¹ Awo Zedekiya mutaane wa Yosiya n'afuga nga niiye kabaka mu kifo kya Koniya mutaane wa Yekoyakimu Nebukaduneeza kabaka w'e Babulooni gwe yafiire kabaka mu nsi ya Yuda. ² Naye teyawuliranga bigambo bya Mukama bye yatumuliire mu nabbi Yeremiya, iye waire abaidu be waire abantu ab'omu nsi. ³ Awo Zedekiya kabaka n'atuma Yekukaali mutaane wa Seremiya n'o Zefaniya mutaane wa Maaseya kabona eri nabbi Yeremiya, ng'atumula nti Tusabire eri Mukama Katonda waisu. ⁴ Era Yeremiya yayingiranga n'afulumanga mu bantu: kubanga babbaire bakaali kumuteeka mu ikomera. ⁵ Era eigye lya Falaawo lyabbaire liviire mu Misiri; awo Abakaludaaya ababbaire bazingizirye Yerusaalemi bwe baawuliire ebigambo byabwe, ne basaasaana okuva ku Yerusaalemi. ⁶ Awo ekigambo kya Mukama ne kiizira nabbi Yeremiya nga kitumula nti ⁷ Ati bw'atumula Mukama, Katonda wa Isiraeri, nti muti bwe mubba mukoba kabaka wa Yuda eyabatumire gye ndi okumbuulya; nti Bona, eigye lya Falaawo eritabaire okubayamba liriira mu Misiri mu nsi yabeene baayo. ⁸ Era Abakaludaaya baliirawo ne balwanisya ekibuga kino; era balikimenya ne bakyokya omusyo. ⁹ Ati bw'atumula Mukama nti Temwebbeya nga mutumula nti Abakaludaaya tebalireka kutuvaaku: kubanga tebalibavaaku. ¹⁰ Kuba waire nga mwandibbingire eigye lyonalyona ery'Abakaludaaya abalwaine naimwe ne musigala mu ibo ab'ebiwundu bonka, era naye bandigolokokere buli muntu mu weema ye ne bookya ekibuga kino omusyo: ¹¹ Awo olwatuukire eigye ery'Abakaludaaya bwe lyamalire okusaansaana okuva ku Yerusaalemi olw'okutya eigye lya Falaawo, ¹² kale Yeremiya n’afuluma mu Yerusaalemi okwaba mu nsi ya Benyamini okuweebwa omugabo gwe eyo wakati mu bantu. ¹³ Awo bwe yabbaire mu mulyango gwa Benyamini, omukulu w'abambowa yabbaire ali eyo, eriina lye Iriya mutaane wa Seremiya mutaane wa Kananiya; n'akwata Yeremiya nabbi ng'atumula nti osenga Abakaludaaya. ¹⁴ Awo Yeremiya n'atumula nti obbeya; tinsenga Bakaludaaya; naye n'atamuwulira: kale Iriya n'akwata Yeremiya n'amuleeta eri abakungu. ¹⁵ Awo abakungu ne basunguwalira Yeremiya ne bamukubba ne bamuteeka mu ikomera mu nyumba ya Yonasaani omuwandiiki; kubanga gye babbaire bafiire eikomera. ¹⁶ Awo Yeremiya bwe yatuukire mu nyumba ey'obwina n'o mu buyu, era Yeremiya bwe yabbaire ng'amalire enaku nyingi omwo; ¹⁷ awo Zedekiya kabaka n'atuma n'amusyoma: kabaka n'amubuulya kyama mu nyumba ye n'atumula nti waliwo ekigambo kyonakyona ekiviire eri Mukama? Awo Yeremiya n'atumula nti kiriwo. Era n'atumula nti oliweebwayo mu mukono gwa kabaka w’e Babulooni. ¹⁸ Era ate Yeremiya n'akoba kabaka Zedekiya nti nabbaire nkwonoonere mu ki oba abaidu bo oba abantu bano, n'okuteeka ne munteeka mu ikomera? ¹⁹ Banabbi banyu babbaire waina ababalagulanga nga batumula nti Kabaka w'e Babulooni talibatabaala, waire ensi eno? ²⁰ Kale wulira, nkwegayiriire, ai mukama wange kabaka: okwegayirira kwange kwikirizibwe mu maiso go, nkwegayiriire; oleke okungirya mu nyumba ya Yonasaani omuwandiiki, ndeke okufiira omwo. ²¹ Kale Zedekiya kabaka n'alagira ne bateeka Yeremiya mu luya olw'abambowa, ne bamuwa buli lunaku omugaati okuva ku luguudo abafumbi b'emigaati kwe babbanga, okutuusya emigaati gyonagyona egy'omu kibuga lwe gyaweirewo. Awo Yeremiya n'abba atyo mu luya olw'abambowa.