¹ Awo olwatuukire mu mwaka ogw'okuna ogwa Yekoyakimu Mutaane wa Yosiya kabaka we Yuda ekigambo kino ne kiizira Yeremiya ekyaviire eri Mukama nga kitumula nti ² Irira omuzingo gw'ekitabo, owandiike omwo ebigambo byonabyona bye nakukoberanga eri Isiraeri n'eri Yuda n'eri amawanga gonagona, okuva ku lunaku lwe natumwire naiwe, okuva ku mirembe gya Yosiya, ne watyanu. ³ Koizi enyumba ya Yuda baliwulira obubbiibi bwonabwona bwe nteesya okubakola; era baire buli muntu okuleka engira ye embiibbi; kaisi nsonyiwe obutali butuukirivu bwabwe n'ekibbiibi kyabwe. ⁴ Awo Yeremiya n'ayeta Baluki Mutaane wa Neriya; Baluki n'awandiika ku muzingo gw'ekitabo ng'atoola mu munwa gwa Yeremiya ebigambo byonabyona ebya Mukama bye yabbaire amukobeire. ⁵ Awo Yeremiya n'alagira Baluki ng'atumula nti nsibiibwe; tinsobola kuyingira mu nyumba ya Mukama: ⁶ kale yaba iwe osome mu muzingo gw'owandiikire ng'otoola mu munwa gwange ebigambo bya Mukama, mu matu g'abantu mu nyumba ya Mukama ku lunaku olw'okusiibiraku: era obisomanga n'o mu matu g'aba Yuda bonabona abava mu bibuga byabwe. ⁷ Koizi balireeta okwegayirira kwabwe mu maiso ga Mukama, ne baira buli muntu okuleka engira ye embiibbi: kubanga obusungu n'ekiruyi Mukama by'atumwire eri abantu bano binene. ⁸ Awo Baluki mutaane wa Neriya n'akola nga byonabyona bwe byabbaire Yeremiya nabbi bye yamulagiire, ng'asoma mu kitabo ebigambo bya Mukama mu nyumba ya Mukama. ⁹ Awo olwatuukire mu mwaka ogw'okutaanu ogwa Yekoyakimu mutaane wa Yosiya kabaka we Yuda, mu mwezi ogw'omwenda, abantu bonabona ababbaire mu Yerusaalemi n'abantu bonabona abaaviire mu bibuga bye Yuda ne baiza e Yerusaalemi ne balangirira okusiiba mu maiso ga Mukama. ¹⁰ Awo Baluki n'asoma mu kitabo ebigambo bya Yeremiya mu nyumba ya Mukama, mu kisenge kya Gemaliya mutaane wa Safani omuwandiiki, mu luya olw'engulu awayingirirwa mu mulyango omuyaka ogw'enyumba ya Mukama, mu matu g'abantu bonabona. ¹¹ Awo Mikaaya mutaane wa Gemaliya mutaane wa Safani bwe yawuliire mu kitabo ebigambo byonabyona ebya Mukama, ¹² n'aserengeta mu nyumba ya kabaka mu kisenge eky'omuwandiiki: kale, bona, abakungu bonabona nga batyaime omwo, Erisaama omuwandiiki n'o Deraya mutaane wa Semaaya n'o Erunasani mutaane wa Akubooli n'o Gemaliya mutaane wa Safani n'o Zedekiya mutaane wa Kananiya n'abakungu bonabona. ¹³ Awo Mikaaya kaisi n'ababuulira ebigambo byonabyona bye Yabbaire awuliire, Baluki bw'asomere ekitabo mu matu g'abantu. ¹⁴ Abakungu bonabona kyebaaviire batuma Yekudi mutaane wa Nesaniya mutaane wa Seremiya mutaane wa Kuusi eri Baluki nga batumula nti irira omuzingo gw'ekitabo mw'osomere mu matu g'abantu mu mukono gwo, oize. Awo Baluki mutaane wa Neriya n'airira omuzingo mu mukono gwe n'aiza gye baali. ¹⁵ Ne bamukoba nti tyama obisome mu matu gaisu. Kale Baluki n'abisoma mu matu gaabwe. ¹⁶ Awo olwatuukire bwe bamaliire okuwulira ebigambo byonabyona, ne