¹ Bw'ewaikirirya okwira, iwe Isiraeri, bw'atumula Mukama, eri nze gy'oliira: era bw'ewatolawo emizizo gyo mu maiso gange, kale toliijulukuka; ² awo olirayiranga nti Mukama nga bw'ali omulamu mu mazima no mu musango no mu butuukirivu; n'amawanga gesabiranga omukisa mu iye, era mu iye imwe benyumiririzyanga. ³ Kubanga atyo Mukama bw'akoba abasaiza ba Yuda ne Yerusaalemi nti Mukabale eitakali lyanyu eritali irime, so temusiganga mu mawa. ⁴ Mwekomole eri Mukama, mutoolewo ebikuta eby'emyoyo gyanyu, imwe abasaiza ba Yuda n'abali mu Yerusaalemi: ekiruyi kyange kireme okufuluma ng'omusyo ne kyokya ne watabba asobola okukizikirya Olw'obubbiibi obw'ebikolwa byanyu. ⁵ Mulangirire mu Yuda, mulaalike mu Yerusaalemi; mutumule nti Mufuuwe eikondeere mu nsi; mutumulire waigulu mutumule nti Mukuŋaane, tuyingire mu bibuga ebiriku enkomera. ⁶ Musimbe ebbendera okwolekera Sayuuni: mwiruke muwone, temulwawo: kubanga ndireeta obubbiibi obuliva obukiika obugooda n'okuzikirirya okunene. ⁷ Empologoma eniine okuva mu kisaka kyayo, era omuzikirirya w'amawanga; akwaite engira, aviire mu kifo kye; okuzisya ensi yo, ebibuga byo babiziikire obutabaamu abibbeeramu. ⁸ Olwekyo muvaale ebinyakinyaki, mukunge muwowogane: kubanga ekiruyi kya Mukama tekikyukire okutuvaaku. ⁹ Awo olutituuka ku lunaku olwo, bw'atumula Mukama, Omwoyo gwa kabaka gulizikirira, n'omwoyo gw'abakulu; na bakabona balisamaalirira na banabbi balyewuunya. ¹⁰ Awo kaisi ne ntumula nti Woowe, Mukama Katonda! mazima obbeyere inu eigwanga lino ne Yerusaalemi ng'otumula nti Mulibba n'emirembe; naye ekitala kituuka ku meeme. ¹¹ Mu biseera ebyo balikoba eigwanga lino ne Yerusaalemi nti Empunga egy'olubugumu egiva ku nsozi egy'ewanza mu idungu egyolekera omuwala w'abantu bange, ti gyo kuwuja so ti gyo kulongoosya; ¹² embuyaga nyingi egiva ku egyo giriiza ku lwange: atyanu nzeena natumua emisango ku ibo. ¹³ Bona, aliniina ng'ebireri, n'amagaali ge galibba ng'empewo egy'akampusi: embalaasi gye gye mbiro okusinga eikookoma. Gitusangire! kubanga tunyagiibwe. ¹⁴ Ai Yerusaalemi, naabya omwoyo gwo guweemu obubbiibi, kaisi olokoke. Ebirowoozo byo ebibiibi birituusya waina okubba mu nda yo? ¹⁵ Kubanga eidoboozi lirangirira nga lyema e Daani, era liraaliika obubbiibi nga lyema ku nsozi gya Efulayimu: ¹⁶ mukobere amawanga; bona, mulaaliike eri Yerusaalemi ng'abakuumi bava mu nsi ey'ewala ne balangirira ebibuga bya Yuda n'eidoboozi lyabwe. ¹⁷ Bakyetooloire enjuyi gyonagyona ng'abakuuma enimiro; kubanga kyanjeemeire, bw'atumula Mukama. ¹⁸ Engira yo n'ebikolwa byo niibyo ebikufuniire ebyo; buno niibwo bubbiibi bwo; kubanga bwo kusaata, kubanga butuuka no ku mwoyo gwo. ¹⁹ Emeeme yange, emeeme yange! omwoyo gwange gunuma munda mweene; omwoyo gwange gweraliikiriire mu nze; tinsobola kusirika; kubanga owuliire, ai emeeme yange, eidoboozi ly'eikondeere, nga liraire. ²⁰ Okuzikirizibwa okuli kungulu w'okuzikirizibwa kulangirirwa; kubanga ensi yonayona enyagiibwe: eweema gyange zinyagiibwe nga timanyiriire, n'amagigi gange mu kaseera kamu. ²¹ Ndituukya wa okubona ebbendera ne mpulira eidoboozi ly'eikondeere? ²² Kubanga abantu bange basirusiru, tebamaite; biwowongole bya baana, so babula kutegeera: ba magezi mu kukola okubbiibi, naye mu kukola okusa babula kumanya. ²³ Naboine ensi, era, laba, nga njereere nga yeetabwiretabwire; n'eigulu nga mubula musana. ²⁴ Naboine ensozi, era, bona, nga gikankana, obusozi bwonabwona ne buyuuguuma eruuyi n'eruuyi. ²⁵ Nalingire, era, bona, nga wabula muntu, n'enyonyi gyonagyona egy'omu ibbanga nga giirukire. ²⁶ Naliingire, era, bona, enimiro enjimu nga gifuukire nkoola, n'ebibuga byamu byonbyona nga bimenyekeremenyekere, olw'okwiza kwa Mukama no mu maiso g'ekiruyi kye. ²⁷ Kubanga atyo bw'atula Mukama nti Ensi yonayona eribba nsiko; naye tindikomenkerererya dala. ²⁸ Ensi kyeriva ewuubaala, n'eigulu eriri waigulu liriirugala: kubanga nze nkitumwire, nkimaliriire, so tinejusirye, so tindiira enyuma okukireka. ²⁹ Ekibuga kyonakyona kiruka olw'okuyoogaana kw'abo abeebagaire embalaasi n'ab'emitego; bayingira mu bisaka, ne baniina ku mabbale buli kibuga kirekeibwe, so wabula muntu atyama omwo. ³⁰ Weena bw'olinyagibwa olikola otya? Waire ng'ovaala olugoye olutwakaali, waire nga weeyonja n'ebintu ebya zaabu, Waire ng'ogaziya amaiso go nga weesiigaku obulezi, weefuulira bwereere omusa: baganzi bo bakunyooma, basagira obulamu bwo. ³¹ Kubanga mpuliire eidoboozi ng'ery'omukali alumwa okuzaala, okisaata okuli ng'okwoyo azaala omwana we omuberyeberye, eidoboozi ly'omuwala wa Sayuuni alaakiira, ayanjala engalo gye ng'atumula nti Ginsangire kaakanu! kubanga emeeme yange ezirika mu maiso g'abaiti.