¹ Ekigambo ekyaiziire Yeremiya eky'abantu bonabona aba Yuda mu mwaka ogw'okuna ogwa Yekoyakimu mutaane wa Yosiya kabaka w'e Yuda; ogwo niigwo gwabbaire omwaka ogw'oluberyeberye ogwa Nebukaduneeza kabaka w'e Babulooni; ² Yeremiya nabbi kye yabuuliire abantu bonabona aba Yuda ne bonabona ababbaire mu Yerusaalemi, ng'atumula nti ³ Okuva ku mwaka ogw'eikumi n'eisatu ogwa Yosiya mutaane wa Amoni kabaka w'e Yuda ne watyanu, emyaka egyo abiri n'e isatu, ekigambo kya Mukama kyangiziranga ne ntumula naimwe, nga ngolokoka mu makeeri ne ntumula; naye imwe temuwulisisyanga. ⁴ Era Mukama yabatumiranga abaidu be bonabona banabbi, ng'agolokoka mu makeeri ng'abatuma; naye imwe temuwulisisyanga so temuteganga kitu kyanyu okuwulira; ⁵ ng'atumula nti Mwirewo buli muntu ng'aleka eikabyo lye eibbiibi n'obubbiibi obw'ebikolwa byanyu, mubbe mu nsi Mukama gye yabawaire imwe na bazeiza banyu, okuva eira n'okutuusya emirembe gyonagyona: ⁶ so temusengereryanga bakatonda abandi okubaweereryanga n'okubasinzanga, so temunsunguwalyanga n'omulimu ogw'emikono gyanyu; nzena tindibakola kubbiibi. ⁷ Era naye temumpuliranga, bw'atumula Mukama; munsunguwalye n'omulimu ogw'emikono gyanyu olw'okwerumya mwenka. ⁸ Mukama w'eigye kyava atumula ati nti Kubanga timuwuliire bigambo byange, ⁹ bona, ndituma ne ngirira ebika Byonabyona eby'obukiika obugooda, bw'atumula Mukama, era nditumira Nebukaduneeza kabaka w'e Babulooni omwidu wange, ne mbaleeta okutabaala ensi eno n'abo abali omwo n'amawanga gano gonagona ageetooloire; era ndibazikiririrya dala ne mbafuula ekyewuunyo n'okunionsolebwanga n'amatongo ag'olubeerera. ¹⁰ Era ate ndibatoolaku eidoboozi ery'okusanyuka n'eidoboozi ery'okujaguza, eidoboozi ly'akwa omugole n'eidoboozi ly'omugole, okuvuga kw'olubengo n'okwaka kw'etabaaza. ¹¹ N'ensi eno yonayona eribba matongo n'ekyewuunyo; n'amawanga gano galiweerererya kabaka w'e Sabulooni emyaka nsanvu. ¹² Awo olulituuka emyaka ensanvu bwe girituukirira, Kaisi ne mbonereza kabaka w'e Babulooni n'eigwanga eryo, bw'atumula Mukama, olw'obutali butuukirivu bwabwe, n'ensi ey'Abakaludaaya, era ndigifuula amatongo enaku gyonagyona. ¹³ Era ndireeta ku nsi eyo ebigambo byange byonabyona bye twatumulangaku, byonabyona ebyawandiikiibwe mu kitabo kino Yeremiya kye yalagwire eri amawanga gonagona. ¹⁴ Kubanga amawanga mangi n'a bakabaka abakulu abalibafuula abaidu, abo be balifuula abaidu: era ndibasasula ng'ebikolwa byabwe bwe biri era ng'omulimu ogw'emikono gyabwe bwe guli. ¹⁵ Kubanga ati Mukama Katonda wa Isiraeri bw'ankoba nti toola ekikompe eky'omwenge ogw'ekiruyi kino mu mukono gwange, ogunywisyeku amawanga gonagona gye nkutuma. ¹⁶ Kale balinywa ne batagaita ne balaluka olw'ekitala kye ndiweererya mu ibo. ¹⁷ Awo ne ntoola ekikompe mu mukono gwa Mukama, ne nywisya amawanga gonagona Mukama gye yantumire: ¹⁸ Yerusaalemi n'ebibuga by'e Yuda n'a bakabaka baamu n'abakungu baamu, okubafuula amatongo n'ekyewuunyo n'okunionsolebwanga