¹ Ekigambo ekyaiziire Yeremiya ekyaviire eri Mukama mu mirembe gya Yekoyakimu Mutaane wa Yosiya kabaka we Yuda nga kitumula nti ² Yaba eri ekika eky'Abalekabu otumule nabo obayingirye mu nyumba ya Mukama, mu kisenge ekimu, obawe omwenge okunywa. ³ Kale ne ntwala Yaazaniya Mutaane wa Yeremiya Mutaane wa Kabaziniya na bagande be n'a bataane be bonabona n'ekika kyonakyona eky'Abalekabu; ⁴ ne mbayingirya mu nyumba ya Mukama, mu kisenge kya bataane ba Kanani Mutaane wa Igudaliya omusaiza wa Katonda, ekyaliraine ekisenge eky'abakungu, ekyabbaire waigulu w'ekisenge kya Maaseya Mutaane wa Salumu omwigali: ⁵ ne nteeka ebideku ebizwire omwenge n'ebikompe mu maiso g'abaana b'ekika eky'Abalekabu, ne mbakoba nti Munywe omwenge. ⁶ Naye ibo ne batumula nti tituunywe ku mwenge: kubanga Yonadaabu Mutaane wa Lekabu zeiza waisu yatulagiire ng'atumula nti timunywanga ku mwenge, imwe waire bataane banyu, emirembe gyonagyona: ⁷ so timuzimbanga nyumba so timusiganga nsigo, so timusimbanga lusuku lwe mizabbibu so timubbanga nagyo: naye mwamalanga enaku gyanyu gyonagyona mu weema; muwangaale enaku nyingi mu nsi gye mutyamamu. ⁸ Era twagondeire eidoboozi lya Yonadaabu Mutaane wa Lekabu zeiza waisu mu byonabyona bye yatukuutiire, obutanywanga ku mwenge enaku gyaisu gyonagyona, ife na bakali baisu na bataane baisu na bawala baisu; ⁹ Waire okwezimbira enyumba okutyamamu: so tubula lusuku lwe mizabbibu waire enimiro waire ensigo. ¹⁰ naye twabbanga mu weema ne tugonda ne tukola nga byonabyona bwe byabbaire Yonadaabu zeiza waisu bye yatulagiire. ¹¹ Naye olwatuukire Nebukaduneeza kabaka w'e Babulooni bwe yatabaire ensi, ne tutumula nti mwize twabe e Yerusaalemi olw'okutya eigye ery'Abakaludaaya n'olw'okutya eigye ery'Abasuuli; kyetuva tubba e Yerusaalemi. ¹² Awo ekigambo kya Mukama Kaisi ne kiizira Yeremiya nga kitumula nti ¹³ Ati bw'atumula Mukama w'eigye, Katonda wa Isiraeri, nti yaba obakobe abasaiza be Yuda n'abali mu Yerusaalemi nti timwaikirirye kwegeresebwa okuwulisisya ebigambo byange? bw'atumula Mukama. ¹⁴ Ebigambo bya Yonadaabu mutaane wa Lekabu bye yalagiire bataane be, obutanywanga ku mwenge, byatuukiriziibwe, so tibanywireku na guno gwiza, kubanga bagondeire ekiragiro kya zeiza wabwe: naye nze natumwire naimwe, nga ngolokoka mu makeeri ne ntumula; so timumpulisisyanga. ¹⁵ N'okutuma mbatumiire abaidu bange bonabona banabbi, nga ngolokoka mu makeeri ne mbatuma, nga ntumula nti mwire buli muntu okuleka engira ye embiibbi, mulongoosye ebikolwa byanyu, so temusengereryanga bakatonda abandi okubaweereryanga, kale mulityama mu nsi gye nawaire imwe na bazeiza banyu; naye temuteganga kitu kyanyu so temumpulisisyanga. ¹⁶ Kubanga bataane ba Yonadaabu mutaane wa Lekabu batuukiriirye ekiragiro kya zeiza wabwe kye yabalagiire, naye abantu bano tibampulisisirye; ¹⁷ Mukama, Katonda ow'eigye, Katonda wa Isiraeri, kyava atumula ati nti bona, ndireeta ku Yuda n'o ku abo bonabona abali mu Yerusaalemi obubbiibi bwonabwona bwe naakabatumulaku: kubanga natumwire nabo, naye ne batawulira; era mbetere, naye ne batavugira. ¹⁸ Awo Yeremiya n'akoba ekika eky'Abalekabu nti Ati bw'atumula Mukama w'eigye, Katonda wa Isiraeri, nti Kubanga mugondeire ekiragiro kya Yonadaabu zeiza wanyu ne mukwata byonabyona bye yakuutiire ne mukola nga byonabyona bwe byabbaire bye yabalagiire; ¹⁹ Mukama w'eigye, Katonda wa Isiraeri, kyava atumula ati nti Yonadaabu mutaane wa Lekabu taabulwenga musaiza wa kwemerera mu maiso gange enaku gyonagyona.