balingangaku nga batya, ne bakoba Baluki nti titwaleke kubuulira kabaka ebigambo ebyo byonabyona. ¹⁷ Ne babuulya Baluki nga batumula nti tukobere, wawandiikire otya ebigambo ebyo byonabyona ng'otoola mu munwa gwe? ¹⁸ Awo Baluki n'abairamu nti niiye yankobeire ebigambo ebyo byonabyona n'omunwa gwe, nzena ne mbiwandiika ne bwino. ¹⁹ Awo abakungu ne bakoba Baluki nti yaba wegise, iwe n'o Yeremiya; so omuntu yenayena aleke okumanya gye muli. ²⁰ Awo ne bayingira eri kabaka mu luya; naye nga bamalire okugisa omuzingo mu kisenge kya Erisaama omuwandiiki; ne babuulira ebigambo byonabyona mu matu ga kabaka. ²¹ Awo kabaka n'atuma Yekudi okusyoma omuzingo: n'agutoola mu kisenge kya Erisaama omuwandiiki. Awo Yekudi n'agusoma mu matu ga kabaka n'o mu matu g'abakungu bonabona abayemereire okuliraana kabaka. ²² Awo kabaka Yabbaire atyaime mu nyumba ey'ebiseera by'obutiti mu mwezi ogw'omwenda: era omusyo nga guli mu lubbumbiro nga gwaka mu maiso ge. ²³ Awo olwatuukire Yekudi bwe yamalire okusoma empapula isatu oba ina, kabaka n'agusala n'akambe ak'omuwandiiki n'agusuula mu musyo ogwabbaire mu lubbumbiro, omuzingo ne guyiira mu musyo ogwabbaire mu lubbumbiro. ²⁴ So tibaatiire so tibakanwire bivaalo byabwe, kabaka waire abaidu be n'omumu abaawuliire ebigambo ebyo byonabyona. ²⁵ Era ate Erunasani n'o Deraya n'o Gemaliya babbaire bamwegayiriire kabaka obutayokya muzingo; naye n'ataikirirya kubawulira. ²⁶ Awo kabaka n'alagira Yerameeri omwana wa kabaka n'o Seraya mutaane wa Azuliyeeri n'o Seremiya mutaane wa Abudeeri okukwata Baluki omuwandiiki n'o Yeremiya nabbi: naye Mukama n'abagisa. ²⁷ Awo ekigambo kya Mukama ne kiizira Yeremiya, kabaka ng'amalire okwokya omuzingo n'ebigambo Baluki bye yawandiikire ng'abitoola mu munwa gwa Yeremiya, nga kitumula nti ²⁸ Irira ate omuzingo ogundi, owandiike omwo ebigambo byonabyona ebyasookere ebyabbaire mu muzingo ogw'oluberyeberye Yekoyakimu kabaka wa Yuda gw'ayokyerye. ²⁹ Era ebya Yekoyakimu kabaka wa Yuda olitumula nti Ati bw'atumula Mukama nti oyokyerye omuzingo guno ng'otumula nti Kiki ekikuwandikisirye omwo ng'otumula nti Kabaka w'e Babulooni talireka kwiza n'azikirirya ensi eno, era alimalawo omwo omuntu n'ensolo? ³⁰ Mukama kyava atumula ati ebya Yekoyakimu kabaka wa Yuda nti talibba na w'o kutyama ku ntebe ya Dawudi n'omumu: n'omulambo gwe gulisuulibwa eri olubbugumu emisana n'eri empewo obwire. ³¹ Era ndimubonererya n'eizaire lye n'abaidu be olw'obutali butuukirivu bwabwe; era ndibaleetaku n'o ku abo abali mu Yerusaalemi n'o ku basaiza be Yuda obubbiibi bwonabwona bwe nakabatumulaku, naye ne batawulira. ³² Awo Yeremiya n'airira omuzingo ogw'okubiri, n'agumuwa Baluki omuwandiiki mutaane wa Neriya; iye n'awandiika omwo ng'atoola mu munwa gwa Yeremiya ebigambo byonabyona eby'omu kitabo Yekoyakimu kabaka we Yuda kye yayokyerye mu musyo: era ne byongerwaku ebigambo bingi ebibifaanana.