n'ekiramo; nga bwe kiri watyanu; ¹⁹ Falaawo kabaka w'e Misiri n'abaidu be n'abakungu be n'abantu be bonabona; ²⁰ n'abantu bonabona abatabulwa, n'a bakabaka bonabona ab'omu nsi y'e Uzi, n'a bakabaka bonabona ab'omu nsi ey'Abafirisuuti, ne Asukulooni n'e Gaaza n'e Ekuloni n'abafiikirewo ku Asudodi; ²¹ Edomu ne Mowaabu n'abaana ba Amoni; ²² N'a bakabaka bonabona ab'e Tuulo n'a bakabaka bonabona ab'e Sidoni n'a bakabaka b'ekizinga ekiri emitala w'enyanza; ²³ Dedani n'e Tema n'e Buzi n'e bonabona abamwa oluge; ²⁴ na bakabaka bonabona ab'e Buwalabu na bakabaka bonabona ab'abantu abatabulwa ababba mu idungu; ²⁵ N'a bakabaka bonabona ab'e Zimuli, n'a bakabaka bonabona aba Eramu, n'a bakabaka bonabona aba Abameedi; ²⁶ na bakabaka bonabona ab'obukiika obugooda ab'ewala n'ab'okumpi, buli muntu n'o mwinaye; n'ensi gyonagyona egya bakabaka bwe bekankana egiri ku nsi; n'o kabaka w'e Sesaki alibaliiririra okunywa. ²⁷ Era olibakoba nti ati bw'atumula Mukama w'eigye, Katonda we Isiraeri, nti Munywe mutamiire museseme mugwe so temuyimuka ate olw'ekitala kye ndiweererya mu imwe. ²⁸ Awo olulituuka bwe baligaana okutoola ekikompe mu mukono gwo, okunywa, kale olibakoba nti ati bw'atumula Mukama w'eigye nti timwaleke kunywa. ²⁹ Kubanga, bona, nsookera ku kibuga ekituumiibweeku eriina lyange okuleeta obubbiibi, naimwe mwandiwoneire dala okubonerezebwa? Timuliwona kubonerezebwa: kubanga ndyeta ekitala okwiza ku abo bonabona abatyama ku nsi, bw'atumula Mukama w'eigye. ³⁰ Kale olagulanga ku ibo ebigambo ebyo byonabyona, obakobe nti Mukama aliwuluguma ng'ayema waigulu, alireeta eidoboozi lye ng'ayema mu kifo kye ekitukuvu mw'abba; aliwulugumira N'amaani ku kisibo kye; era alitumulira waigulu ng'abo abasamba eizabbibu eri abo bonabona abatyama ku nsi. ³¹ Eidoboozi liriiza lirituuka n'o ku nkomerero y'ensi; kubanga Mukama alina empaka n'amawanga, aliwozya ne bonabona abalina omubiri; ababiibi alibawaayo eri ekitala, bw'atumula Mukama: ³² Ati bw'atumula Mukama w'eigye nti Bona, obubiibi bulifuluma okuva mu igwanga okwaba mu igwanga liinaye, ne mpunga nyungi erikuntibwa eriva ku njegoyego gy'ensi egy'enkomerero. ³³ N'abo Mukama b'aliita baliva ku nkomerero y'ensi balituuka ku nkomerero yaayo: tebalikungubagirwa so tebalikuŋaanyizibwa so tebaliziikibwa; balibba busa ku maiso g'ensi. ³⁴ Muwowogane, imwe abasumba, mukunge; mwekulukuunye mu ikoke, imwe abakulu ab'omu kisibo: kubanga enaku egy'okwitibwa kwanyu gituukiriire dala, nzena ndibamenyaamenya, mwena muligwa ng'ekibya ekisanyusya. ³⁵ N'abasumba tibalibba n'e ngira yo kwirukiramu, waire abakulu ab'omu kisibo ery'okuwoneramu: ³⁶ Eidoboozi ery'okutumulira waigulu okw'abasumba n'okuwowogana kw'abakulu ab'omu kisibo kubanga Mukama azikya eirisiryo lyabwe. ³⁷ N'ebisibo ebyabbangamu emirembe bisirikibwa olw'ekiruyi kya Mukama. ³⁸ Aviire mu bwegisiro ng'empologoma: kubanga ensi yaabwe efuukire ekyewuunyo olw'obulalu bw'ekitala ekijooga n'olw'ekiruyi kye.