¹ Abimereki mutaane wa Yerubbaali n'a yaba e Sekemu eri Bagande ba maye n'a tumula n'a b'o luganda bonabona ab'e nyumba ya itaaye wa maye nti ² Mbeegayiriire, mutumulire mu matu g'a basaiza bonabona ab'e Sekemu nti ekisinga obusa gye muli kiriwa bataane ba Yerubbaali bonabona, niibo bantu ensanvu, okubafuganga, oba omumu okubafuganga? era mwijukire nga nze ndi w'o ku magumba ganyu n'o mubiri gwanyu. ³ Awo bagande ba maye ni bamutumulira ebigambo ebyo byonbyona mu matu g'a basaiza ab'e Sekemu: emyoyo gyabwe ne gitaka okusengererya Abimereki; kubanga bakobere nti niiye mugande waisu. ⁴ Ni bamuwa (ebitundu) eby'e feeza nsanvu bye batoire mu nyumba ya Baaluberisi. Abimereki n'a biweera abasaiza ababulalaku kye bagasa abatali banywevu, ni bamusengereryanga. ⁵ N'a yaba mu nyumba ya itaaye mu Ofula, n'a itira bagande be bataane ba Yerubbaali, niibo bantu ensanvu, ku ibbaale limu: naye Yosamu mutaane wa Yerubbaali omutomuto n'afikawo; kubanga yeegisire. ⁶ N'a basaiza bonabona ab'o mu Sekemu ni bakuŋaana n'e nyumba yonayona eya Miiro, na bagende ni bafuula Abimereki kabaka, awali omwera oguliraine empango eyabbaire mu Sekemu. ⁷ Awo bwe bakikobeire Yosamu, n'a yaba n'a yemerera ku ntiiko y'o lusozi Gerizimu, n'a yimusya eidoboozi lye, n'a tumulira waigulu, n'a bakoba nti mu mpulire, imwe abasaiza ab'o mu Sekemu, Katonda kaisi abawulire imwe. ⁸ Olwatuukire emisaale ni gifuluma okufuka amafuta ku kabaka yagifuganga; ni gikoba omuzeyituuni nti tufuge iwe. ⁹ Naye omuzeyituuni ni gugikoba nti nandiretere obugimu bwange imwe abalemere okuteekamu ekitiibwa Katonda n'a bantu ku bwange, ne njaba okuyuuguuma ku musaale? ¹⁰ Emisaale ne gikoba omutiini nti iza iwe otufuge, ¹¹ Naye omutiini ni gugikoba nti nandiretere obuwoomerevu bwange n'e bibala byange ebisa, ni njaba okuyuuguuma ku musaale? ¹² Emisaale ni gikoba omuzabbibu nti iza iwe otufuge. ¹³ Omuzabbibu ni gugikoba nti nandiretere omwenge gwange, ogusanyusya Katonda n’a bantu, ni njaba okuyuuguuma ku musaale? ¹⁴ Awo emisaale gyonagyona kaisi ni gikoba omufuwanduzi nti iza iwe otufuge. ¹⁵ Omuwa ni gukoba emisaala nti Oba nga munfukaku amafuta okubba kabaka mazima dala, kale mwize mwesige ekiwolyo kyange: naye oba nga ti bwe kiri, omusyo guve mu muwa gumalewo emivule egy'o ku Lebanooni. ¹⁶ Kale, oba nga mwakolere eby'a mazima n'e by'o butuukirivu, okufuula Abimereki kabaka, era oba nga mwakolere kusa Yerubbaali n'e nyumba ye, ne mu mukola ng'e mikono gye bwe gyasaaniire (okumukola); ¹⁷ (kubanga itawange yabalwaniriire, n'a singawo obulamu bwe, n'a bawonya mu mukono gwa Midiyaani: ¹⁸ mwena mugolokokere watyanu ku nyumba ya itawange, era mwaitira bataane be, abantu nsanvu, ku ibbaale limu, ne mufuula Abimereki, mutaane w'o muzaana we, kabaka w'a basaiza ab'o mu Sekemu, kubanga niiye mugande wanyu;) ¹⁹ kale oba nga mu mukolere watyanu eby'a