¹ Ekigambo ekyaizire eri Yeremiya okuva eri Mukama nga kitumula nti ² Ati bw'atumula Mukama Katonda wa Isiraeri nti Weewandiikire mu kitabo ebigambo byonabyona bye nakakukobera. ³ Kubanga enaku giiza, bw'atumula Mukama, lwe ndikyusya ate obusibe bw'abantu bange Isiraeri ne Yuda, bw'atumula Mukama: era ndibairyawo mu nsi gye nawaire bazeiza babwe, era baligirya. ⁴ Era bino niibyo bigambo Mukama bye yatumwire ebya Isiraeri n'ebya Yuda. ⁵ Kubanga ati bw'atumula Mukama nti tuwuliire eidoboozi ery'okutengera, ery'okutya so ti lye mirembe. ⁶ Mubuulye mubone oba ng'omusaiza alumwa okuzaala: kiki ekimbonesya buli musaiza emikono gye nga gikwaite mu nkeendekende ng'omukali alumwa okuzaala, n'amaiso gonagona gafuukire eibala lyago? ⁷ Woowe kubanga olunaku olwo lukulu so wabula lulwekankana: niikyo kiseera Yakobo mw'abonera enaku; naye alirokoka mu igyo. ⁸ Awo olulituuka ku lunaku olwo, bw'atumula Mukama w'eigye, ndimenya ejooko ye ku ikoti ryo, era ndikutula ebisiba byo; so banaigwanga nga tebakaali bamufuula mwidu ate: ⁹ naye balibba baidu ba Mukama Katonda waabwe n'o Dawudi kabaka waabwe gwe ndibayimusirya. ¹⁰ Kale totya, ai Yakobo omwidu wange, bw'atumula Mukama; so tokeŋentererwa, ai Isiraeri: kubanga, bona, ndikulokola nga nyema wala, n'eizaire lyo nga nyema mu nsi ey'obusibe bwabwe; awo Yakobo aliirawo, era alitereera, alyeikya, so tewalibba alimutiisya. ¹¹ Kubanga nze ndi wamu naiwe, bw'atumula Mukama, okukulokola: kubanga ndimalirawo dala amawanga gonagona gye nakusaansaanirye, naye iwe tindikumalira dala: naye ndikubuulirira mpola, so tindikuleka n'akatono nga tobonerezebwa. ¹² Kubanga ati bw'atumula Mukama nti eibbwa lyo teriwonyezeka, n'ekiwundu kyo kye kitalo. ¹³ wabula wo kukuwozererya, onyigibwe: obula bulezi obuwonya. ¹⁴ Baganzi bo bonabona bakwerabiire; tebakusagira: kubanga nkusumitire ekiwundu eky'omulabe, okukangavula okw'omukambwe; kubanga obutali butuukirivu bwo bungi, kubanga Ebibbiibi byo byabbaire byeyongeire. ¹⁵ Okungira ki olw'ekiwundu kyo? obulumi bwo tebuwonyezeka: kubanga obutali butuukirivu bwo bungi, kubanga ebibbiibi byo byabbaire byeyongeire, kyenviire nkukola ebyo. ¹⁶ Abo bonabona abakuliire kyebaliva baliibwa; n'abalabe bo bonabona buli mumu ku ibo balyaba mu kusibibwa; n'abo abakunyagire balibba munyago, n'abo bonabona abakuyiiga ndibagabula okubba omuyiigo. ¹⁷ Kubanga ndikwiriryawo obulamu, era ndikuwonya ebiwundu byo, bw'atumula Mukama; kubanga bakwetere eyabbingiibwe, nga batumula nti niiye Sayuuni omuntu yennayena gw'atasagira. ¹⁸ Ati bw'atumula Mukama nti bona, ndikyusya ate obusibe bw'eweema gya Yakobo, era ndisaasira enyumba gye; n'ekibuga kirizimbibwa ku kifunvu kyakyo, n'olubiri lulisigalawo ng'engeri yaalwo bw'eri. ¹⁹ Awo mu ibyo muliva okwebalya n'eidoboozi ly'abo abasanyuka: era ndibairya, so tebalibba batono; era ndibawa ekitiibwa, so tebalibba batobato. ²⁰ Era n'abaana baabwe balibba nga bwe babbaire oluberyeberye, n'ekibiina kyabwe kirinywezebwa mu maiso gange, era ndibonereza bonabona abalibajooga. ²¹ N'omulangira waabwe alibba mwinaabwe ibo, n'oyo alibafuga aliva mu ibo wakati; era ndimusemberya, era aliiza we ndi kubanga yani eyabbaire ayaŋangire okwiza we ndi? bw'atumula Mukama. ²² Mwena mwabbanga bantu bange, nzena naabbanga Katonda wanyu. ²³ Bona, empunga ya Mukama niikyo kiruyi kye, afulumire, empunga eyera: erigwa ku mutwe gw'ababbiibi. ²⁴ Obusungu bwa Mukama omulalu tebuliira okutuusya lw'alimala okutuukirirya, okutuusya lw'alikomenkererya omwoyo gwe gye gumaliriire: mu naku egy'oluvanyuma mwe mulikitegeerera.