¹ Ekigambo ekyaiziire Yeremiya okuva eri Mukama mu mwaka ogw'eikumi ogwa Zedekiya kabaka we Yuda, niigwo gwabbaire omwaka ogw'eikumi n'omunaana ogwa Nebukaduneeza. ² Awo mu biseera ebyo eigye lya kabaka w'e Babulooni lyabbaire lizingizirye Yerusaalemi: n'o Yeremiya nabbi yabbaire asibiibwe mu luya olw'abambowa, olwabbaire mu nyumba ya kabaka we Yuda. ³ Kubanga Zedekiya kabaka we Yuda yabbaire amusibire ng'atumula nti kiki ekikulagulisirye n'otumula nti ati bw'atumula Mukama nti bona, ndiwaayo ekibuga kino mu mukono gwa kabaka w'e Babulooni, yena alikimenya; ⁴ N'o Zedekiya kabaka we Yuda taliwona mu mukono gw'Abakaludaaya, naye talireka kuweebwayo mu mukono gwa kabaka w'e Babulooni, era alitumula naye munwa n'amunwa, n'amaiso ge galibona amaiso g'oyo; ⁵ era alitwala Zedekiya e Babulooni, era alibba eyo okutuusya lwe ndimwizira, bw'atumula Mukama: waire nga mulwana n'Abakaludaaya, temulibona kisa. ⁶ Awo Yeremiya n'atumula nti ekigambo kya Mukama kyaizire gye ndi nga kitumula nti ⁷ Bona, Kanameri Mutaane wa Salumu koiza wo aliiza gy'oli ng'atumula nti wegulire enimiro yange eri mu Anasosi: kubanga okuginunula kukwo. ⁸ Awo Kanameri omwana wa koiza wange n'aiza gye ndi mu luya olw'abambowa, ng'ekigambo bwe kyabbaire ekya Mukama, n'ankoba nti nkwegayiriire, gula enimiro yange eri mu Anasosi ekiri mu nsi ye Benyamini: kubanga obusika bubwo, n'okuginunula kukwo; weegulire wenka. Kale kaisi ne ntegeera ng'ekyo niikyo ekigambo kya Mukama. ⁹ Ne ngula enimiro eyabbaire mu Anasosi eri Kanameri omwana wa koiza wange, ne mupimira efeeza, sekeri egy'e feeza ikumi na musanvu. ¹⁰ Ne mpandiika eriina lyange ku kiwandiike ne nkiteekaku akabonero, ne njeta abajulizi ne mupimira efeeza mu minzaani. ¹¹ Awo ne ntoola ekiwanduke eky'okugula, ekyo ekiteekeibweku akabonero ng'eiteeka n'empisa bwe biri, era n'ekyo ekitaali kisibe: ¹² ne mpaayo ekiwandiike eky'okugula eri Baluki Mutaane wa Neriya Mutaane wa Maseya, Kanameri omwana wa koiza wange nga aliwo n'abajulizi nga baliwo abaawandiikire amaina gaabwe ku kiwandiike eky'okugula mu maiso g'Abayudaaya bonabona abatyamanga mu luya olw'abambowa. ¹³ Ne nkuutira Baluki mu maiso gaabwe nga ntumula nti ¹⁴ Ati bw'atumula Mukama w'eigye Katonda wa Isiraeri nti irira ebiwandiike bino, ekiwandiike kino eky'okugula, ekyo ekiteekeibweku akabonero era n'ekiwandiike kino ekitali kisibe, obigise mu kintu eky'eibbumba; bimale enaku nyingi. ¹⁵ Kubanga ati bw'atumula Mukama w'eigye Katonda wa Isiraeri nti olibba olyawo enyumba n'enimiro n’ensuku egy'emizabbibu ne bigulirwa ate mu nsi eno. ¹⁶ Awo nga malire okuwaayo ekiwandiike eky'okugula eri Baluki Mutaane wa Neriya, ne nsaba Mukama nga ntumula nti ¹⁷ Ai Mukama Katonda! Bona, watondere eigulu n'ensi n'obuyinza bwo obungi n'omukono gwo ogwagoloilwe; wabula kigambo ekikulema: ¹⁸ akola enkumi n'enkumi eby'ekisa, n'osasula obutali butuukirivu bwa baitawabwe mu kifubba ky'abaana baabwe abairawo; Katonda omukulu ow'amaani, Mukama ow'eigye niilyo liina lye: ¹⁹ omukulu mu kuteesya: era ow'amaani mu kukola emirimu: amaiso go galingirira amangira gonagona ag'abaana b'abantu; okuwa buli muntu ng'amangira ge bwe gali era ng'ebibala by'ebikolwa bye bwe biri: ²⁰ eyateekerewo obubonero n'eby'amagero mu nsi y'e Misiri ne watyanu, mu Isiraeri era n'o mu bantu abandi; ne weefunira eriina nga atyanu: ²¹ n'otoola abantu bo Isiraeri mu nsi y'e Misiri n'obubonero n'eby'amagero n'engalo egy'amaani n'omukono ogwagoloilwe n'entiisya nyingi; ²² n'obawa ensi eno gye walayiriire bazeiza babwe okubawa, ensi ekulukuta amata n'omujenene gw'enjoki; ²³ ne bayingira ne bagirya; naye ne batagondera