¹ Ekigambo ekyaiziire Yeremiya okuva eri Mukama, Nebukaduneeza kabaka w’e Babulooni n'eigye lye lyonalyona n'ensi gyonagyona egya bakabaka egy'oku nsi gyatwaire n'amawanga gonagona bwe baalwaine ne Yerusaalemi n'ebibuga byakyo byonabyona, nga kitumula nti ² Ati bw'atumula Mukama Katonda wa Isiraeri nti yaba okobe Zedekiya kabaka wa Yuda omukobere nti Ati bw'atumula Mukama nti Bona, ndigabula ekibuga kino mu mukono gwa kabaka w'e Babulooni, era alikyokya omusyo: ³ so naiwe toliwona mu mukono gwe, naye tolireka kuwambibwa n'oweebwayo mu mukono gwe; n'amaiso go galibona amaiso ga kabaka w'e Babulooni, era alitumula naiwe munwa na munwa, era olyaba e Babulooni. ⁴ Era naye wulira ekigambo kya Mukama, ai Zedekiya kabaka we Yuda; ati bw'atumula Mukama ku iwe nti tolifa ne kitala; ⁵ olifa mirembe; era ng'okwokya bwe kwabbanga okwa bazeizabo bakabaka ab'eira abakusookere, batyo bwe balikukolera okwokya; era balikukungubagira nga batumula nti woowe, Mukama waisu! kubanga ntumwire ekigambo ekyo, bw'atumula Mukama. ⁶ Awo Yeremiya nabbi n'akoba Zedekiya kabaka wa Yuda ebigambo ebyo byonabyona mu Yerusaalemi, ⁷ Eigye lya kabaka w’e Babulooni bwe lyabbaire nga lirwana ne Yerusaalemi n'ebibuga byonabyona ebye Yuda ebyabbaire bisigairewo, Lakisi ne Azeka; kubanga ebyo byonka niibyo byasigairewo ku bibuga by'e Yuda nga biriku enkomera. ⁸ Ekigambo ekyaiziire Yeremiya okuva eri Mukama, kabaka Zedekiya bwe yabbaire ng'amalire okulagaana endagaanu n'abantu bonabona ababbaire mu Yerusaalemi, okubalangirira eidembe; ⁹ buli muntu ate omwidu we na buli muntu ate omuzaana we, oba nga Omwebbulaniya, musaiza oba Mukali, okubba ow'eidembe; waleke okubbaawo abafuula abaidu, Omuyudaaya mugande we: ¹⁰ awo abakungu bonabona n'abantu bonabona ne bagonda, ababbaire balagaine endagaanu buli muntu okwita omwidu we na buli muntu okwita omuzaana we okubba ow'eidembe, baleke kufuulibwa abaidu ate; ne bagonda ne babaita: ¹¹ naye oluvannyuma ne bakyuka, ne bairyawo abaidu n'abazaana be babbaire bateekere, ne babafuga okubba abaidu n'abazaana: ¹² ekigambo kya Mukama kyekyaviire kiizira Yeremiya okuva eri Mukama nga kitumula nti ¹³ Ati bw'atumula Mukama Katonda wa Isiraeri nti Nalagaine endagaanu n'a bazeiza banyu ku lunaku kwe nabatoleire mu nsi y'e Misiri mu nyumba ey'obwidu, nga ntumula nti ¹⁴ Emyaka musanvu bwe giwangaku, mulekulanga buli muntu mugande we Omwebbulaniya gwe bakugulirye era eyakuweereirye emyaka mukaaga, omulekulanga okubba ow'eidembe okuva w'oli: naye bazeiza banyu ne batampulira, so tebaatega kitu kyabwe. ¹⁵ mwena atyanu mwabbaire mukyukire era nga mukolere ekiri mu maiso gange ekisa, nga mulangirira eidembe buli muntu eri mwinaye; era mwabbaire mulagaine endagaanu mu maiso gange mu nyumba etuumiibwe eriina lyange: ¹⁶ Naye ne mukyuka ne muvumisya eriina lyange, ne mwiryawo buli muntu omwidu we na buli muntu omuzaana we, be mwabbaire mutekere okubba ab'eidembe nga bwe bataka; ne mubafuga okubba gye muli abaidu n'abazaana. ¹⁷ Mukama kyava atumula ati nti timumpuliire okulangirira edembe buli muntu eri mugande we na buli muntu eri mwinaye: bona, nze mbalangirira imwe eidembe, bw'atumula Mukama, eri ekitala n'eri kawumpuli n'eri enjala; era ndibawaayo okuyuuguumizibwa eruuyi n'eruuyi mu nsi gyonagyona egya bakabaka egy'oku itakali. ¹⁸ Era ndiwaayo abasaiza abaasoberye endagaanu yange abatakolere bigambo bye ndagaanu gye balagaine mu maiso gange, bwe basalire mu nyana ebitundu ebibiri ne babita wakati w'ebitundu byayo; ¹⁹ Abakungu b'e Yuda n'abakungu be Yerusaalemi, abalaawe na bakabona n'abantu bonabona ab'omu nsi ababitire wakati w'ebitundu by'enyana; ²⁰ okuwaayo ndibawaayo mu mukono gw'abalabe baabwe n'o mu mukono gw'abo abasagira obulamu bwabwe: n'emirambo gyabwe giribba mere eri enyonyi egy'omu igulu n’eri ensolo egy'omu nsi. ²¹ Era Zedekiya kabaka w'e Yuda n'abakungu be ndibawaayo mu mukono gw'abalabe baabwe, n'o mu mukono gw'abo abasagira obulamu bwabwe, n'o mu mukono gw'eigye lya kabaka w’e Babulooni ababaviireku abambusye. ²² Bona, ndiragira, bw'atumula Mukama, ne mbairyawo ku kibuga kino; era balirwana nakyo ne bakimenya ne bakyokya omusyo: era ndifuula ebibuga bye Yuda amatongo nga mubula abibbaamu.