¹ Awo ekigambo kya Mukama ne kingizira nga kitumula nti ² Yaba otumulire waigulu mu matu ga Yerusaalemi nti Atyo bw'atumula Mukama nti Nkwijuukirira ku kisa eky'omu butobuto bwo, okutaka okw'okwogerezebwa kwo; bwe wansengerya mu idungu mu nsi ebulamu bisige. ³ Isiraeri yabbaire butukuvu eri Mukama, ebindi ebiberyeberye eby'oku kyengera kye: bonabona abamulya byetebwa abakolere omusango: obubbiibi bulibatuukaku, bw'atumula Mukama. ⁴ Muwuliire ekigambo kya Mukama, imwe enyumba ya Yakobo, n'ebika byonabyona eby'enyumba ya Isiraeri: ⁵ Atyo bw'atumula Mukama nti Butali butuukirivu ki bazeiza baisu bwe baalaba mu nze n'okwaba baabire wala okunvaaku, ne batambula okusengererya obutaliimu ne bafuuka abataliimu? ⁶ So tebatumula nti Mukama ali waina eyatutoire mu nsi y'e Misiri; eyatubitirye mu lukoola, mu nsi ey'amalungu n'obwina, mu nsi ey'enyonta n'ey'ekiswolyo eky'okufa, mu nsi omuntu yenayena gy'atabitamu, so n'omuntu yenayena mw'atabbeera? ⁷ Ne mbaleeta mu nsi ey'ekyengera, okulyanga ebibala byamu n'obusa bwamu; naye bwe mwayingiire ne mwonoona ensi yange, ne mufuula obusika bwange okubba omuzizo. ⁸ Bakabona tebatumwire nti Mukama ali waina? n'abo abatogeretogere amateeka tebamanyire: era n'abakungu ne bansobya, banabbi ne balagula ku lwa Baali ne batambula nga basengererya ebibulaku kye bigasa. ⁹ Kyenaaviire neyongera okuwozya naimwe, bw'atumula Mukama, era ndiwozya n'abaana b'abaana banyu. ¹⁰ Kubanga muwungukire Mwabe ku bizinga bya Kitimu mubone; mutume e Kedali, mwetegerezye inu; mubone oba nga wabbbaire wabbairewo ekigambo ekyekankana awo. ¹¹ Waliwo eigwanga eryawaanyisirye bakatonda baabwe, abatali bakatonda naye? naye abantu bange baawaanyisirye ekitiibwa kyabwe olw'ekyo ekibulaku kye kigasa. ¹² Samaaliririra ekyo, iwe eigulu, otye ekitatiika, owuubaale inu, bw'atumula Mukama. ¹³ Kubanga abantu bange bakolere Ebibiibi bibiri; bandekere nze ensulo y'amaizi amalamu, ne beesimira ebidiba, ebidiba tanka gy'omu itakali, ebitasobola kubbaamu maizi. ¹⁴ Isiraeri mwidu? mwidu eyazaaliibwe mu nyumba? kiki ekimufiire omuyigo? ¹⁵ Empologoma entonto gimuwulugumiireku ne givuuma: ne gizikya ensi ye; ebibuga bye byokyereibwe dala awabula abityamamu. ¹⁶ Era abaana ba Noofu no Tapanesi bamenye obwezinge bwo. ¹⁷ Teweeretereku ekyo kubanga oletere Mukama Katonda wo, bwe yakuluŋamizirye mu ngira? ¹⁸ Kale ofaayo ki mu ngira eira e Misiri okunywa amaizi ga Sikoli? oba ofaayo ki mu ngira eyaba e Bwasuli, okunywa amaizi ag'Omwiga? ¹⁹ Obubbiibi bwo iwe bulikubuulirira, n'okuseeseetuka kwo kulikunenya: kale manya obone nga kigambo kibbiibi era kyo bubalagazi, kubanga oletere Mukama Katonda wo, era ng'entiisya yange teri mu iwe, bw'atumula Mukama, Mukama ow'eigye. ²⁰ Kubanga obw'eira namenyere ejooko yo, ne