¹ Era bino niibyo bigambo eby'omu bbaluwa Yeremiya nabbi gye yaweereirye ng'ayema e Yerusaalemi eri abakaire abafiikirewo ab'omu busibe n'eri bakabona n'eri banabbi n'eri abantu bonabona Nebukaduneeza be yabbaire atwaire nga basibe okubatoola e Yerusaalemi okubatwala e Babulooni: ² (Yekoniya kabaka n'o namasole n'abalaawe n'abakungu ba Yuda ne Yerusaalemi n'a bafundi n'abaweesi nga bamalire okuva mu Yerusaalemi;) ³ mu mukono gwa Erasa mutaane wa Safani n'o Gemaliya Mutaane wa Kirukiya, (Zedekiya kabaka wa Yuda be yatumire e Babulooni eri Nebukaduneeza kabaka w'e Babulooni,) ng'atumula nti ⁴ Ati Mukama w'eigye Katonda wa Isiraeri bw'akoba ab'obusibe bonabona be natwalisirye e Babulooni nga basibe okubatoola e Yerusaalemi, nti ⁵ Muzimbenga enyumba mutyamenga omwo; musimbenga ensuku, mulyenga emere yaamu; mukwenga abakali, muzaalenga abaana ab'obwisuka n'ab'obuwala; ⁶ era mukwenga bataane banyu abakali, era mugabenga abawala banyu okufumbirwa, bazaalenga abaana ab'obwisuka n'ab'obuwala; mwalirenga eyo so temukendeera. ⁷ Mwatakiryanga ekibuga emirembe gye nabatwalisirye okubba abasibe, era mukisabirenga eri Mukama: kubanga olw'emirembe gyakyo imwe mulibba n'emirembe. ⁸ Kubanga ati bw'atumula Mukama w'eigye Katonda wa Isiraeri nti Banabbi banyu abali wakati mu imwe n'abafumu banyu balekenga okubabbeya, so temuwulisisyanga birooto byanyu bye mulootesya. ⁹ Kubanga babalagulira mu liina lyange eby'obubbeyi: timbatumanga, bw'atumula Mukama. ¹⁰ Kubanga ati bw'atumula Mukama nti emyaka nsanvu bwe girituukiririra Babulooni, ndibaizira ne ntuukirirya gye muli ekigambo kyange ekisa nga mbairyawo mu kifo kino. ¹¹ Kubanga maite ebirowoozo bye ndowooza gye muli, bw'atumula Mukama, ebirowoozo eby'emirembe so ti by'o bubbiibi, okubawa okusuubira enkomerero yanyu ey'oluvanyuma. ¹² Era mulinkungira, era mulyaba ne munsaba, nzena ndibawulira. ¹³ Era mulinsagira ne mumbona, bwe mulinkeneenya n'omwoyo gwanyu gwonagwona. ¹⁴ Nzena mulimbona, bw'atumula Mukama, era ndikyusya ate obusibe bwanyu, ne mbakuŋaanya okubatoola mu mawanga gonagona n'o mu bifo byonabyona gye nababbingiire, bw'atumula Mukama; era ndibairyawo mu kifo gye nabatoire okubatwalisya okubba abasibe. ¹⁵ Kubanga mutumwire nti Mukama atuyimusiirye banabbi mu Babulooni. ¹⁶ Kubanga ati bw'atumula Mukama ebya kabaka atyama ku ntebe ya Dawudi, n'eby'abantu bonabona abali mu kibuga muno, bagande banyu abatafulumanga okwaba mu busibe wamu naimwe; ¹⁷ ati bw'atumula Mukama w'eigye nti bona, ndisindika ku ibo ekitala n'enjala n'o kawumpuli, era ndibafuula ng'eitiini egibulaku kye gigasa egibulaku kubanga giyingire Obubbiibi ¹⁸ Era ndibayiganya n'ekitala n'enjala n'o kawumpuli, era ndibawaayo okuyuuguumizibwa mu nsi gyonagyona egya bakabaka egiri ku nsi, okubba ekiraamo n'ekyewuunyo n'okunionsolebwanga n'ekivumi mu mawanga gonagona gye nababbingiibwe: ¹⁹ kubanga tibawulisisirye bigambo byange, bw'atumula Mukama, bye natumire abaidu bange banabbi, nga ngolokoka mu makeeri ne mbatuma; naye ne mutaikirirya kuwulira, bw'atumula Mukama. ²⁰ Kale muwulire ekigambo kya Mukama, imwe mwenamwena ab'omu busibe, be nasindikire e Babulooni okuva e Yerusaalemi. ²¹ Ati bw'atumula Mukama w'eigye Katonda wa Isiraeri ebya Akabu mutaane wa Kolaya n'ebya Zedekiya Mutaane wa Maaseya ababalagulire mu liina lyange eky'obubeeyi, nti bona, ndibagabula mu mukono gwa Nebukaduneeza kabaka w’e Babulooni; era alibaita imwe nga mubona; ²² era ku ibo kwe balitoola ekiraamo abasibe bonabona aba Yuda abali mu Babulooni nga batumula nti Mukama akufuule nga Zedekiya era nga Akabu kabaka w'e Babulooni be yayokyerye omusyo: ²³ kubanga bakolere eby'obusirusiru mu Isiraeri, era bendere ku bakali ba bainaabwe, era batumuliire mu liina lyange ebigambo eby'obubbeyi bye ntabalagiranga; era ninze ono amaite, era nze ndi mujulizi, bw'atumula Mukama. ²⁴ N'ebya Semaaya Omunekeramu watumula nti ²⁵ Ati bw'akoba Mukama w'eigye Katonda wa Isiraeri nti Kubanga oweereirye ebbaluwa ng'oyema mu liina lyo iwe eri abantu bonabona abali mu Yerusaalemi n'eri Zefaniya Mutaane wa Maaseya kabona n'eri bakabona bonabona ng'otumula nti ²⁶ Mukama akufiire kabona mu kifo kya Yekoyaada kabona mubbe abaami mu nyumba ya Mukama, olwa buli muntu aliku eiralu ne yeefuula nabbi, omuteeke mu nvuba n'o mu masamba. ²⁷ Kale ekikulobeire ki okunenya Yeremiya ow'e Yanasosi eyeefuula nabbi gye muli, ²⁸ kubanga yatutumiire e Babulooni ng'atumula nti obusibe bwo kulwawo: muzimbenga enyumba, mutyamenga omwo; era musimbenga ensuku, mulyenga emere yaamu? ²⁹ Awo Zefaniya kabona n'asomera ebbaluwa eno mu matu ga Yeremiya nabbi. ³⁰ Awo ekigambo kya Mukama ne kiiza eri Yeremiya nga kitumula ³¹ nti tumira abo bonabona abali mu busibe ng'otumula nti Ati bw'atumula Mukama ebya Semaaya Omunekeramu nti Kubanga Semaaya abalagwire, so nze timutumanga, era abeesigisirye eky'obubeeyi; ³² Mukama kyava atumula ati nti bona, ndibonererya Semaaya Omunekeramu n'eizaire lye; talibba na musaiza wo kutyama mu bantu bano, so talibona bisa bye ndikola abantu bange, bw'atumula Mukama: kubanga atumwire eby'obujeemu eri Mukama.