¹ Era ate ekigambo kya Mukama ne kiizira Yeremiya omulundi ogw'okubiri, bwe yabbaire ng'akaali kusibibwa mu luya olw'abambowa, nga kitumula nti ² Ati bw'atumula Mukama akikola, Mukama akibbumba okukinywezya Mukama niilyo liina lye; nti ³ Njeta, nzena navugira ni nkulaga ebikulu n'ebizibu by'otomaite. ⁴ Kubanga ati bw'atumula Mukama Katonda wa Isiraeri eby'enyumba egy'omu kibuga kino n'eby'enyumba gya bakabaka be Yuda egyabizibwa okulwana ne nkomera n'ekitala, nti ⁵ Baizire okulwana n'Abakaludaaya, naye kugizulya bwizuli mirambo gya bantu be nziikire n'obusungu bwange n'ekiruyi kyange, obubbiibi bwabwe bwonabwona bwe bungisisirye amaiso gange ekibuga kino: ⁶ Bona, ndikireetera obulamu n'okuwonyezebwa, nzena ndibawonya; era ndibabiikulira emirembe n'amazima bingi inu dala. ⁷ Era ndiiryawo obusibe bwe Yuda n'obusibe bwe Isiraeri, era ndibazimba ng'oluberyeberye. ⁸ Era ndibanabyaku obutali butuukirivu bwabwe bwonabwona bwe banyonoonere; era ndisonyiwa obutali butuukirivu bwabwe bwonabwona bwe banyonoonere era bwe bansoberye. ⁹ N'ekibuga kino kiribba gye ndi eriina ery'eisanyu, n'eitendo n'ekitiibwa, mu maiso g'amawanga gonagona ag'oku nsi agaliwulira obusa bwonabwona bwe mbakola, ne batya ne batengera olw'obusa bwonabwona n'olw'emirembe gyonagyona bye nkifunira. ¹⁰ Ati bw'atumula Mukama nti olibba olyawo ne muwulirwa mu kifo kino kye mutumulaku nti kizikire, mubula muntu waire ensolo, mu bibuga bye Yuda n'o mu nguudo egy'e Yerusaalemi egizikire nga mubula muntu waire agibbamu, era nga mubula nsolo, ¹¹ eidoboozi ery'okusanyuka n'eidoboozi ery'okujaguza, eidoboozi ly'akwa omugole n'eidoboozi ly'omugole, eidoboozi ly'abo abatumula nti Mumwebalye Mukama w'eigye kubanga Mukama musa, kubanga okusaasira kwe kwo lubeerera: n'ery'abo abaleeta saddaaka egy'okwebalya mu nyumba ya Mukama. Kubanga ndiiryawo obusibe obw'ensi ng'oluberyeberye, bw'atumula Mukama w'eigye. ¹² Ati bw'atumula Mukama w'eigye nti olibba olyawo ne mubba mu kifo kino ekizikire, nga mubula muntu era nga mubula nsolo, n'o mu bibuga byakyo byonabyona, olusiisira olw'abasumba abagalamilya ebisibo byabwe. ¹³ Ebisibo biribita ate wansi w'emikono gy'oyo abibala mu bibuga eby'omu nsi ey'ensozi n'o mu bibuga eby'omu nsi ey'ensenyu n'o mu bibuga eby'obukiika obulyo n'o mu nsi ya Benyamini n'o mu bifo ebiriraine Yerusaalemi n'o mu bibuga bye Yuda, bw'atumula Mukama. ¹⁴ bona, enaku giiza, bw'atumula Mukama, lwe ndituukirirya ekigambo ekyo ekisa kye natumwire ku nyumba ya Isiraeri n'o ku nyumba ya Yuda. ¹⁵ Mu naku egyo n'o mu biseera ebyo ndimererya Dawudi eitabi ery'obutuukirivu; era oyo alituukirirya eby'obutuukirivu n'eby'ensonga mu nsi. ¹⁶ Mu naku egyo Yuda alirokoka ne Yerusaalemi kirityama mirembe: ne lino niilyo liina lye kirituumibwa, nti Mukama niibwo butuukirivu bwaisu. ¹⁷ Kubanga ati bw'atumula Mukama nti Dawudi taabulwenga musaiza w'o kutyama ku ntebe ey'enyumba ya Isiraeri emirembe gyonagyona; ¹⁸ so na bakabona, Abaleevi, tebaabulwenga musaiza mu maiso gange ow'okuwangayo ebiweebwayo ebyokyebwa n'okwokya ebitone n'okusalanga saddaaka olutalekula. ¹⁹ Awo ekigambo kya Mukama ne kiizira Yeremiya nga kitumula nti ²⁰ Ati bw'atumula Mukama nti Oba nga musobola okumenya endagaanu yange ey'emisana n'endagaanu yange ey'obwire, waleke okubbaawo emisana n'obwire mu ntuuko gyabyo; ²¹ kale n’endagaanu esoboka okumenyeka eri Dawudi omwidu wange, aleke okubba n'omwana okufugira ku ntebe ye; n'eri Abaleevi, bakabona, abaweererya bange. ²² Ng'eigye ery'omu igulu bwe litasoboka kubalibwa, so n'omusenyu ogw'enyanza okugerebwa; ntyo bwe ndyalya eizaire lya Dawudi omwidu wange n'Abaleevi abampeererya. ²³ Awo ekigambo kya Mukama ne kiizira Yeremiya nga kitumula nti ²⁴ Tolowooza abantu bano bye batumwire! nti enda gyombiri Mukama gye yalondere agiswiire? batyo bwe banyooma abantu bange baleke okubba ate eigwanga mu maiso gaabwe. ²⁵ Ati bw'atumula Mukama nti Endagaanu yange ey'emisana n'obwire oba nga tenywera, oba nga tinateekerewo biragiro by'e igulu n'e nsi; ²⁶ kale ndisuula n'eizaire lya Yakobo n'erya Dawudi omwidu wange, ndeke okutwala ku zaire lye okufuganga eizaire lya Ibulayimu n'o Isaaka n'o Yakobo: kubanga ndiiryawo obusibe bwabwe, era ndibasaasira.