¹ Mu biseera ebyo, bw'atumula Mukama, ndibba Katonda w'enda gyonagyona egya Isiraeri, boona balibba bantu bange. ² Ati bw'atumula Mukama nti abantu abafiikirewo ku kitala baboine ekisa mu idungu; Isiraeri, bwe nayabire okumuwumulya ³ Mukama yambonekeire ira ng'atumula nti niiwo awo, nkutakire n'okutaka okutaliwaawo: kyenviire nkuwalula n'ekisa. ⁴ Ndikuzimba ate, wena olizimbibwa, iwe omuwala wa Isiraeri: oliyonjebwa ate n'ebitaasa byo, era olifuluma mu kukina ku abo abasanyuka. ⁵ Olisimba ate ensuku egy'emizabbibu ku nsozi egy'e Samaliya: abasimbi balisimba ne balya ebibala byamu. ⁶ Kubanga olunaku lulituuka abo abakuumira ku nsozi gya Efulayimu lwe balikunga nti nugolokoke, twambuke e Sayuuni eri Mukama Katonda waisu. ⁷ Kubanga ati bw'atumula Mukama nti mwembe olwa Yakobo n'eisanyu, mutumulire waigulu olw'omukulu w'amawanga: mulange, mutendereze, mutumule nti Ai Mukama, lokola abantu bo abafiikirewo ku Isiraeri. ⁸ Bona, ndibatoola mu nsi ey'obukiika obugooda, ne mbakuŋaanya okuva mu njuyi gy'ensi egikomererayo, era wamu nabo omuwofu w'amaiso n'awenyera, omukali ali ekida n'oyo alumwa okuzaala wamu: baliirawo wano ekibiina kinene. ⁹ Baliiza nga bakunga amaliga, era ndibaleeta nga beegayirira: ndibatambulya ku mbali kw'emiiga egirimu amaizi, mu ngira engolokofu mwe batalyesitala: kubanga ndi itaaye eri Isiraeri, ne Efulayimu niiye muberyeberye wange. ¹⁰ Muwulire ekigambo kya Mukama, imwe amawanga, mukibuulirire ku bizinga ebiri ewala; mutumule nti oyo eyasaansaanirye Isiraeri niiye alimukuŋaanya, era yamukuumanga ng'omusumba bw'akuuma ekisibo kye ¹¹ Kubanga Mukama anunwire Yakobo, era amugulire okumutoola mu mukono gw'oyo eyamusingire amaani. ¹² Kale baliiza ne bembera ku ntiiko ya Sayuuni, era balikulukutira wamu awali obusa bwa Mukama, awali eŋaanu n'awali omwenge n'awali amafuta n'awali abaana b'embuli n'ab'ente: n'emeeme yaabwe eribba ng'olusuku olufukirirwa amaizi, so tebalibbaaku bwinike ate n'akadiidiiri. ¹³ Awo omuwala lw'alisanyukira amakina, n'abaisuka n'abakaire wamu: kubanga okukungubaga kwabwe ndikufuula eisanyu, era ndibakubbagizya ne mbasanyusya okuva mu bwinike bwabwe. ¹⁴ Era ndinyisya amasavu, emeeme ya bakabona, n'abantu bange baliikuta obusa bwange, bw'atumula Mukama. ¹⁵ Ati bw'atumula Mukama nti eidoboozi liwuliirwe mu Laama, okukungubaga n'okukunga amaliga mangi, Laakeeri ng'akungira abaana be; agaana okukubbagizibwa olw'abaana be, kubanga tiwakaali. ¹⁶ Ati bw'atumula Mukama nti zibiikirirya eidoboozi lyo lireke okukunga, n’amaiso go galeke okuleeta amakiga: kubanga omulimu gwo guliweebwa empeera, bw'atumula Mukama; era baliira ate okuva mu nsi y'omulabe. ¹⁷ Era waliwo eisuubi ery'enkomerero yo, bw'atumula Mukama; n'abaana bo baliiza ate mu nsalo yaabwe ibo. ¹⁸ Mazima mpuliire Efulayimu nga yeekungiraku ati nti onkangaviire ne nkagavulwa ng'enyana etemanyiriire ejooko; nkyusya iwe nzena nakyusibwa; kubanga niiwe Mukama Katonda wange. ¹⁹ Mazima bwe namalire okukyusibwa ne neenenya; era bwe namalire okuyigirizibwa ne nkubba ku kisambi kyange: nakwatiibwe ensoni, niiwo awo, naswaire kubanga nasitwire ekivumi eky'omu butobuto bwange. ²⁰ Efulayimu mwana wange omutakibwa? mwana ansanyusya? kubanga buli lwe mutumulaku okubbiibi nkyamwijukira inu dala: omwoyo gwange kyeguviire gunuma ku lulwe; tindireka kumukwatirwa ekisa, bw'atumula Mukama. ²¹ Weesimbire obubonero ku