¹ Batumula nti Omusaiza bw'abbinga mukali we, yeena n'amuvaaku n'abba ow'omusajja ogondi, Omusaiza oyo alimwirira ate? ensi yo teryonooneka inu? Naye iwe weefuula omwenzi eri baganzi bo bangi; era naye ngirira ate, bw'atumula Mukama. ² Yimusya amaiso go eri ensozi egy'owanza obone; we batagonera naiwe waina? Wabalingiriire ku mbali kw'engira ng'Omuwalabu mu idungu; era wayonoonere ensi n'obwenzi bwo n'obubbiibi bwo. ³ Enfunyagali kyegiviire giziyizibwa, so tewabbairewo mutoigo; era naye n'obba n'ekyeni eky'omwenzi, wagaine okukwatibwa ensoni. ⁴ Tonkungirenga okuva watyanu nti Iitawange, niiwe musaale w'obutobuto bwange? ⁵ Aliguguba n'obusungu bwe emirembe gyonagyona? aliremera mu ibwo Okutuusya enkomerero? Bona, watumwire n'okola ebigambo ebibiibi, n'okwata engira yo iwe. ⁶ Era ate Mukama n'ankobera mu mirembe gya Yosiya kabaka nti Oboine ekyo Isiraeri eyaseeseetukire ky'akolere? aniinire ku buli lusozi oluwanvu ne wansi wa buli musaale omubisi, ne yeefuulira eyo omwenzi. ⁷ Ne ntumula bwe yamalire okukola ebyo byonabyona nti Alingirira; naye n'ataira: ne mwainyina ow'enkwe Yuda n'akibona. ⁸ Ne mbona, bwe namalire okubbinga Isiraeri eyaseeseetukire ne muwa ebbaluwa ey'okumubbinga olw'ensonga eno kubanga ayendere, era yeena Yuda ow'enkwe mwainyina n'atatya; naye era yeena n'ayaba ne yeefuula omwenzi. ⁹ Awo olwatuukire kubanga mwangu okwenda ensi n'eyonooneka, n'ayenda ku mabbaale n'ebikonge. ¹⁰ Era naye ebyo byonabyona waire nga bimalire okubbawo, mwainyina ow'enkwe Yuda tangiriire n'omwoyo gwe gwonagwona, naye ng'akuusyakuusya, bw'atumula Mukama. ¹¹ Awo Mukama n'ankoba nti Isiraeri eyaseeseetukire yeeragire okubba omutuukirivu okusinga Yuda ow'enkwe. ¹² Yaba olangire ebigambo bino ng'olingirira obukiika obugooda, otumule nti Iraawo, iwe Isiraeri eyaseeseetukire, bw'atumula Mukama; timbalingirire n'obusungu: kubanga ndina okusaasira, bw'atumula Mukama, tindiguguba no busungu emirembe gyonagyona. ¹³ Kyokka ikirirya obutali butuukirivu bwo, nga wasobyerye Mukama Katonda wo, n'osaansaanirya amangira go abageni wansi wa buli musaale omubisi, so temwagondeire idoboozi lyange, bw'atumula Mukama. ¹⁴ Iraawo, imwe abaana abairire enyuma, bw'atumula Mukama; kubanga niinze ibawanyu: era ndibatwala nga ntoola omumu ku kibuga n'ababiri ku kika, ne mbaleeta e Sayuuni: ¹⁵ era ndibawa abasumba ng'omwoyo gwange bwe guli abalibaliisya n'okumanya n'okutegeera. ¹⁶ Awo olulituuka bwe mulibba nga mwaalire era nga mweyongeire mu nsi, kale mu biseera ebyo, bw'atumula Mukama, nga tebakaali batumula nti Esanduuku ey'endagaanu ya Mukama; so teriyingira mu mwoyo gwabwe; so tebaligiijukira; so tebaligikyalira; so tebalikola ate batyo. ¹⁷ Mu biseera ebyo balyeta Yerusaalemi entebe ya Mukama; n'amawanga gonagona galikuŋaanyizibwa eyo, eri eriina lya Mukama e Yerusaalemi: so tebalitambula ate ng'obukakanyali bw'omwoyo gwabwe omubbiibi bwe buli. ¹⁸ Mu biseera ebyo enyumba ya Yuda eritambulira wamu n'enyumba ya Isiraeri, era baliviira wamu mu nsi ey'obukiika obugooda ne bayingira mu nsi gye nawaire bazeiza banyu okubba obusika. ¹⁹ Naye ne ntumula nti Ndikuteeka ntya mu baana, ne nkuwa ensi ey'eisanyu, obusika obusa mu igye ly'amawanga? ne ntumula nti Mulinjeta nti Itawange; so temulikyuka obutansengererya. ²⁰ Mazima omukali nga bw'ava ku ibaaye ng'asala olukwe, mutyo mweena bwe munsaliire enkwe, imwe enyumba ya Isiraeri, bw'atumula Mukama. ²¹ Eidoboozi liwuliirwe ku nsozi egy'owanza, okukunga n'okwegayirira kw'abaana ba Isiraeri; kubanga banyoire engira yabwe, beerabiire Mukama Katonda waabwe. ²² Mwirewo, imwe abaana abaseeseetukire, nawonya okuseeseetuka kwanyu. Bona, twizire gy'oli; kubanga niiwe Mukama Katonda waisu. ²³ Mazima okubbeerwa okusuubirwa okuva ku nsozi kwo bwereere, oluyoogaano oluli ku nsozi: mazima mu Mukama Katonda waisu imwe muli obulokozi bwa Isiraeri. ²⁴ Naye ekyo ekikwatisya ensoni kye niikyo ekimalirewo emirimu gya bazeiza baisu okuva mu butobuto bwaisu; embuli gyabwe n'ente gyabwe, bataane baabwe n'abawala baabwe. ²⁵ Tugalamire ensoni nga gitukwaite, okuswala kwaisu kutubikeku: kubanga twonoonere Mukama Katonda waidu, ife na bazeiza baisu okuva mu butobuto bwaisu ne watanu: so tetugonderanga idoboozi lya Mukama Katonda waisu.