idoboozi lyo, so tebaatambuliire mu mateeka go; tibaakolanga kigambo kyonakyona ku ebyo byonabyona bye wabalagiire okukola: kyewaviire obaleetaku obubbiibi buno bwonabwona ²⁴ bona entuumu, gituukire mu kibuga okukimenya; ekibuga n'ekiweebwayo mu mukono gw'Abakaludaaya abalwana nakyo olw'ekitala n’enjala n'o kawumpuli: era ebyo bye watumwire bituukiriire; era, bona obiringiriire. ²⁵ Era onkobere ai Mukama Katonda, nti weegulire enimiro n'ebintu oyete abajulizi era naye ekibuga kiweweibweyo mu mukono gw'Abakaludaaya. ²⁶ Awo ekigambo kya Mukama ne kiizira Yeremiya nga kitumula nti ²⁷ Bona, nze ndi Mukama Katonda w'abo bonabona abalina omubiri: waliwo ekigambo kyonakyona ekinema? ²⁸ Mukama kyava atumula ati nti bona, ndiwaayo ekibuga kino mu mukono gw'Abakaludaaya mu mukono gwa Nebukaduleeza kabaka w’e Babulooni, era alikimenya: ²⁹ n'Abakaludaaya abawanyisya ekibuga kino baliiza balikoleerya ekibuga kino ne bakyokya n’enyumba gye bayoterereryangaku waigulu obubaane Baali, ne bafukira bakatonda abandi ebiweebwayo ebyokunywa okunsunguwalya. ³⁰ Kubanga abaana ba Isiraeri n'abaana ba Yuda bakakolere ebyabbaire ebibbiibi mu maiso gange ebyereere okuva mu butobuto bwabwe kubanga abaana ba Isiraeri bansunguwairye busunguwali n'omulimu ogw'engalo gyabwe, bw'atumula Mukama. ³¹ Kubanga ekibuga kino kyaleetanga obusungu bwange n’ekiruyi kyange okuva ku lunaku lwe bakizimbire ne watyanu; nkiijulule okukitoola mu maiso gange: ³² olw'obubbiibi bwonabwona obw'abaana ba Isiraeri n'obw'abaana ba Yuda bwe baakolere okunsunguwalya, ibo na kakabaka baabwe, abakungu baabwe, bakabona baabwe na banabbi baabwe, n'abasaiza ba Yuda n'abali mu Yerusaalemi. ³³ Era bankubbire nkoone so ti maiso: era waire nga nabegereserye, nga ngolokoka mu makeeri ne mbegeresya; naye tebaawulisisyanga okwikirirya okwega. ³⁴ Naye ne bateeka emizizyo gyabwe mu nyumba eyetebwa eriina lyange okugyonoona. ³⁵ Era baazimba ebifo ebigulumivu ebya Baali ebiri mu kiwonvu kya nutaane wa Kinomu, okubitya bataane baabwe n'abawala baabwe mu musyo eri Moleki; kye ntabalagiranga so tekiizanga mu mwoyo gwange, bakole omuzizo ogwo; okwonoonesya Yuda. ³⁶ Kale ati bw'atumula Mukama Katonda wa Isiraeri eby'ekibuga kino kye mutumulaku nti Kiweweibweyo mu mukono gwa kabaka w’e Babulooni, olw'ekitala n'enjala n'o kawumpuli, nti ³⁷ Bona, ndibakuŋaanya okubatoola mu nsi gyonagyona gye nababbingiire mu busungu bwange n'o mu kiruyi kyange n'o mu bulalu obungi: era ndibairyawo mu kifo kino, era ndibatyamisya mirembe: ³⁸ era baabbanga bantu bange, nzeena naabbanga Katonda waabwe: ³⁹ era ndibawa omwoyo gumu n'engira yimu bantyenga enaku gyonagyona; kaisi babbenga kusa ibo n'abaana baabwe abaliirawo: ⁴⁰ era ndiragaana nabo endagaanu eteriwaawo, obutakyuka okubaleka okubakola okusa; era nditeeka entiisya yange mu mwoyo gyabwe baleke okunvaaku. ⁴¹ Niiwo awo, ndibasanyukira okubakolanga okusa, era tindireka kubasimba mu nsi eno n'omwoyo gwange gwonagwona n'emeeme yange yonayona. ⁴² Kubanga ati bw'atumula Mukama nti nga bwe ndeetere obubbiibi buno bwonabwona obunene ku bantu bano, ntyo bwe ndibaleetaku obusa bwonabwona bwe nabasuubizirye. ⁴³ Kale enimiro girigulirwa mu nsi eno gye mutumulaku nti ezikire, mubula muntu waire ensolo; eweweibweyo mu mukono gw'Abakaludaaya. ⁴⁴ Abantu baligula enimiro n'ebintu, ne bawandiika amaina gaabwe ku biwandiike ne babiteekaku obubonero ne beeta abajulizi mu nsi ya Benyamini n'o mu bifo ebiriraine Yerusaalemi n'o mu bibuga bya Yuda n'o mu bibuga eby'omu nsi ey'ensozi n'o mu bibuga eby'omu nsenyu no mu bibuga eby'obukiika obulyo: kubanga ndiryawo obusibe bwabwe, bw'atumula Mukama.