mazima n'e by'o butuukirivu Yerubbaali n'e nyumba ye, kale musanyukire Abimereki, era yeena abasanyukire imwe: ²⁰ naye oba nga ti bwe kiri, omusyo guve mu Abimereki, gumalewo abasaiza ab'o mu Sekemu n'e nyumba ya Miiro, era omusyo guve mu basaiza ab'o mu Sekemu n'o mu nyumba ya Miiro gumalewo Abimereki. ²¹ Yosamu n'a yaba mbiro n'a iruka, n'a tuuka e Beseri, n'abba eyo, olw'o kutya Abimereki mugande we. ²² Abimereki n'a mala emyaka isatu nga niiye mukulu wa Isiraeri. ²³ Katonda n’a tuma omuzimu omubbiibi okwawukanya Abimereki n'a basaiza ab'o mu Sekemu; abasaiza ab'o mu Sekemu ne basalira Abimereki enkwe: ²⁴ ekyeju kye bakoleire bataane ba Yerubbaali ensanvu kaisi kiize, n'o musaayi gwabwe guteekeibwe ku Abimereki mugande wabwe, eyabaitire, n'o ku basaiza ab'o mu Sekemu, abawaire emikono gye amaani okwita Bagande be. ²⁵ Abasaiza ab'o mu Sekemu ni bateekawo abateegi okumuteegeranga ku ntiiko gy'e nsozi, ni banyaga bonabona ababitanga mu ngira eyo gye babbaire: ne bakobera Abimereki. ²⁶ Awo Gaali mutaane wa Ebedi n'aiza n'a bagande be, n'a yaba e Sekemu: abasaiza ab'o mu Sekemu ne bamwesiga. ²⁷ Ne bafuluma mu nimiro, ni bafumba embaga, ni bayingira mu nyumba ya lubaale waabwe, ni balya ni banywa, ni balaama Abimereki. ²⁸ Gaali mutaane wa Ebedi n'a tumula nti Abimereki niiye ani, n'o Sekemu niiye ani, ife okumuweererya? Ti niiye mutaane wa Yerubbaali? n'o Zebbuli omumyuka we (niiye ani)? muweererye abasaiza ba Kamoli itaaye wa Sekemu: naye ife kiki ekyandikutuweerereserye oyo? ²⁹ Era singa abantu bano baali wansi w'o mukono gwange! nanditoirewo Abimereki. N'a koba Abimereki nti Yongera eigye lyo ofulume. ³⁰ Awo Zebbuli omukulu w'e kibuga bwe yawuliire ebigambo bya Gaali mutaane wa Ebedi, obusungu bwe ni bubuubuuka. ³¹ N'atuma ababaka eri Abimereki mu kyama, ng'a tumula nti bona, Gaali mutaane wa Ebedi n'a bagande be batuukire mu Sekemu; era, bona, bawalirirya ekibuga okukulwanisya. ³² Kale, golokoka obwire, iwe n'a bantu abali naiwe, muteegere mu nimiro: ³³ awo olulituuka mu makeeri eisana nga lyakavayo, oligolokoka mu makeeri n'o lumba ekibuga: era, bona, iye n'a bantu abali naye bwe balifuluma okulwana na iwe, olisobola okubakola nga bw'o libona eibbanga. ³⁴ Abimereki n'a golokoka, n'a bantu bonabona ababbaire naye, bwire, ni bateega Sekemu nga beeyawiremu ebisinde bina. ³⁵ Gaali mutaane wa Ebedi n'a fuluma, n’a yemerera mu mulyango gwe wankaaki w'e kibuga: Abimereki n'a golokoka n'a bantu ababbaire naye we babbaire bateegeire. ³⁶ Awo Gaali bwe yaboine abantu, n’a koba Zebbuli nti bona, abantu baserengeta nga bava ku ntiiko gy'e nsozi: Zebbuli n'a mukoba nti obona ekiwolyo ky'e nsozi nga kifaanana ng'a bantu. ³⁷ Gaali n'a tumula ate n'a koba nti bona, waliwo abafuluma (mu ngira eri) wakati mu nsi, n'e kibiina ekimu kifuluma mu ngira ey'o mwera ogw'a bafumu. ³⁸ Awo Zebbuli