¹ Abasaiza ba Efulayimu ni bakuŋaana ni babita okwaba mu nsi ey'o bukiika obugooda; ni bakoba Yefusa nti kiki ekyakusomokerye okwaba okulwana n'a baana ba Amoni, n'ototweta ife okwaba naiwe? tulikwokyererya enyumba yo omusyo. ² Yefusa n'a bakoba nti nze n'a bantu bange twabbaire tulwana inu n'a baana ba Amoni; awo bwe nabeetere ni mutandokola mu mukono gwabwe. ³ Awo bwe naboine nga timundokoire, obulamu bwange ne mbuteeka mu ngalo gyange, ne nsomoka okulwana n'a baana ba Amoni, Mukama n'abagabula mu mukono gwange: kale, kiki ekibaniinisya atyanu gye ndi okulwana nanze? ⁴ Awo Yefusa kaisi n'akuŋaanya abasaiza bonabona ab'e Gireyaadi n'a lwana ne Efulayimu: abasaiza ab'e Gireyaadi ni bakuba Efulayimu, kubanga batumwire nti Muli bairuki b'Efulayimu imwe ab'e Gireyaadi, wakati mu Efulayimu (ne) wakati mu Manase. ⁵ Ab'e Gireyaadi ne beekwata emisomoko gya Yoludaani okuteega Abaefulayimu: awo olwatuukire (omuntu yenayena) ku bairuki ba Efulayimu bwe yatumwire nti nsomoke, ab'e Gireyaadi ni bamukoba nti Oli Mwefulayimu? Bwe yatumwire nti Bbe; ⁶ Kaisi ni bamukoba nti Kale tumula Shibbolesi; n'a tumula nti Sibbolesi; kubanga teyasoboire kukiruŋamya kukituukya kusa; kaisi ni bamukwata, ni bamwitira ku misomoko gya Yoludaani; ni bafa ku Efulayimu mu biseera ebyo Emitwaalo ina mu nkumi ibiri. ⁷ Yefusa n'alamulira Isiraeri emyaka mukaaga. Yefusa Omugireyaadi kaisi n'afa, ni bamuziika mu kibuga kimu ku by'o mu Gireyaadi. ⁸ Awo oluvanyuma lwe Ibuzaani ow'e Besirekemu n'alamula Isiraeri. ⁹ Era yabbaire n'a bataane be asatu, era yasindikire abawala be asatu okwaba mu nsi egendi, n'a toola abawala asatu mu nsi egendi n'a bakwera bataane be. N'a lamulira Isiraeri emyaka musanvu. ¹⁰ Ibuzaani n'afa, ne bamuziika mu Besirekemu. ¹¹ Awo oluvannyuma lwe Eroni Omuzebbulooni n'a lamula Isiraeri; n'alamulira Isiraeri emyaka ikumi. ¹² Eroni Omuzebbulooni n'afa, ne bamuziika mu Ayalooni mu nsi ye Zebbulooni. ¹³ Awo oluvanyuma lwe Abudoni mutaane wa Kireri Omupirasoni n'a lamula Isiraeri. ¹⁴ Era yabbaire n'a bataane be ana n'a baizukulu be asatu, abeebagalanga ku baana b'e ndogoyi nsanvu: n'alamulira Isiraeri emyaka munaana. ¹⁵ Abudoni mutaane wa Kireri Omupirasoni n'afa, ne bamuziika mu Pirasoni mu nsi ye Efulayimu, mu nsi ey'Abamaleki ey'e nsozi.