¹ Awo abaana ba Isiraeri ni beeyongera ate okukola ekyabbaire mu maaso ga Mukama ekibbiibi; Mukama n'a bagabulira mu mukono gw'Abafirisuuti emyaka ana. ² Era wabbairewo omusaiza ow’e Zola, ow’e kika ky’Abadaani, eriina lye Manowa: no mukali we yabbaire mugumba ng'a tazaala. ³ Malayika wa Mukama n'abonekera omukali n'a mukoba nti bona, oli mugumba so tozaala: naye olibba ekida, era olizaala omwana wo bwisuka. ⁴ Kale weekuume nkwegayiriire, oleke okunywanga ku mwenge waire ekitamiirya so tolyanga ku kintu kyonakona ekitali kirongoofu: ⁵ kubanga, bona, olibba kida, era olizaala; omwana w'o bwisuka; so akamwanu tikabitanga ku mutwe gwe: kubanga omwana alibba Muwonge eri Katonda okuva mu kida: era niiye alitandiika okulokola Isiraeri mu mukono gw'Abafirisuuti. ⁶ Awo omukali kaisi naiza n'a kobera ibaaye, ng'a tumula nti Omusaiza wa Katonda aizire gye ndi, n'a maiso ge gabbaire ng'a maiso ga malayika oyo owa Katonda, ag'e ntiisya enyingi; so timubwirye gy'aviire, so n'atankobera liina lye: ⁷ naye n'ankoba nti bona, olibba ekida, era olizaala omwana wo bwisuka; ne watyanu tonywanga ku mwenge waire ekitamiirya, so tolyanga ku kintu ekitali kirongoofu: kubanga omwana alibba Muwonge eri Katonda okuva mu kida okutuusya ku lunaku olw'o kufa kwe. ⁸ Awo Manowa kaisi ni yeegayirira Mukama n'a tumula nti Ai Mukama, nkwegayiriire, omusaiza wa Katonda gwe watumire aize gye tuli olw'okubiri, atwegeresye bwe tulikola omwana ayaba okuzaalibwa. ⁹ Katonda n'a wulira eidoboozi lya Manowa; malayika wa Katonda n'a izira omukali olw'okubiri bwe yabbaire atyaime mu nimiro: naye Manowa ibaye ti yabbaire naye. ¹⁰ Omukali n'a yanguwa n'a iruka n'a kobera ibaaye n'a mukoba nti bona, omusaiza ambonekeire eyangiziire olundi. ¹¹ Manowa n'a golokoka n'a goberera mukali we, n'a iza eri omusaiza n'a mukoba nti iwe oli omusaiza eyatumwire n'o mukali? N'a koba nti ninze ono. ¹² Manowa n'akoba nti Kale ebigambo byo bituukirire; omwana alifaanana atya, n'o mulimu gwe (gulibba ki)? ¹³ Malayika wa Mukama n'a koba Manowa nti byonbyona bye nakobeire omukali abyekuumenga. ¹⁴ Talyanga ku kintu ekiva ku muzabbibu, so tanywanga mwenge waire ekitamiirya so talyanga kintu kyonakona ekitali kirongoofu; byonabyona bye namulagiire abikwatenga. ¹⁵ Manowa n'a koba malayika wa Mukama nti Nkwegayiriire, tukulwisyewo, tukuteekereteekere omwana gw'e mbuli. ¹⁶ Malayika wa Mukama n'akoba Maaowa nti waire nga wandwisyawo tinjaba okulya ku mere yo: era bw'otaka okuteekateeka ekiweebwayo ekyokyebwa, kikugwanira okukiwa Mukama. Kubanga Manowa yabbaire tamaite nga niiye malayika wa Mukama. ¹⁷ Manowa n'akoba malayika wa Mukama nti eriina lyo niiwe ani, ebigambo byo bwe birituukirira kaisi tukuwe ekitiibwa? ¹⁸ Malayika wa Mukama n'a mukoba nti obuulirye ki eriina lyange, kubanga ly'e kitalo? ¹⁹ Awo Manowa n'a irira omwana gw'e mbuli wamu n'e kiweebwayo eky'o buwita, n'a kiweerayo ku ibbaale eri Mukama; n'o (malayika) n'a kola eby'e kitalo, Manowa n'o mukali we nga bamulingirira. ²⁰ Kubanga olwatuukire omusyo bwe gwaviire ku kyoto ni guniina mu igulu, malayika wa Mukama n'a yambukira mu musyo ogw'o ku kyoto: Manowa n'o mukali we nga bamulingirira ni bavuuaama amaiso gaabwe. ²¹ Naye malayika wa Mukama n'a tabonekera ate Manowa wairee mukali we. Awo Manowa kaisi n'a manya nga niiye malayika wa Mukama. ²² Manowa n'a koba mukali we nti tetwaleke kufa, kubanga tuboine Katonda. ²³ Naye mukali we n'a mukoba nti oba nga Mukama abbaire ataka okutwita, teyandiikiriirye ekiweebwayo ekyokyebwa n'e kiweebwayo eky'o bwita eri omukono gwaisu, so tiyanditulagire bigambo ebyo byonabyona, so teyanditukobeire mu biseera bino ebigambo ebiri bityo. ²⁴ Omukali n’a zaala omwana w'o bwisuka, n’a mutuuma eriina Samusooni: omwana n'a kula, Mukama n'a muwa omukisa. ²⁵ Omwoyo gwa Mukama ni gusooka okumusindika mu Makanedani, wakati w’e Zola n'e Esutaoli.