¹ Awo oluvanyuma lwa Abimereki ni wabbaawo Toola mutaane wa Puwa, mutaane wa Dodo, omusaiza wa Isakaali, okulokola Isiraeri; n'abba mu samiri mu nsi y'Efulayimu ey'e nsozi. ² N'alamulira Isiraeri emyaka abiri na isatu, n'afa, ni bamuziika mu Samiri. ³ Oluvanyuma lw'oyo ni wabbaawo Yayiri Omugireyaadi; n'a lamulira Isiraeri emyaka abiri na ibiri. ⁴ Era yabbaire na bataane be asatu, abeebagalanga abaana b'e ndogoyi asatu, boona babbaire n'e bibuga asatu, bye bayetere Kavosuyayiri okutuusya atyanu, ebiri mu nsi y'e Gireyaadi. ⁵ Yayiri n'afa ne bamuziika mu Kamoni. ⁶ Abaana ba Isiraeri ni beeyongera ate okukola ekyabbaire mu maiso ga Mukama ekibbiibi, ne baweereresya Babaali, ne Asutaloosi n'a bakatonda ab'e Busuuli, na bakatonda ab'e Sidoni, n'a bakatonda b'e Mowaabu, n'a bakatonda ab'a baana ba Amoni, n'a bakatonda ab'Abafirisuuti; Mukama ni bamuvaaku ne batamuweererya. ⁷ Obusungu bwa Mukama ni bubuubuuka ku Isiraeri, n'a batunda mu mukono gw'Abafirisuuti, n'o mu mukono gw'a baana ba Amoni. ⁸ Ni beeraliikirira ni bajooga abaana ba Isiraeri omwaka ogwo: (bajoogeire) emyaka ikumi na munaana abaana ba Isiraeri bonabona ababbaire emitala wa Yoludaani mu nsi y'Abamoli eri mu Gireyaadi. ⁹ Abaana ba Amoni ni basomoka Yoludaani okulwanisya n'e Yuda n'e Benyamini n'e nyumba ya Efulayimu; n'o kweraliikirira Isiraeri ne yeeraliikirira inu. ¹⁰ Abaana ba Isiraeri ni bakungira Mukama nga batumula nti twakusoberye kubanga twaviire ku Katonda waisu; ni tuweererya Babaali. ¹¹ Mukama n'a koba abaana ba Isiraeri nti ti nabalokoire eri Abamisiri n'eri Abamoli, eri abaana ba Amoni n'eri Abafirisuuti? ¹² Era na Basidoni n'Abamaleki n'Abamawoni babajoogere; ni mu kungira ni mbalokola mu mukono gwabwe. ¹³ Naye mwanviireku ni muweererya bakatonda abandi: kyenva ndeka okwaba okubalokola ate. ¹⁴ Mwabe mukungire bakatonda be mwalondere; ibo babalokolenga mu biseera eby'o kunakuwala kwanyu. ¹⁵ Abaana ba Isiraeri ne bakoba Mukama nti Twayonoonere: tukole kyonakyona kyewabona nga kisa: kyonka tuwonye watyanu, tukwegayiriire. ¹⁶ Ni baiza mu ibo bakatonda abayaka ni baweererya Mukama: omwoyo gwe ni gumuluma olw'e naku gya Isiraeri. ¹⁷ Awo abaana ba Amoni kaisi ne bakuŋaana ne basiisira mu Gireyaadi. Abaana ba Isiraeri ni bakuŋaana ni basiisira mu Mizupa. ¹⁸ Abantu, abakulu ab'e Gireyaadi, ne bakobagana nti omusaiza aliwaina alisooka okulwanisya abaana ba Amoni? oyo niiye alibba omukulu w'abo bonabona abatyama mu Gireyaadi.