¹ Era Yefusa Omugireyaadi yabbaire musaiza wa maani muzira, era yabbaire mwana w'obwisuka: Gireyaadi niiye yazaire Yefusa. ² Omukali ow'e Gireyaadi n'a muzaalira abaana ab'o bwisuka; abaana b'o mukali we bwe baakulire, ni babbinga Yefusa; ni bamukoba nti tolisika mu nyumba ya Itawaisu; kubanga iwe oli mwana w'o mukali gondi. ³ Awo Yefusa kaisi n'a iruka bagande be, n’abba mu nsi y'e Tobu: abasaiza ababulaku kye bagasa ni bakuŋaana eri Yefusa, ni batabaalanga naye. ⁴ Awo olwatuukire ekiseera bwe kyabitirewo abaana ba Amoni ni balwana n'e Isiraeri. ⁵ Awo olwatuukire abaana ba Amoni bwe balwaine n'e Isiraeri, abakaire b'e Gireyaadi ni baaba okusyoma Yefusa okumutoola mu nsi ye, Tobu: ⁶ ni bakoba Yefusa nti iza obbe omukulu waisu, tulwane n'a baana ba Amoni. ⁷ ni bakoba Yefusa nti iza obbe omukulu waisu, tulwane n'a baana ba Amoni. ⁸ Abakaire ab'e Gireyaadi ni bakoba Yefusa nti Kyetuviire tukukyukira ate atyanu oyabe naife olwane n'a baana ba Amoni, weena olibba mukulu waisu afuga bonanona abatyama mu Gireyaadi. ⁹ Yefusa n'a koba abakaire ab'e Gireyaadi nti bwe muliirawo ewaisu okulwana n'a baana ba Amoni Mukama n'a bagabula mu maiso gange, ndibba mukulu wanyu? ¹⁰ Abakairee b'e Gireyaadi ni bakoba Yefusa nti Mukama niiye yabbanga omujulizi wakati waisu; mazima n'e kigambo kyo bwe kiribba bwe tulikola tutyo. ¹¹ Awo Yefusa kaisi nayaba n'a bakaire ab'e Gireyaadi, abantu ni bamufuula omukulu waabwe abafuga: Yefusa n'a tumula ebigambo bye byonbyona mu maiso ga Mukama mu Mizupa. ¹² Awo Yefusa n'a tuma ababaka eri kabaka w'a baana ba Amoni ng'a tumula nti iwe olina ki nanze, ekikuleetere gye ndi okulwanisya ensi yange? ¹³ Kabaka w'a baana ba Amoni n'a iramu ababaka ba Yefusa nti kubanga Isiraeri yantoireku ensi yange bwe yayambukire okuva mu Misiri, okuva ku Alunoni okutuuka ku Yabboki n'o ku Yoludaani: kale atyanu giizire ensi egyo lw'e mirembe. ¹⁴ Yefusa n'a tuma ate ababaka eri kabaka w'a baana ba Amoni. ¹⁵ n'a bakoba nti Yefusa bw'atumula atyo nti Isiraeri teyanyagire nsi ye Mowaabu, waire ensi y'a baana ba Amoni: ¹⁶ naye bwe bayambukire okuva mu Misiri, Isiraeri bwe yabbaire abita mu idungu okutuuka ku nyanza Emyofu, n'atuuka e Kadesi; ¹⁷ Isiraeri kaisi n'atuma ababaka eri kabaka wa Edomu ng'atumula nti nkwegayiriire, ka mbite mu nsi yo: naye kabaka wa Edomu n'a tawulira: era n'atumira atyo kabaka wa Mowaabu: naye n'a tataka: Isiraeri n'atyama mu Kadesi. ¹⁸ Awo Kaisi n'a bita mu idungu ni yeetooloola ensi ya Edomu n'e nsi ye Mowaabu, n'atuuka ku luuyi lw'e nsi y'e Mowaabu olw'e buvaisana, ni basiisira emitala wa Alunoni; naye ni batatuuka mu nsalo ya Mowaabu, kubanga Alunoni gwabbaire nsalo y'e Mowaabu: ¹⁹ Isiraeri n'a tuma ababaka eri Sikoni kabaka w'Abamoli, kabaka w’e Kesuboni; Isiraeri n'a mukoba nti tukwegayiriire; ka tubite mu nsi yo njabe mu kifo kyange. ²⁰ Naye Sikoni n'ateesiga Isiraeri kubita mu nsalo ye; naye Sikoni n'akuŋaanya abantu be bonabona n'a siisira mu Yakazi, n'a lwana n'e Isiraeri: ²¹ Mukama Katonda wa Isiraeri; n'agabula Sikoni n'a bantu be bonabona mu mukono gwa Isiraeri; ni babaita: Isiraeri kaisi n'alya