¹ Yekoyakimu mutaane wa Yosiya kabaka we Yuda nga yakaiza atandiike okufuga, ekigambo kino ne kiiza eri Yeremiya okuva eri Mukama nga kitumula nti ² Ati Mukama bw'ankoba nti Weekolere ebisiba N'emisaale egy'ejooko obiteeke mu ikoti lyo; ³ obiweererye kabaka wa Edomu n"o kabaka we Mowaabu n'o kabaka w'abaana ba Amoni n'o kabaka w'e Tuulo n'o kabaka w'e Sidoni mu mukono gw'ababaka abaizire e Yerusaalemi eri Zedekiya kabaka we Yuda; ⁴ obalagire ebigambo eby'okutwalira bakama baabwe nti ati bw'atumula Mukama w'eigye Katonda w"e Isireari nti muti bwe mulikoba bakama banyu nti ⁵ Nze nakolere ensi, omuntu n'ensolo ebiri ku nsi, n'obuyinza bwange obungi n'omukono gwange ogugoloirwe; era nze ngiwa gwe nsiima. ⁶ Era atyanu mpaire ensi gino gyonagyona mu mukono gwa Nebukaduneeza kabaka w'e Babulooni omwidu wange; era muwaire n'ensolo egy'omu nsiko okumuweereryanga. ⁷ N'amawanga gonagona galimuweererya iye n'o mutaane we n'omwana w'o mutaane we okutuusya obwire eby'ensi ye lwe birituuka: kale amawanga mangi n'a bakabaka abakulu kaisi ne bamufuula omwidu. ⁸ Awo olulituuka eigwanga n'obwakabaka abatalikkirirya kuweereryanga Nebukaduneeza oyo kabaka w'e Babulooni, era abataliikirirya kuteeka ikoti lyabwe wansi w'ejooko ya kabaka w'e Babulooni, eigwanga eryo ndiribonererya, bw'atumula Mukama, n'ekitala n'enjala n'o kawumpuli okutuusya lwe ndimala okubazikirirya n'omukono gwe. ⁹ Naye imwe temuwuliranga banabbi banyu waire abafumu banyu waire ebirooto byanyyu waire abalogo banyu waire abasamize banyu ababakobere nti Temuliweererya kabaka w'e Babulooni: ¹⁰ kubanga babalagwire ky'o bubbeyi okubatwala ewala n'ensi yanyu; era kaisi mbabbingemu ne muzikirirya. ¹¹ Naye eigwanga eririteeka eikoti lyabwe wansi w'ejooko ya kabaka w'e Babulooni ne limuweererya, eigwanga eryo ndirireka libbe mu nsi yaabwe ibo, bw'atumula Mukama; era baligirima ne batyama omwo. ¹² Awo ne nkoba Zedekiya kabaka w'e Yuda ng'ebigambo ebyo byonabyona bwe byabbaire nga ntumula nti Muteeke amakoti ganyu wansi w'ejooko ya kabaka w'e Babulooni, mumuweererye iye n'abantu be mubbe abalamu. ¹³ Mwatakira ki okufa, iwe n'abantu bo, n'ekitala n'enjala n'o kawumpuli, nga Mukama bw'atumwire: eby'eigwanga eritaliikirirya kuweererya kabaka w'e Babulooni? ¹⁴ So temuwuliranga bigambo bya banabbi abatumula naimwe nti Temuliweererya kabaka w’e Babulooni: kubanga babalagwire kyo bubbeyi. ¹⁵ Kubanga timbatumanga, bw'atumula Mukama, naye balaguliire mu liina lyange obubbeyi; kaisi mbabbinge mu ne muzikirira, imwe na banabbi ababalagwiire. ¹⁶ Era ne nkoba na bakabona n'abantu bano bonabona nti ati bw'atumula Mukama nti timuwuliranga bigambo bya banabbi banyu ababalagwire nga batumula nti bona, ebintu eby'omu nyumba ya Mukama biri kumpi okwiribwawo ate okuva mu Babulooni: kubanga babalagwiire ky'obubbeyi ¹⁷ Temubawuliranga; muweererye kabaka w’e Babulooni mubbe abalamu: ekibuga kino kiki ekyabba kikifuukya amatongo. ¹⁸ Naye oba nga banabbi, n'ekigambo kya Mukama oba nga kiri nabo, beegayirire Mukama w'eigye ebintu ebisigaire mu nyumba ya Mukama n'o mu nyumba ya kabaka we Yuda no mu Yerusaalemi bireke okwaba e Babulooni. ¹⁹ Kubanga ati bw'atumula Mukama w'eigye eby'empango n'eby'enyanza n'eby'entebe n'eby'ebintu ebifiikirewo ebisigaire mu kibuga kino, ²⁰ Nebukaduneeza kabaka w'e Babulooni by'ataatwaire bwe yatwaire nga musibe Yekoniya mutaane wa Yekoyakimu kabaka we Yuda n'amutoola e Yerusaalemi n'amutwala e Babulooni n'abakungu bonabona abe Yuda ne Yerusaalemi ²¹ niiwo awo,' ati bw'atumula Mukama w'eigye, Katonda we Isiraeri, eby'ebintu ebisigaire mu nyumba ya Mukama n'o mu nyumba ya kabaka we Yuda n'o mu Yerusaalemi nti ²² Biritwalibwa e Babulooni, era biribba eyo okutuusya ku lunaku lwe ndibaizira bw'atumula Mukama; kale kaisi ne mbatoolayo ne mbiryawo mu kifo kino.