¹ Yekoyakimu mutaane wa Yosiya kabaka w'e Yuda nga yakaiza alye obwakabaka ekigambo kino ne kiiza okuva eri Mukama nga kitumula nti ² Atyo bw'atumula Mukama nti Yemerera mu luya olw'enyumba ya Mukama, okobe ebibuga byonabyona ebya Yuda, abaiza okusinzirya mu nyumba ya Mukama, ebigambo byonabyona bye nkulagira okubakoba; tolekaayo ne kimu. ³ Koizi baliwulira ne bakyuka buli muntu okuleka engira ye embiibbi; Kaisi nejusye obubbiibi bwe nteesya okubakola olw'obubiibi obw'ebikolwa byabwe. ⁴ Era obakobanga nti Ati bw'atumula Mukama nti Bwe mutampulisisye okutambuliranga mu mateeka gange ge ntekere mu maiso ganyu, ⁵ okuwulisisyanga ebigambo by'abaidu bange banabbi be mbatumiire, okugolokoka nga ngolokoka mu makeeri ne mbatuma, naye imwe ne mutawulisisya; ⁶ kale ndifuula enyumba eno okubba nga Siiro, era ndifuula ekibuga kino ekiraamo eri amawanga gonagona ag'omu nsi. ⁷ Awo bakabona na banabbi n'abantu bonabona ne bawulira Yeremiya ng'atumula ebigambo ebyo mu nyumba ya Mukama. ⁸ Awo olwatuukiire Yeremiya bwe yamaliire dala okutumula byonabyona Mukama bye yabbaire amulagiire okukoba abantu bonabona, bakabona n'a banabbi n'abantu bonabona ne bamukwata nga batumula nti tooleke kufa. ⁹ Kiki ekikulagulisirye mu liina lya Mukama ng'otumula nti Enyumba eno eribba nga Siiro n'ekibuga kino kiribba matongo nga wabula muntu akibbamu? Abantu bonabona ne bakuŋaanira awali Yeremiya mu nyumba ya Mukama. ¹⁰ Awo abakungu b'e Yuda bwe baawuliire ebyo, ne bambuka nga bava mu nyumba ya kabaka, ne baiza mu nyumba ya Mukama; ne batyama awayingirirwa mu mulyango omuyaka ogw'enyumba ya Mukama. ¹¹ Awo bakabona n'a banabbi ne bankoba abakungu n'abantu bonabona nti omusaiza ono asaaniire okufa; kubanga alagwire ku kibuga kino nga bwe muwuliire n'amatu ganyu imwe. ¹² Awo Yeremiya n'akoba abakungu bonabona n'abantu bonabona nti Mukama niiye yantumire okulagula ku nyumba eno n'o ku kibuga kino ebigambo byonabyona bye muwuliire. ¹³ Kale mulongoosye amangira ganyu n'ebikolwa byanyu, mugondere eidoboozi lya Mukama Katonda wanyu; kale Mukama alyejusa obubbiibi bw'aboogeireku. ¹⁴ Naye nze, bona, ndi mu mukono gwanyu: munkole nga bwe musiima era bwe kiri eky'ensonga mu maiso ganyu. ¹⁵ Kyooka mutegeerere dala bwe mwangita mwereetaku omusaayi ogubulaku musango n'o ku kibuga kino n'o ku abo abakibbamu: kubanga mazima Mukama niiye antumire gye muli okutumula ebigambo bino byonabyona mu matu ganyu. ¹⁶ Awo abakungu n'abantu bonabona ne bakoba bakabona na banabbi nti omusaiza ono tasaaniire kufa; kubanga atumuliire naife mu liina lya Mukama Katonda waisu. ¹⁷ Awo ne wagolokoka abamu ku bakaire b'ensi ne bakoba ekibiina kyonakyona eky'abantu nti ¹⁸ Mikaaya Omumolasi yalaguliire mu mirembe gya Keezeekiya kabaka w'e Yuda; n'akoba abantu bonabona ab'e Yuda ng'atumula ati Ati bw'atumula Mukama w'eigye nti Sayuuni lulikabalwa ng'enimiro ne Yerusaalemi kirifuuka bifunvu, n'olusozi olw'enyumba lulibba ng'ebifo ebigulumivu eby'omu kibira. ¹⁹ Keezeekiya kabaka w'e Yuda ne Yuda yenayena baamalire ne bamwita? tiyatiire Mukama, ne yeegayirira ekisa kya Mukama, Mukama ne yejusa obubbiibi bwe yabbaire abatumwireku? tutyo twandiyonoonere inu emeeme gyaisu. ²⁰ Era waaliwo omusaiza eyalaguliire mu liina lya Mukama, Uliya mutaane wa Semaaya ow'e Kiriyasuyalimu; n'oyo yalagwire ku kibuga kino n'o ku nsi eno ng'ebigambo byonabyona ebya Yeremiya bwe bibbaire: ²¹ awo Yekoyakimu kabaka n'abasaiza be bonabona ab'amaani n'abakungu bonabona bwe bawuliire ebigambo bye, kabaka n'ataka okumwita; naye Uliya bwe yakiwuliire, n'atya n'airuka n'ayaba mu Misiri: ²² Yekoyakimu kabaka n'atuma abantu e Misiri, Erunasani mutaane wa Akubooli, n'abasaiza abamu wamu naye e Misiri: ²³ ne basyomayo Uliya mu Misiri, ne bamuleeta eri Yekoyakimu kabaka; n'amwita n'ekitala, n'asuula omulambo gwe mu magombe g'abakopi. ²⁴ Naye omukono gwa Akikamu mutaane wa Safani ne gubba wamu ne Yeremiya baleke okumuwaayo mu mukono gw'abantu okumwita.