ensi yonayona ey'Abamoli, niibo batyaime mu nsi eyo. ²² Ne balya ensalo yonayona ey'Abamoli, okuva ku Alunoni okutuuka ku Yaboki, era okuva mu idungu okutuuka ku Yoludaani. ²³ Kale atyanu Mukama Katonda wa Isiraeri, yabbingiremu Abamoli mu maiso g'a bantu ba Isiraeri, naiwe wandibaliire? ²⁴ Tolirya nsi katonda wo Kemosi gy'akuwaire okulya? Fena tutyo bonabona Mukama Katonda waisu be yabbingiremu mu maiso gaisu, eyo gye tulirya. ²⁵ Ne atyanu niiwe osinga Balaki mutaane wa ZipoIi, kabaka wa Mowaabu, n'a katono? yabbaire alwaineku n'e Isiraeri; oba yabbaire alwaineku nabo? ²⁶ Isiraeri bwe yabbaire atyama mu Kesuboni n'e byalo byakyo, n'o mu Aloweri n'e byalo byakyo, n'o mu bibuga byonabyona ebiri ku mbali ga Alunoni, emyaka bisatu; ekyabalobeire ki okubiiramu okubirya mu kiseera ekyo? ²⁷ Kale nze tinkwonoonanga, naye iwe onsoberye okulwana nanze: Mukama, Omulamuli, alamule watyanu wakati w'a baana ba Isiraeri n'a baana ba Amoni. ²⁸ Naye kabaka w'a baana ba Amoni n'atawulira bigambo bya Yefusa bye yamutumiire. ²⁹ Awo omwoyo gwa Mukama kaisi ni gwiza ku Yefusa, n'a bita mu Gireyaadi n'e Manase, n'a bita mu Mizupe eky'o mu Gireyaadi, n'ava e Mizupe eky'o mu Gireyaadi n'a bita n'a yaba eri abaana ba Amoni. ³⁰ Yefusa ne yeeyama eri Mukama obweyamu n'a koba nti oba ng'oligabulira dala abaana ba Amoni mu mukono gwange; ³¹ awo olulituuka, ekintu kyonakyona ekirifuluma mu njigi gy'e nyumba yange okunsisinkana, bwe ndiirawo emirembe okuva eri abaana ba Amoni, kiribba kya Mukama, nzena ndikiwaayo okubba ekiweebwayo ekyokyebwa: ³² Awo Yefusa n'abita n'ayaba eri abaana ba Amoni okulwana nabo; Mukama n'a bagabula mu mukono gwe. ³³ N'a bakubba okuva ku Aloweri okutuusya ng'o iza e Minisi, niibyo bibuga abiri, n'o kutuuka ku Aberukeramimu, n'aita bangi inu: Abaana ba Amoni bwe bajeemwirwe batyo mu maiso g'abaana ba Isiraeri: ³⁴ Yefusa n'aiza e Mizupa eri enyumba ye, era, bona, muwala we n'a fuluma okumusisinkana ng'alina ebitaasa era nga bakina: era niiye yabbaire omwana we omumu; teyabbaire na w'o bwisuka waire ow'o buwala wabula iye. ³⁵ Awo olwatuukire bwe yamuboine n'akanulakanula engoye gye n'a tumula nti ginsangire, muwala wange! onakuwairye inu, wena oli ku muwendo gw'abo abaneeraliikiriirye: kubanga nayasamire omunwa gwange eri Mukama, so tinsobola kwiririra. ³⁶ N'amukoba nti itawange, wayasamire omunwa gwo eri Mukama; nkola ng'e kigambo bwe kyabbaire ekyaviire mu munwa gwo; kubanga Mukama yakuwalanirye eigwanga ku balabe bo, abaana ba Amoni. ³⁷ N'a koba itaaye nti Ekigambo kino kinkolwe: ndekera emyezi ibiri, njabe nserengetere ku nsozi, nkungire obutamanya bwange musaiza, nze n'a banange. ³⁸ N'akoba nti Yaba: N'amuseebula amale emyezi ibiri: n'a yaba, iye na bainaye, n'a kungira obutamanya bwe musaiza ne bamukungisirya eyo ku nsozi. ³⁹ Awo olwatuukire emyezi eibiri bwe gyaweireku, n'a irawo eri itaaye, n'a mukola ng'o bweyamu bwe bwe bwabbaire bwe yeeyamire: era yabbaire akaali kumanya musaiza. ⁴⁰ Ne wabbangawo empisa mu Isiraeri, abawala ba Isiraeri okwabanga buli mwaka okwijukira muwala wa Yefusa omugireyaadi enaku ina buli mwaka.