nkutula ebisiba byo; n'otumula nti ngiza kuweererya; kubanga wakutamire ku buli lusozi oluwamvu no wansi wa buli musaale omubisi nga weefuula omwenzi. ²¹ Era naye nabbaire nkusimbire muzabbibu musa, eikoti ery'amazima limeereere: kale ofuukire otya gye ndi omusaale ogwayonoonekere ogw'omuzabbibu ogw'omu kibira? ²² Kubanga waire ng'onaaba n'olukoke n'okozesya no sabbuuni mungi, naye obutali butuukirivu bwo buboneibwe mu maiso gange, bw'atumula Mukama Katonda. ²³ Osobola otya okutumula nti Tinyononekere, tinsengereryanga Babaali? Bona engira yo mu kiwonvu, otegeere bye wakolere; oli ŋamira ye mbiro ng'ebitabita mu mangira gaayo; ²⁴ entulege eyamanyiirire amalungu ekonga empewo nga yeegomba; mu kiseera kyayo yani asobola okugikyusya? Gyonagyona egigisagira tegiryekooya; gyagibonera mu mwezi gwayo. ²⁵ Giyigisya ekigere kyo oleke okubba abula ngaito, n'omumiro gwo oleke okulakasira enyonta; naye n'otumula nti wabula isuubi bbe; kubanga ntakire banaigwanga, era be ndigobererya. ²⁶ Omwibbi nga bw'akwatibwa ensoni bw'aboneka, n'enyumba ya Isiraeri bw'ekwatibwa ensoni eti; ibo na bakabaka baabwe n'abakulu baabwe na bakabona na banabbi baabwe; ²⁷ abakoba ekikonge nti niiwe itawange; n'eibbale nti niiwe onzaala: kubanga bankubbire amabega so ti maiso gaabwe: naye mu biseera mwe balibonera enaku balitumula nti Golokoka otulokole. ²⁸ Naye ba katonda bo be weekoleire bali waina? Ibo bagolokoke oba nga basobola okukulokola mu biseera mw'olibonera enaku: kubanga ebibuga byo nga bwe byekankana, na bakatonda bo bwe bekankana batyo, iwe Yuda. ²⁹ Kiki ekibatakirya okuwozya nanze? mwenamwena munsoberye, bw'atumula Mukama. ³⁰ Abaana banyu mbakubbiire bwereere; tebaziyizorye kubuulirirwa: ekitala kyanyu imwe kimalirewo banabbi banyu ng'empologoma ezikirirya. ³¹ Imwe ab'omu mirembe gino, mubone ekigambo kya Mukama. Naabbanga idungu eri Isiraeri? oba nsi ye ndikirirya ekwaite? abantu bange ekibatumulya ki nti Tutaaluukire; tetukaali twiza gy'oli ate? ³² Omuwala asobola okwerabira ebibye eby'obuyonjo, oba omugole ebivaalo bye? naye abantu bange baneerabiire enaku nyingi egitabalika. ³³ Ng'olongoosya engirayo okusagira okwaigaliibwe! kyoviire oyiirirya n'abakali ababbiibi amangira go. ³⁴ Era ku birenge byo kubonekere omusaayi gw'emeeme gy'abaavu ababulaku musango: tinguboine mu kituli ekisimibwa wabula ku bino byonabyona. ³⁵ Era naye n'otumula nti Mbulaku musango; mazima obusungu bwe bukyukire okunvaaku. Bona, ndiwozya naiwe kubanga otumula nti Tinyoonanga. ³⁶ Otambuliratambulira ki einu otyo okuwaayisya engira yo? era olikwatibwa ensoni no ku lwa Misiri, nga bwe wakwatiibwe ensoni ku lwo Bwasuli. ³⁷ Era ne gy'ali olivaayo nga weetiikire emikono: kubanga Mukama againe ebyo bye weesiga, so tolibona mukisa mu ibyo.