kaisi n'a mukoba nti omuwa gwo atyanu guli waina kubanga watumwire nti Abimereki niiye ani, ife okumuweererya? bano ti niibo bantu be wanyoomere? Atyanu, nkwegayiriire, fuluma olwane nabo. ³⁹ Gaali n'a tangira abasaiza ab'o mu Sekemu n'a fuluma, n'a lwana n'o Abimereki. ⁴⁰ Abimereki n'a mubbinga, n'a iruka mu maiso ge, ni bagwa bangi nga bafumitiibwe, okutuusa mu mulyango gwa wankaaki. ⁴¹ Abimereki n'abba mu Aluma: Zebbuli n'a bbingamu Gaali na bagande be, baleke okubba mu Sekemu. ⁴² Awo olwatuukire Amakeeri abantu ni bafuluma mu nimiro; ni bakobera Abimereki. ⁴³ Awo n'a twala abantu n'a baawulamu ebisinde bisatu, n'a teegera mu nimiro: n'a linga, era, bona, abantu ni bafuluma mu kibuga; n'a bagolokokeraku, n'a bakubba: ⁴⁴ Abimereki n'e bisinde ebyabbaire naye ni bafubutuka, ne beemerera mu mulyango gwe wankaaki w'e kibuga: ebisinde ebibiri ni bafubutukira ku bonabona ababbaire mu nimiro ni babakubba. ⁴⁵ Abimereki n'a zibya obwire ku lunaku olwo ng'a lwana n'e kibuga; ekibuga n'a kikubba, n'a ita abantu ababbaire omwo: n'a menyamenya ekibuga, n'a kisiiga omunyu. ⁴⁶ Abasaiza bonabona ab'o mu kigo eky'e Sekemu bwe baawuliire ekyo ne bayingira mu kiina eky'o mu nyumba ya Eruberisi. ⁴⁷ Ne babakobera Abimereki ng'a basaiza bonabona ab'o mu kigo eky'e Sekemu bakuŋaine. ⁴⁸ Awo Abimeieki n'a niina ku lusozi Zalumoni, iye n'a bantu bonabona ababbaire naye; Abimereki n'a irira empasa mu ngalo gye, n'a tema eitabi ku musaale, n'a lironda, n'a liteeka ku kibega kye: n'a koba abantu ababbaire naye nti kye muboine nga ninze nkikolere, mwanguwe mukole nga bwe nkolere ⁴⁹ Abantu bonabona boona batyo ne batema buli muntu eitabi lye, ni basengererya Abimereki, ne bagateeka ku kiina kidi, ni bookya ekiina goona; n'o kufa ni bafa abasaiza bonabona ab'o mu kigo eky'e Sekemu boona, abasaiza n'a bakali nga lukumi. ⁵⁰ Awo Abimereki n'a yaba e Sebezi, n'a siisira olusiisira ku Sebezi, n'a kimenyamenya. ⁵¹ Naye mu kibuga mwabbairemu ekigo eky'a maani, omwo mwe bairukiire abasaiza bonabona n'a bakali, ne bonabona ab'e kibuga, ni beigalira, ni baniina ku kasulya k'e kigo. ⁵² Abimereki n'aiza eri ekigo, n'a lwana nakyo, n'a semberera olwigi lw'e kigo okulwokya n'o musyo. ⁵³ N'omukali omumu n'a kasuka olubengo ku mutwe gwa Abimereki, n'a mwasya omutwe. ⁵⁴ Awo n'a yanguwa okweta omwisuka eyatwalanga ebyo kulwanisya bye, n'a mukoba nti Sowola ekitala kyo, ongite, abantu balekenga okuntumulaku nti omukali niiye yamwitire. Omwisuka we n'a musumita, n'afa. ⁵⁵ Abasaiza ba Isiraeri bwe baboine nga Abimereki afiire, ni bairayo buli muntu mu kifo kye. ⁵⁶ Katonda bwe yawalaine atyo obubbiibi bwa Abimereki, bwe y'a kolere itaaye, kubanga yaitire bagande be nsanvu: ⁵⁷ n'o bubbiibi bwonabwona obw'a basaiza ab'o mu Sekemu Katonda n'a buwalana ku mitwe gyabwe: n'o kulaama kwa Yosamu mutaane wa Yerubbaali ni kwiza ku ibo.