasaiza asatu obatwale oyabe nabo, oniinisye Yeremiya nabbi ng'omutoola mu biina nga kaali kufa. ¹¹ Awo Ebedumereki n'atwala abasaiza abo n'ayaba nabo, n'ayingira mu nyumba ya kabaka wansi w'eigwanika, n’atoolayo ebiwero ebikaire ebyasuuliibwe n’ebinyakinyaki ebivundu n'abiikirya ku miguwa mu biina eri Yeremiya. ¹² Awo Ebedumereki Omuwesiyopya n'akoba Yeremiya nti teeka ebiwero bino ebikaire ebyasuuliibwe n'ebinyakinyaki ebivundu mu nkwawa gyo wansi w'emiguwa. Awo Yeremiya n'akola atyo. ¹³ Awo ne batoola Yeremiya mu biina nga bamuwalula n'emiguwa egyo: awo Yeremiya n'abba mu luya olw'abambowa. ¹⁴ Awo Zedekiya kabaka n'atuma n'aleeta Yeremiya nabbi gy'ali mu mulyango ogw'okusatu oguli mu nyumba ya Mukama: awo kabaka n'akoba Yeremiya nti nakubuulya ekigambo; tongisa kigambo kyonakyona. ¹⁵ Awo Yeremiya n'akoba Zedekiya nti bwe nakukobera, tongite? era bwe naakuweerera amagezi, tompulisisye. ¹⁶ Awo Zedekiya kabaka n'alayirira kyama Yeremiya ng'atumula nti nga Mukama bw'ali omulamu eyatukoleire emeeme eno, tindikwita, so tindikuwaayo mu mukono gw'abantu bano abasagira obulamu bwo. ¹⁷ Awo Yeremiya kaisi n'akoba Zedekiya nti Ati bw'atumula Mukama, Katonda ow'eigye, Katonda wa Isiraeri, nti bw'ewafuluma n'oyaba eri abakungu ba kabaka w'e Babulooni, kale emeeme yo eribba namu n'ekibuga kino tekiryokyebwa musyo; ¹⁸ wena olibba mulamu n'enyumba yo: naye bw'otoikirirye kufuluma n'oyaba eri abakungu ba kabaka w'e Babulooni, kale ekibuga kino kiriweebwayo mu mukono gw'Abakaludaaya, era balikyokya omusyo, so wena toliwona mu mukono gwabwe. ¹⁹ Awo Zedekiya kabaka n'akoba Yeremiya nti ntiire Abayudaaya abasenze Abakaludaaya baleke okumpaayo mu mukono gwabwe, ne banduulira. ²⁰ Naye Yeremiya n'atumula nti tibalikuwaayo, nkwegayiriire, gondera eidoboozi lya Mukama mu ekyo kye nkukoba: kale lw'olibba okusa, n'emeeme yo eribba namu. ²¹ Naye bw'ewagana okufuluma, kino niikyo ekigambo Mukama ky'andagire: ²² Bona, abakali bonabona abasigaire mu nyumba ya kabaka we Yuda balifulumizibwa eri abakungu ba kabaka w’e Babulooni, era abakali abo balitumula nti mikwanu gyo inu niibo bakuwaana, n'okusobola bakusoboire: ebigere byo nga bimalire okutubira mu bitoosi, baizire enyuma. ²² Bona, abakali bonabona abasigaire mu nyumba ya kabaka we Yuda balifulumizibwa eri abakungu ba kabaka w’e Babulooni, era abakali abo balitumula nti mikwanu gyo inu niibo bakuwaana, n'okusobola bakusoboire: ebigere byo nga bimalire okutubira mu bitoosi, baizire enyuma. ²³ Era balifulumya bakali bo bonabona n'abaana bo eri Abakaludaaya: so toliwona mu mukono gwabwe, naye oliwambibwa n'omukono gwa kabaka w'e Babulooni: era olyokyesya omusyo ekibuga kino. ²³ Era balifulumya bakali bo bonabona n'abaana bo eri Abakaludaaya: so toliwona mu mukono gwabwe, naye oliwambibwa n'omukono gwa kabaka w'e Babulooni: era olyokyesya omusyo ekibuga kino. ²⁴ Awo Zedekiya kaisi n'akoba Yeremiya nti omuntu yenayena aleke okumanya ebigambo ebyo, kale tolifa. ²⁵ Naye abakungu bwe baliwulira nga ntumwire naiwe ne baiza ne bakukoba nti tukobere bye wakobere kabaka; tokitugisa, feena titwakwite; era n'ebyo kabaka bye yakukobeire; ²⁶ kale kaisi n'obakoba nti naleetere okwegayirira kwange mu maiso ga kabaka aleke okuntoolayo mu nyumba ya Yonasaani okufiira omwo. ²⁷ Awo abakungu bonabona ne baira eri Yeremiya ne bamubuulya: n'abakobera ng'ebigambo ebyo byonabyona bwe byabbaire kabaka bye yabbaire alagiire. Awo ne balekayo okutumula naye; kubanga ekigambo ekyo tekyategeereibwe. ²⁸ Awo Yeremiya n'abba mu luya olw'abambowa okutuusya ku lunaku Yerusaalemi lwe kyamenyeibwe.