ngira, weekolere empango egitegeeza: teeka omwoyo gwo awali oluguudo, niiyo engira gye wafulumiremu: iraawo, ai omuwala wa Isiraeri, iraawo mu bibuga byo bino. ²² Olituukya waina okutambula ng'oira eno n'edi, ai iwe omuwala aira enyuma? kubanga Mukama atondere ekigambo ekiyaka mu nsi, omukali alyetooloola omusaiza. ²³ Ati bw'atumula Mukama w'eigye Katonda wa Isiraeri nti olibba olyawo ne batumula ate ekigambo kino mu nsi ye Yuda n'o mu bibuga byayo, bwe ndiiryawo obusibe bwabwe, nti Mukama akuwe omukisa, iwe ekifo omubba obutuukirivu, iwe olusozi olw'obutukuvu. ²⁴ Awo Yuda n'ebibuga byayo byonabyona balityama omwo wamu; abalimi n'abo abatambula nga balina ebisibo. ²⁵ Kubanga njikutirye emeeme ekoowere, na buli meeme eriku obuyinike ngiizwiirye. ²⁶ Awo kaisi ne nzuuka ne mbona; endoolo gyange ne gimpoomera. ²⁷ bona, enaku giiza, bw'atumula Mukama, lwe ndisiga enyumba ya Isiraeri n'enyumba ya Yuda n'eikoti ely'abantu n'eikoti ely'ensolo. ²⁸ Awo olulituuka nga bwe nabalabiriranga okusimbula n'okumenyaamenya n'okusuula n'okuzikirirya n'okubonyaabonya; ntyo bwe ndibalabirira okuzimba n'okusimba, bw'atumula Mukama. ²⁹ Mu naku egyo nga tebakaali batumula ate nti Baitawabwe baliire eizabbibu erinyuunyuntula, n'amainu g'abaana ganyenyeera. ³⁰ Naye buli muntu alifa olw'obutali butuukirivti bwe iye: buli muntu alya eizabbibu erinyuunyuntula, amainu ge niigo galinyenyeera. ³¹ bona, enaku giiza, bw'atumula Mukama, lwe ndiragaana endagaanu enjaaka n'enyumba ya Isiraeri n'enyumba ya Yuda: ³² ti ng'endagaanu bwe yabbaire gye nalagaine ne bazeiza babwe ku lunaku lwe nabakwaite ku mukono okubatoola mu nsi y'e Misiri; endagaanu yange eyo ne bagimenya waire nga nabbaire mbakweire, bw'atumula Mukama. ³³ Naye eno niiyo ndagaano gye ndiragaana n'enyumba ya Isiraeri oluvanyuma lw'enaku egyo, bw'atumula Mukama; nditeeka amateeka gange mu bitundu byabwe eby'omunda, era mu mwoyo gwabwe mwe ndigawandiikira; nzena naabbanga Katonda waabwe, boona baabbanga bantu bange: ³⁴ nga olwo omuntu takaali ayegeresya mwinaye na buli muntu mugande we nga batumula nti manya Mukama: kubanga bonabona balimanya, okuva ku mutomuto ku ibo okutuuka ku mukulu ku ibo, bw'atumula Mukama: kubanga ndisonyiwa obutali butuukirivu bwabwe, n'ekibbiibi kyabwe tindikiijukira ate. ³⁵ Atyo bw'atumula Mukama awa eisana okwakanga emisana n'okulagira okw'omwezi n'emunyeenye okwakanga obwire, afukula enyanza amayengo gaayo ne gawuuma; Mukama w'eigye niilyo liina lye, nti ³⁶ Ebiragiro bino bwe biriva mu maiso gange, bw'atumula Mukama, kale n'eizaire lya Isiraeri lirireka okubba eigwanga mu maiso gange enaku gyonagyona. ³⁷ Ati bw'atumula Mukama nti eigulu eriri waigulu oba nga lisoboka okugerebwa, n'emisingi gy'ensi oba nga gisoboka okukeberwa wansi, kale nzena ndisuula eizaire lyonalyona erya Isiraeri olwa byonabyona bye bakolere, bw'atumula Mukama. ³⁸ Bona, enaku giiza, bw'atumula Mukama, ekibuga lwe kirizimbirwa Mukama okuva ku kigo kya Kananeri okutuuka ku mulyango ogw'oku nsonda. ³⁹ Olibba olyawo omuguwa ogugera ne gufuluma nga gwitulukukire okutuuka ku lusozi Galebu, era gulikyuka ne gutuuka ku Gowa. ⁴⁰ N'ekiwonvu kyonakyona eky'emirambo n'eky'eikoke n'enimiro gyonagyona okutuuka ku kaiga Kidulooni, okutuuka ku nsonda ey'omulyango ogw'embalaasi okwolekera ebuvaisana, kiribba kitukuvu eri Mukama: so tekirisimbulwa so tekirisuulibwa ate emirembe gyonagyona.